സുക്കർ ബർഗിന്റെ പണി ഏറ്റില്ല; മാസ് റീ എൻട്രിയുമായി മുകുന്ദൻ ഉണ്ണി ; പലതരത്തിലെ പ്രമോഷൻസ് കണ്ടിട്ടുണ്ടെങ്കിലും ഇത്തരത്തിലൊന്ന് ആദ്യമാണെന്നും സോഷ്യൽമീഡിയ

പേജ് ബ്ലോക്ക് ചെയ്ത് സുക്കർ ബർഗ് പണി കൊടുത്തെങ്കിലും മാസ് റീ എൻട്രിയുമായി അഡ്വക്കേറ്റ് മുകുന്ദൻ ഉണ്ണി. ഇങ്ങനെ ഒരു കുറിപ്പാണ് ഇപ്പോൾ സോഷ്യൽ മീഡിയയിൽ നിറയുന്നത്.കഴിഞ്ഞ ഏതാനും ദിവസമായി അഡ്വക്കേറ്റ് മുകുന്ദൻ ഉണ്ണി എന്ന ഫേസ്‌ബുക്ക് പേജ് സോഷ്യൽ മീഡിയയിൽ വൈറലായിരുന്നു. എന്നാൽ വെള്ളിയാഴ്ച രാവിലെ തന്റെ ഫേസ്‌ബുക്ക് പേജ് കമ്മ്യൂണിറ്റി സ്റ്റാൻഡേർഡിന് നിരക്കുന്നതല്ലെന്ന് കാണിച്ച് പേജ് പോയതായി പറഞ്ഞ് മുകുന്ദൻ ഉണ്ണി എന്ന ഇൻസ്റ്റ പേജിൽ പോസ്റ്റ് വന്നിരുന്നു.

തുടർന്ന് വൈകീട്ടാണ് താൻ പറഞ്ഞ പോലെ തിരികെ വന്നെന്ന് പറഞ്ഞു കൊണ്ട് കിടിലൻ ഫോട്ടോ ഷോപ്പ് ചിത്രവുമായി അഡ്വക്കേറ്റ് മുകുന്ദൻ ഉണ്ണി ഫേസ്‌ബുക്ക് പേജ് തിരികെ വന്നത്.സംഭവം വേറെ ഒന്നുമല്ല വിനീത് ശ്രീനിവാസനെ നായകനാക്കി എഡിറ്റർ ആയിരുന്ന അഭിനവ് സുന്ദർ നായക് സംവിധാനം ചെയ്യുന്ന 'മുകുന്ദൻ ഉണ്ണി അസോസിയേറ്റ്സ്' എന്ന ചിത്രത്തിന്റെ പ്രൊമോഷൻസ് ആണ് സോഷ്യൽ മീഡിയയിൽ വൈറലാവുന്നത്.

 

നേരത്തെ 'ഭൂലോക നാറികളായ ഒരുപറ്റം കലാകാരന്മാർ എന്നെ കേന്ദ്ര കഥാപാത്രമാക്കിക്കൊണ്ട് ഒരു സിനിമയെടുത്തിരിക്കുന്നു. അതും എന്റെ കോട്ടയായ കൽപ്പറ്റയിൽ ജോലിത്തിരക്കിനിടയിൽ എനിക്കിത് ശ്രദ്ധിക്കാൻ കഴിഞ്ഞില്ല. ഇപ്പോളവർ അതിന്റെ ട്രെയ്‌ലർ റിലീസ് ചെയ്യാൻ പോകുന്നു എന്ന് കേൾക്കുന്നു. റിലീസ് ആവട്ടെ, കാണിച്ചുകൊടുക്കാം ഞാനാരാണെന്ന്... ഞാനെന്താണെന്ന്,'' എന്ന് അഡ്വ. മുകുന്ദൻ ഉണ്ണി, കോർപറേറ്റ് ലോയർ, എന്ന സോഷ്യൽ മീഡിയ അക്കൗണ്ടിലൂടെ പോസ്റ്റ് വന്നിരുന്നു.

പലതരത്തിലുള്ള പ്രെമോഷൻസ് കണ്ടിട്ടുണ്ടെങ്കിലും ഇത്തരത്തിലൊന്ന് ആദ്യമായിട്ടാണെന്നാണ് സോഷ്യൽ മീഡിയ പറയുന്നത്.ഗോദ, ആനന്ദം, ഉറിയടി, കുരങ്ങ് ബൊമ്മൈ എന്നീ ചിത്രങ്ങളുടെ എഡിറ്ററാണ് അഭിനവ് സുന്ദർ.അഡ്വക്കേറ്റ് മുകുന്ദൻ ഉണ്ണിയായി വിനീത് ശ്രീനിവാസൻ ആണ് ചിത്രത്തിൽ എത്തുന്നത്. ചിത്രം നവംബർ 11 ന് റിലീസ് ചെയ്യും.