ഹൃദയം സിനിമയുടെ നിർമ്മാതാവ് വിശാഖ് സുബ്രഹ്മണ്യത്തിന്റെ വിവാഹമായിരുന്നു കഴിഞ്ഞ ദിവസം. മോഹൻലാൽ, ശ്രീനിവാസൻ, വിനീത് ശ്രീനിവാസൻ, കല്യാണി പ്രിയദർശൻ തുടങ്ങി സിനിമയിലെ വലുതും ചെറുതുമായ താരങ്ങളും അണിയറ പ്രവർത്തകരുമെല്ലാം വിവാഹത്തിന് എത്തിയിരുന്നു. എന്നാൽ ഒരാൾ മാത്രം അക്കൂട്ടത്തിലില്ലായിരുന്നു. ഹൃദയം സിനിമയിലെ നായകനായിരുന്ന പ്രണവ് മോഹൻലാൽ. പ്രണവിന്റെ അസാന്നിധ്യം എല്ലാവരും ശ്രദ്ധിക്കുകയും പ്രണവ് എവിടെ എന്ന് എല്ലാവരും ചോദിക്കുകയും ചെയ്തിരുന്നു.
ഹൃദയം സിനിമയുടെ അണിയറ പ്രവർത്തകർ വിവാഹവേദി ആഘോഷമാക്കിയപ്പോഴും പ്രണവിനെ മാത്രം അവിടെ കണ്ടില്ല. മോഹൻലാലും ഭാര്യ സുചിത്രയും വിവാഹച്ചടങ്ങിലും പിന്നീട് നടന്ന റിസപ്ഷനിലും സജീവ സാന്നിധ്യമായിരുന്നു. ഇപ്പോഴിതാ പ്രണവ് എവിടെയെന്ന ആരാധകരുടെ സംശയത്തിന് മറുപടി പറയുകയാണ് വിശാഖ് സുബ്രഹ്മണ്യൻ.
പ്രണവ് ഒരു യാത്രയിലാണ്. വിവാഹനിശ്ചയത്തിന് അവൻ എത്തിയിരുന്നു. തായ്ലൻഡിൽ നിന്നും അതിൽ പങ്കെടുക്കാനായി മാത്രം പ്രണവ് വന്നു. അന്നു പറഞ്ഞിരുന്നു, ഈ വർഷം മുഴുവൻ യാത്രയ്ക്കായി മാറ്റിവച്ചിരിക്കുകയാണെന്ന്. അടുത്ത വർഷം അഭിനയത്തിനായി തയ്യാറെടുക്കുകയാണെന്നും പ്രണവ് പറഞ്ഞതായി വിശാഖ് ഓർത്തെടുത്തു.
