സിനിമയ്‌ക്കൊപ്പം തന്നെ സോഷ്യൽ മീഡിയയിലും തന്റെതായ ഇടം കണ്ടെത്തിയ നടനാണ് മോഹൻലാൽ.പാചകം, പെറ്റ്‌സ് തുടങ്ങി വേറിട്ട വീഡിയോകളിലുടെ സമൂഹമാധ്യമത്തിലും ലാലേട്ടന് ആരാധകർ ഏറെയാണ്.സമൂഹമാധ്യമങ്ങളിലൂടെ പുറത്തുവരുന്ന അദ്ദേഹത്തിന്റെ ഓരോ ചിത്രങ്ങളും വീഡിയോകളും നിമിഷ നേരം കൊണ്ടാണ് വൈറലാകുന്നത്. ലിജോ ജോസ് പെല്ലിശേരി ഒരുക്കുന്ന മലൈക്കോട്ടൈ വാലിബനിൽ മോഹൻലാൽ നായകനാകുന്നു എന്ന വാർത്തയുടെ ആവേശം കെട്ടടങ്ങും മുമ്പ് താരത്തിന്റെ മറ്റൊരു വീഡിയോ സോഷ്യൽ മീഡിയയിൽ ചർച്ചയാകുകയാണ്.

ദുബായ് യാത്രയ്ക്കിടെ കാറിൽ നിന്നിറങ്ങി വരുന്ന മോഹൻലാൽ ഫുട്പാത്തിൽ അലക്ഷ്യമായി കിടന്നിരുന്ന ഏതാനും കടലാസ് കഷണങ്ങൾ കൈകൊണ്ട് എടുത്ത് മാറ്റുന്ന വീഡിയോയാണ് പുറത്തുവന്നത്. ഒരു തരത്തിലുള്ള താരജാഡകളുമില്ലാതെയുള്ള മോഹൻലാലിന്റെ പ്രവൃത്തിയെ ആവോളം പ്രശംസിക്കുകയാണ് ആരാധകർ. അദ്ദേഹത്തിന്റെ ഫാൻസ് പേജ് വഴി പ്രചരിക്കുന്ന വീഡിയോ നിമിഷങ്ങൾക്കകം വൈറലാകുകയും ചെയ്തു.

 

രജനീകാന്തിനെ നായകനാക്കി നെൽസൺ ദിലീപ് കുമാർ സംവിധാനം ചെയ്യുന്ന ജയിലറിലെ സസ്‌പെൻസ് നിറഞ്ഞ അതിഥി വേഷത്തിൽ മോഹൻലാൽ ഈയിടെ അഭിനയിച്ചിരുന്നു. തീർത്തും അപ്രതീക്ഷിതമായാണ് രജനി ചിത്രത്തിലെ മോഹൻലാലിന്റെ സാന്നിധ്യം അണിയറപ്രവർത്തകർ വെളിപ്പെടുത്തിയത്. ബറോസ്, റാം, എമ്പുരാൻ, മലൈക്കോട്ടൈ വാലിബൻ, എലോൺ എന്നിവയാണ് അദ്ദേഹത്തിന്റേതായി ഇനി പുറത്തുവരാനിരിക്കുന്ന ചിത്രങ്ങൾ.

മറുനാടന്‍ മലയാളി

    മറുനാടന്‍ മലയാളി ബ്യൂറോ