'നൻപകലി'നു മുൻപേ 'തങ്കം' എത്തും; രണ്ട് ചിത്രങ്ങളുടെയും ഒടിടി റിലീസ് തീയതി പ്രഖ്യാപിച്ചു; ചിത്രമെത്തുക ആമസോണിലും നെറ്റ്ഫ്‌ളിക്‌സിലുമായി
മലയാളത്തിൽ നിന്നുള്ള ചില ശ്രദ്ധേയ സിനിമകളുടെ ഒടിടി റിലീസ് തീയതികൾ പ്രഖ്യാപിച്ചിരിക്കുകയാണ്. ലിജോ ജോസ് പെല്ലിശ്ശേരിയുടെ മമ്മൂട്ടി ചിത്രം നൻപകൽ നേരത്ത് മയക്കത്തിനു പിന്നാലെ മറ്റൊരു ചിത്രത്തിന്റെ ഒടിടി റിലീസും പ്രഖ്യാപിക്കപ്പെട്ടു. ശ്യാം പുഷ്‌കരന്റെ തിരക്കഥയിൽ നവാഹതനായ സഹീദ് അറാഫത്ത് സംവിധാനം ചെയ്ത തങ്കം എന്ന ചിത്രത്തിന്റെ ഒടിടി റിലീസ് ആണ് പ്രഖ്യാപിക്കപ്പെട്ടിരിക്കുന്നത്. നൻപകൽ ഫെബ്രുവരി 23 ന് നെറ്റ്ഫ്‌ളിക്‌സിലൂടെയാണ് എത്തുന്നതെങ്കിൽ തങ്കത്തിന്റെ സ്ട്രീമിങ് ആമസോൺ പ്രൈം വീഡിയോയിലൂടെ ഫെബ്രുവരി 20 ന് ആണ്.
ഭാവന സ്റ്റുഡിയോസിന്റെ ബാനറിൽ ദിലീഷ് പോത്തൻ, ഫഹദ് ഫാസിൽ, ശ്യാം പുഷ്‌ക്കരൻ എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്. വിനീത് ശ്രീനിവാസനും ബിജു മേനോനുമാണ് ചിത്രത്തിൽ പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്. അപർണ്ണ ബാലമുരളി, ഗിരീഷ് കുൽക്കർണി, കൊച്ചുപ്രേമൻ, വിനീത് തട്ടിൽ, ശ്രീകാന്ത് മുരളി തുടങ്ങി നിരവധി താരങ്ങളാണ് 'തങ്ക'ത്തിൽ പ്രധാന വേഷങ്ങളിലുള്ളത്. കൂടാതെ നിരവധി മറാത്തി, ഹിന്ദി, തമിഴ് അഭിനേതാക്കളും സിനിമയിലുണ്ട്. ഒരു സെക്കൻഡ് ക്ലാസ് യാത്ര, ഒരു മുത്തശ്ശി ഗദ തുടങ്ങിയ സിനിമകൾക്ക് ശേഷം വിനീതും അപർണയും ഒന്നിച്ചഭിനയിക്കുന്ന സിനിമ കൂടിയാണ് തങ്കം. ഈ രണ്ട് സിനിമകളിൽ നിന്നും ഏറെ വ്യത്യസ്തമായൊരു വേഷത്തിലാണ് വിനീത് ചിത്രത്തിലെത്തുന്നതെന്നതും പ്രത്യേകതയാണ്.
ഗൗതം ശങ്കറാണ് ചിത്രത്തിന്റെ ക്യാമറ. ബിജി ബാൽ ആണ് സംഗീതം, എഡിറ്റിങ് കിരൺ ദാസും കലാ സംവിധാനം ഗോകുൽ ദാസും സൗണ്ട് ഡിസൈൻ ഗണേശ് മാരാരും മേക്കപ്പ് റോണക്‌സ് സേവ്യറും നിർവ്വഹിച്ചിരിക്കുന്നു. ആക്ഷൻ സുപ്രീം സുന്ദർ, ജോളി ബാസ്റ്റിൻ, വസ്ത്രാലങ്കാരം മഷർ ഹംസ, പ്രൊഡക്ഷൻ കൺട്രോളർ ബിനു മണമ്പൂർ, സൗണ്ട് മിക്‌സിങ് തപസ് നായക്, കോ പ്രൊഡ്യൂസേഴ്സ് രാജൻ തോമസ്, ഉണ്ണിമായ പ്രസാദ്, വിഎഫ്എക്‌സ് എഗ് വൈറ്റ് വിഎഫ്എക്‌സ്, ഡി ഐ കളർ പ്ലാനറ്റ് സ്റ്റുഡിയോസ്, എക്‌സിക്യൂട്ടീവ് പ്രൊഡ്യൂസേഴ്സ് ബെന്നി കട്ടപ്പന, ജോസ് വിജയ്, കോ ഡയറക്ടർ പ്രിനീഷ് പ്രഭാകരൻ.
