ഫസ്റ്റ്‌ലുക്ക് ഏപ്രിൽ 14 ന് എത്തും; ഈസ്റ്റർ ദിനത്തിൽ പുതിയ അപ്‌ഡേഷനുമായി മലക്കോട്ടൈ വാലിബൻ ടീം; അനൗൺസ്‌മെന്റ് പോസ്റ്റർ പങ്കുവെച്ച് താരങ്ങൾ
സിനിമപ്രേമികൾ ഏറെ കാത്തിരിക്കുന്ന ചിത്രമാണ് ലിജോ ജോസ് പെല്ലിശ്ശേരി മോഹൻലാൽ ടീമിന്റെ 'മലൈക്കോട്ടൈ വാലിബൻ'. ചിത്രവുമായി ബന്ധപ്പെട്ട് വരുന്ന ഓരോ അപ്ഡേഷനും വലിയ സ്വീകാര്യതയാണ് ആരാധകർക്കിടയിൽ നിന്നും കിട്ടുന്നത്. ചിത്രീകരണത്തിന്റെ ഒരു ഷെഡ്യൂൾ രാജസ്ഥാനിൽ പൂർത്തിയായതായി മോഹൻലാൽ അടുത്തിടെ അറിയിച്ചിരുന്നു. ലൊക്കെഷനിൽ നിന്ന് സംവിധായകൻ ലിജോ സംസാരിക്കുന്ന ഒരു വീഡിയോയും ഇതിന് പിന്നാലെ വൈറലായിരുന്നു.
ഇപ്പോഴിത ഈസ്റ്റർ ദിനത്തിൽ ചിത്രത്തവുമായി ബന്ധപ്പെട്ട ഒരു അപ്ഡേഷൻ പുറത്ത് വിട്ടിരിക്കുകയാണ് അണിയറ പ്രവർത്തകരും താരങ്ങളും.'മലൈക്കോട്ടെ വാലിബൻ' എന്ന ചിത്രത്തിന്റെ ഫസ്റ്റ് ലുക്ക് പോസ്റ്റർ 14ന് പുറത്തുവിടും എന്നാണ് മോഹൻലാൽ അറിയിച്ചിരിക്കുന്നത്.ഫേസ്‌ബുക്കിലൂടെയാണ് ഈ വാർത്ത താരം പങ്കുവെച്ചത്.ഇതിന് പിന്നാലെ അണിയറ പ്രവർത്തകരും വിവരം സമൂഹമാധ്യമങ്ങളിൽ പങ്കുവെച്ചിട്ടുണ്ട്.
ചുരുളിക്ക് ശേഷം മധു നീലകണ്ഠൻ ആണ് ചിത്രത്തിന്റെ ഛായാഗ്രഹണം.പി എസ് റഫീക്ക് ആണ് ചിത്രത്തിന്റെ തിരക്കഥ ഒരുക്കിയിരിക്കുന്നത്.ചിത്രത്തിന്റെ ഒരു ഷെഡ്യൂൾ അടുത്തിടെ മോഹൻലാൽ രാജസ്ഥാനിൽ പൂർത്തിയാക്കിയിരുന്നു. 77 ദിവസം നീണ്ട ചിത്രീകരണമായിരുന്നു രാജസ്ഥാനിൽ നടന്നിരുന്നത്. ചിത്രത്തിന്റെ രണ്ടു ഘട്ടങ്ങൾ പൂർത്തിയാക്കി അവസാന ഘട്ട ചിത്രീകരണം മേയിൽ ചെന്നൈയിലെ ഗോകുലം സ്റ്റുഡിയോസിലാണ് നടക്കുന്നത്. ഒരുപാട് പ്രതിസന്ധികൾ തരണം ചെയ്ത്, ബുദ്ധിമുട്ടുകൾ ഉണ്ടായ ഘട്ടത്തിലും ഒത്തൊരുമയോടെ ഷൂട്ടിങ്ങിന്റെ അവസാനഘട്ടം വരെ സഹകരിച്ച അണിയറപ്രവർത്തകർക്ക് ലിജോ ജോസ് പെല്ലിശ്ശേരി നന്ദിയും പറഞ്ഞിരുന്നു.
പ്രശാന്ത് പിള്ളയാണ് ചിത്രത്തിന് വേണ്ടി സംഗീതം ഒരുക്കുന്നത്. ഒരു മിത്ത് പ്രമേയമാക്കി ഒരുങ്ങുന്ന പീരിയഡ് ഡ്രാമയാണ് ചിത്രം. ചിത്രത്തിൽ ഗുസ്തിക്കാരന്റെ വേഷത്തിലാണ് മോഹൻ ലാൽ എത്തുന്നത്. ഷിബു ബേബി ജോണിന്റെ ജോൺ ആൻഡ് മേരി ക്രിയേറ്റീവിനൊപ്പം മാക്‌സ് ലാബ് സിനിമാസ്, സെഞ്ച്വറി ഫിലിംസ് എന്നിവരും 'മലൈക്കോട്ടൈ വാലിബന്റെ' നിർമ്മാണ പങ്കാളികളാണ്. മറാഠി നടി സൊണാലി കുൽക്കർണി, ഹരീഷ് പേരാടി, മണികണ്ഠൻ ആചാരി, രാജീവ് പിള്ള, ഡാനിഷ്, ഹരിപ്രശാന്ത് വർമ, സുചിത്ര നായർ തുടങ്ങിയവർ 'മലൈക്കോട്ടൈ വാലിബനി'ൽ വേഷമിടുന്നുണ്ട്.
