സമുദ്രത്തിന്റെ വിസ്മയങ്ങൾ ഒളിപ്പിച്ച് അവതാർ 2; ബ്രഹ്‌മാണ്ഡ ചിത്രത്തിന്റെ ട്രെയിലർ എത്തി; തിയേറ്ററുകളിൽ ചിത്രം എത്തുക ഡിസംബർ 16ന്
ലോകസിനിമാ ചരിത്രത്തിൽ തന്നെ ഏറെ വിസ്മയമായ സിനിമയാണ് ജെയിംസ് കാമറൂൺ ഒരുക്കിയ 'അവതാർ'. അവതാറിന്റെ രണ്ടാം ഭാഗത്തിനായി ഏവരും കാത്തിരിക്കുകയാണ്.
സിനിമാപ്രേമികൾ ഏറെ നാളായി കാത്തിരിക്കുന്ന ചിത്രത്തിന്റെ ട്രെയിലർ എത്തി. ജെയിംസ് കാമറൂൺ സംവിധാനം ചെയ്ത എക്കാലത്തെയും മികച്ച ബ്രഹ്‌മാണ്ഡ ചിത്രമാകും അവതാറിന്റെ രണ്ടാംഭാഗമെന്നാണ് വിലയിരുത്തൽ. 'അവതാർ - ദ വേ ഓഫ് വാട്ടർ' ഈ വർഷം ഡിസംബർ 16നാണ് ചിത്രം റിലീസ് ചെയ്യുന്നത്.
സാം വർതിങ്ടൺ, സോ സൽദാന, സ്റ്റീഫൻ ലാംഗ്, മാട്ട് ജെറാൾഡ്, ക്ലിഫ് കർടില്, കേറ്റ് വിൻസ്ലെറ്റ് എന്നിവരാണ് പ്രധാന അഭിനേതാക്കൾ .അവതാറിന്റെ ആദ്യഭാഗം കാടിന്റെ പശ്ചാത്തലത്തിലാണെങ്കിൽ ഇക്കുറി സമുദ്രത്തിന്റെ വിസ്മയങ്ങളാണ് ചിത്രത്തിൽ ഒളിപ്പിച്ചിരിക്കുന്നത്. സമുദ്രവും പരിസരവും കേന്ദ്രീകരിച്ചാണ് ചിത്രത്തിന്റെ അവതരണം. ഈ ചിത്രത്തിന്റെ തുടർച്ചായായി മൂന്ന് ഭാഗങ്ങളും വരും വർഷങ്ങളിൽ എത്തുമെന്നാണ് റിപ്പോർട്ട്.
'അവതാർ 2' ടീസർ ലീക്കായതാണെന്നാണ് സോഷ്യൽമീഡിയയിൽ നേരത്തെ ചർച്ചയായിരുന്നു. എച്ച് ഡി ക്വാളിറ്റിയുള്ള ടീസറാണ് നിർമ്മാണ കമ്പനിയുടെ ഔദ്യോഗിക ചാനലിലൂടെയല്ലാതെ സോഷ്യൽമീഡിയയിലെത്തിയിരിക്കുന്നത്. ഇതിന് പിന്നാലെ യഥാർഥ ചാനലിലൂടെ ടീസർ അപ്ലോഡ് ചെയ്യുകയുമുണ്ടായി.
ലൈറ്റ്‌സ്റ്റോം എന്റർടെയ്ന്മെന്റ്‌സ്, ട്വന്റിയത് സെഞ്ച്വറി സ്റ്റുഡിയോസ് ബാനറിൽ ജെയിംസ് കാമറൂണും ജോൺ ലണ്ടാവുവും ചേർന്ന് നിർമ്മിച്ചിരിക്കുന്ന സിനിമയുടെ ട്രെയിലർ ഡോക്ടർ സ്‌ട്രെയിഞ്ച് ഇൻ ദ മൾട്ടിവേഴ്‌സ് ഓഫ് മാഡ്‌നെസ് എന്ന സിനിമയുടെ റിലീസിനിടെയാണ് തിയേറ്ററുകളിൽ അടുത്തിടെ പ്രദർശിപ്പിച്ചത്.
2009-ലാണ് അവതാർ ആദ്യഭാഗം പുറത്തിറങ്ങിയത്. അന്ന് 23.7 കോടി ഡോളർ ബജറ്റിലൊരുങ്ങിയ ചിത്രം 284.72 കോടി ഡോളറാണ് ബോക്‌സോഫീസ് കളക്ഷൻ നേടിയത്.
