കാക്കക്കൂട്ടിൽ മുട്ടയിടുന്ന കുയിലിനെക്കുറിച്ച് നമ്മൾ കുഞ്ഞുന്നാൾ മുതലേ കേൾക്കുന്നതാണ്. മറ്റു പക്ഷിക്കൂടുകളിൽ അതിക്രമിച്ചു കയറി മുട്ടയിടുക മാത്രമല്ല കുയിലുകൾ ചെയ്യുക. തരം കിട്ടിയാൽ കൂട്ടത്തിൽ ആ പക്ഷികളുടെ കൂട്ടിലുള്ള മുട്ടകൾ നശിപ്പിക്കുകയും ചെയ്യും. എന്നാൽ വിരിഞ്ഞു വരുന്ന കുയിലിന്റെ കുഞ്ഞുങ്ങൾ പോലും കൊടും ക്രൂരന്മാരാണെന്ന് എത്ര പേർക്ക് അറിയാം. തൂവൽ പോലും മുളയ്ക്കാത്ത കുയിൽ കുഞ്ഞിന്റെ ക്രൂരതയുടെ ദൃശ്യമാണ് ഇപ്പോൾ സമൂഹമാധ്യമങ്ങളിൽ നിറയുന്നത്.

വിരിഞ്ഞിറങ്ങിയ തൂവലുപോലുമില്ലാത്ത കുയിലിന്റെ കുഞ്ഞ് കൂട്ടിലുള്ള ബാക്കി മുട്ടകൾ താഴേക്കെറിഞ്ഞു കളയുന്ന ദൃശ്യമാണിത്. കാലും കഴുത്തുമൊന്നും ഉറയ്ക്കാത്ത കുഞ്ഞ് മുട്ട താങ്ങിയെടുത്തു കൂടിനുവെളിയിലേക്ക് കളയുന്നത് ദൃശ്യത്തിൽ കാണാം. ആർക്കും അമ്പരപ്പ് തോന്നുന്നതാണ് ഈ വീഡിയോ. മൂന്ന് മുട്ടകളാണ് ആ കൂട്ടിലുണ്ടായിരുന്നത്. മൂന്ന് മുട്ടകളും താങ്ങിയെടുത്ത് ശ്രമകരമായി അവ പുറത്തേക്ക് കളയുകയായിരുന്നു ഈ പക്ഷിക്കുഞ്ഞ്.

വിരിഞ്ഞിറങ്ങുന്നതിനു മുൻപ് തന്നെ കൂടെയുള്ള കുഞ്ഞുങ്ങളെ അതിവിദഗ്ധമായി ഇല്ലാതാക്കുന്ന കുയിലിന്റെ കുഞ്ഞ് നിസ്സാരക്കാരനല്ല. ഐഎഫ്എസ് ഉദ്യോഗസ്ഥനായ പ്രവീൺ അംഗുസാമിയാണ് ഈ ദൃശ്യം ട്വിറ്ററിലൂടെ പങ്കുവച്ചത്.