പൂജാപന്തലിൽ യുവാവിന്റെ 'തീക്കളി'; വായിലേക്ക് പകരുന്ന എണ്ണ പന്തത്തിലേക്ക് തുപ്പി തീയുയർത്താൻ ശ്രമം; തീപടർന്നത് താടിയിലേക്ക്; ഇൻസ്റ്റഗ്രാമിലെ വീഡിയോ കണ്ടത് ഒരുകോടിയിലേറെ പേർ
ന്യൂഡൽഹി: തനിക്കു ചുറ്റും അണിനിരന്ന ആളുകളെ അമ്പരപ്പിക്കാൻ ഒരു യുവാവ് നടത്തിയ സാഹസികപ്രകടനം അപകടത്തിന് വഴിമാറിയതിന്റെ വീഡിയോയാണ് കുറച്ചുദിവസങ്ങളായി ഇന്റർനെറ്റിൽ വൈറൽ. സംഭവം നടന്ന സ്ഥലത്തേക്കുറിച്ച് വ്യക്തതയില്ലെങ്കിലും ഒക്ടോബർ ആറിന് ഇൻസ്റ്റഗ്രാമിൽ പോസ്റ്റ് ചെയ്ത വീഡിയോ ഇതിനോടകം കണ്ടത് ഒരു കോടിയിലേറെപ്പേരാണ്.
ഒരു പൂജാപന്തലിൽ നടന്ന 'തീക്കളി'യാണ് സംഭവം. പന്തലിലൊരുക്കിയ പ്ലാറ്റ്ഫോമിന് മുകളിൽ നിൽക്കുന്ന യുവാവാണ് പ്രകടനം നടത്തുന്നത്. യുവാവിന്റെ കയ്യിൽ ചെറിയൊരു തീപ്പന്തവുമുണ്ട്. യുവാവ് ആവശ്യപ്പെടുന്നതിനനുസരിച്ച് ഒരു കുപ്പിയിൽ പെട്രോളോ ഡീസലോ മറ്റൊരാൾ കൈമാറി.
കുപ്പിയിൽ നിന്ന് യുവാവ് എണ്ണ വായിലേക്ക് പകരുന്നതും പന്തത്തിലേക്ക് തുപ്പി തീയുയർത്താൻ ശ്രമിക്കുന്നതും വീഡിയോയിൽ കാണാം. പക്ഷെ, പ്രതീക്ഷിച്ചതിനു വിരുദ്ധമായി യുവാവിന്റെ താടിയിലേക്ക് തീപടരുന്നതും ചുറ്റുമുള്ളവർ ഇടപെട്ട് യുവാവിന്റെ മുഖത്തടിച്ചും മറ്റും തീയണയ്ക്കുന്നതും കാണാം.
രവി പടീദാർ എന്ന ഉപയോക്താവാണ് വീഡിയോ ഇൻസ്റ്റഗ്രാമിൽ ഷെയർ ചെയ്തത്. വീഡിയോയ്ക്കൊപ്പം ബാക്ഗ്രൗണ്ടിൽ ഇയാൾ നൽകിയിരിക്കുന്ന ഗാനവും രസകരമാണ്. ദിൽ എന്ന ആമിർഖാൻ ചിത്രത്തിലെ ഓ പ്രിയ പ്രിയ എന്ന ഗാനത്തിലെ 'ജീ ചാഹ്താ ഹൈ ഖുദ് കോ ജലാ ദൂം, മൗത് കോ അപ്നെ ദിൽ സേ ലഗാ ലൂം' (ഞാൻ സ്വയം എരിക്കാൻ കൊതിക്കുകയാണ്, മരണത്തെ എന്റെ ഹൃദയം കൊണ്ട് സ്വീകരിക്കുകയാണ്) എന്നീ വരികളാണ് വീഡിയോയ്ക്കൊപ്പമുള്ളത്.
