തിരുവനന്തപുരം: നീണ്ട 15 വർഷങ്ങൾക്ക് ശേഷം നടൻ മോഹൻലാലും നടി ശോഭനയും വീണ്ടും സ്‌ക്രീനിൽ ഒന്നിക്കുകയാണ്. സൗദി വെള്ളക്ക എന്ന ചിത്രത്തിന് ശേഷം തരുൺ മൂർത്തി സംവിധാനം ചെയ്യുന്ന എൽ 360(താത്കാലിക പേര്) എന്ന ചിത്രത്തിലാണ് ഇരുവരും വീണ്ടും നായികാ നായകന്മാരായി എത്തുന്നത്. നടി ശോഭനയാണ് സോഷ്യൽ മീഡിയയിലൂടെ ചിത്രത്തെ കുറിച്ച് പറഞ്ഞത്. നാല് വർഷങ്ങൾക്ക് ശേഷമാണ് മലയാളത്തിലേക്ക് തിരിച്ചു വരുന്നതെന്നും പുതിയ ചിത്രത്തിനായി സൂപ്പർ എക്‌സൈറ്റഡ് ആണെന്നും ശോഭന പറഞ്ഞു. താനും മോഹൻലാലും ഒന്നിക്കുന്ന 56-ാമത്തെ ചിത്രമാണിതെന്നും താരം വ്യക്തമാക്കി. എന്നാൽ, സത്യത്തിൽ, മോഹൻലാലും, ശോഭനയും 55 സിനിമകളിൽ അഭിനയിച്ചിട്ടുണ്ടോ? ഇക്കാര്യത്തിൽ തിരുത്ത് വേണമെന്നാണ് സിനിമാ നിരൂപകനും മോഹൻലാൽ ഫാനുമായ സഫീർ അഹമ്മദ് തന്റെ കുറിപ്പിൽ ആവശ്യപ്പെടുന്നത്.

'അവിടത്തെ പോലെ ഇവിടെയും' എന്ന സിനിമ മുതൽ 2009 ൽ റിലീസായ സാഗർ ഏലിയാസ് ജാക്കി വരെ 25 സിനിമകൾ മാത്രമാണ് ഇരുവരും ഒരുമിച്ച് അഭിനയിച്ചതെന്ന് സഫീർ വാദിക്കുന്നു. സോഷ്യൽ മീഡിയയിലും ഇത് ചൂടേറിയ ചർച്ചയായി.

സഫീർ അഹമ്മദിന്റെ കുറിപ്പിന്റെ പൂർണരൂപം:

55 മോഹൻലാൽ-ശോഭന സിനിമകൾ!

മോഹൻലാലും ശോഭനയും, അവർ മലയാളികളുടെ എക്കാലത്തെയും ഇഷ്ട താര ജോഡികളിലൊന്നാണ്..തരുൺ മൂർത്തിയുടെ പുതിയ മോഹൻലാൽ സിനിമയിലും താനാണ് നായിക എന്ന് ശോഭന ഒരു വീഡിയോയിലൂടെ ഇന്ന് പങ്ക് വെച്ചിരുന്നു, ഒപ്പം ഇത് മോഹൻലാലിനോടൊപ്പം ഉള്ള 56 ആം സിനിമയാണെന്നും ശോഭന പറഞ്ഞു..മുമ്പ് പല വേദികളിലും മോഹൻലാലിന്റെ കൂടെ 50+ സിനിമകളിൽ അഭിനയിച്ചിട്ടുണ്ടെന്ന് ശോഭന പറഞ്ഞതായി കണ്ടിട്ടുണ്ട്, മോഹൻലാൽ അത് ശരി വെയ്ക്കുന്നതായും കണ്ടിട്ടുണ്ട്..

സത്യത്തിൽ ലാലും ശോഭനയും 55 സിനിമകളിൽ അഭിനയിച്ചിട്ടുണ്ടോ? ഇല്ല എന്നതാണ് യാഥാർത്ഥ്യം..55 സിനിമകൾ പോയിട്ട് 30-40 സിനിമകളിൽ പോലും അവർ ഒരുമിച്ച് അഭിനയിച്ചിട്ടില്ല..വളരെ തെറ്റായിട്ടുള്ള ഒരു കണക്കാണിത്..ഇവർ ഒരുമിച്ച് 25 സിനിമകളിൽ മാത്രമാണ് ഒരുമിച്ച് അഭിനയിച്ചിട്ടുള്ളത്..1985 ൽ റിലീസായ കെ.എസ്.സേതുമാധവന്റെ 'അവിടത്തെ പോലെ ഇവിടെയും' എന്ന സിനിമ മുതൽ 2009 ൽ റിലീസായ സാഗർ ഏലിയാസ് ജാക്കി വരെ 25 സിനിമകൾ മാത്രം..

1985

1.അവിടത്തെ പോലെ ഇവിടെയും
2.അനുബന്ധം
3.രംഗം
4.അഴിയാത്ത ബന്ധങ്ങൾ
5.വസന്തസേന

1986

6.ടി.പി.ബാലഗോപാലൻ.എം.എ
7.അഭയം തേടി
8.ഇനിയും കുരുക്ഷേത്രം
9.കുഞ്ഞാറ്റക്കിളികൾ
10.പടയണി
11.എന്റെ എന്റേത് മാത്രം

1987

12.നാടോടിക്കാറ്റ്

1988

13.ആര്യൻ
14.വെള്ളാനകളുടെ നാട്

1991

15.വാസ്തുഹാര
16.ഉള്ളടക്കം

1993

17.മായാമയൂരം
18.മണിച്ചിത്രത്താഴ്

1994

19.പവിത്രം
20.തേന്മാവിൻ കൊമ്പത്ത്
21.പക്ഷേ
22.മിന്നാരം

2000

23.ശ്രദ്ധ

2004

24.മാമ്പഴക്കാലം

2009

25.സാഗർ ഏലിയാസ് ജാക്കി

മേൽപ്പറഞ്ഞവയാണ് എന്റെ അറിവിൽ മോഹൻലാലും ശോഭനയും ഒരുമിച്ച് അഭിനയിച്ച സിനിമകൾ..25 സിനിമകൾ മാത്രം ചെയ്തിട്ട് ശോഭനയ്ക്ക് എവിടെ നിന്നാണ് ഈ 55 സിനിമകളുടെ കണക്ക് കിട്ടുന്നതെന്ന് മനസിലാകുന്നില്ല..ഈ പറഞ്ഞ ഫിലിം ലിസ്റ്റിൽ തെറ്റുകൾ/തിരുത്തലുകൾ ഉണ്ടേൽ കമന്റ് ചെയ്യൂ..

സഫീർ അഹമ്മദ്