മമ്മൂട്ടി നായകനായി എത്തുന്ന ജിയോ ബേബി ചിത്രമാണ് കാതൽ. കാതലിന്റെ ലൊക്കേഷനിൽവെച്ച് പ്രിയ താരം മമ്മൂട്ടി തന്റെ മകളെ കളിപ്പിക്കുന്ന വീഡിയോ പങ്കുവെച്ച് എത്തിയിരകിക്കുകയാണ് സിൻസി അനിൽ എന്ന യുവതി. മമ്മൂട്ടി ആരാണെന്ന് അവൾക്കിപ്പോൾ അറിയില്ല, നാളെ അവൾ ഈ വീഡിയോ അഭിമാനത്തോടെ കാണുമെന്ന പ്രതീക്ഷ പങ്കുവച്ചാണ് സിൻസി അനിൽ ഫേസ്‌ബുക്കിൽ ഈ വീഡിയോ പങ്കുവെച്ചത്.
മമ്മൂട്ടി-ജ്യോതിക ചിത്രം കാതലിന്റെ ലൊക്കേഷനിൽ അമ്മ സിൻസി അനിലിനോടൊപ്പം എത്തിയതായിരുന്നു ഇവ മറിയം. തോളിൽ ഒരു കൊച്ചു ബാഗും തൂക്കി മമ്മൂട്ടിയുടെ കൈയിൽപ്പിടിച്ച് കളിക്കുകയും സംസാരിക്കുകയുമാണ് മിടുക്കി. മിഠായി കൊടുക്കുന്നതും മമ്മൂട്ടിയോട് ചേർന്നുനിന്ന് കുശലം പറയുന്നതും വീഡിയോയിൽ കാണാം. ലൊക്കേഷനിൽനിന്നെടുത്ത വീഡിയോയാണ് വൈകാരികമായ കുറിപ്പോടെ അമ്മ സിൻസി അനിൽ പങ്കുവെച്ചത്.
കൊച്ചി ഭവൻസിലെ എൽ.കെ.ജി. വിദ്യാർത്ഥിയാണ് ഇവ.
സിൻസി അനിൽ പങ്കുവെച്ച വീഡിയോയും കുറിപ്പും:
ഇന്നെന്റെ മകൾക്കു അറിയില്ല... അവൾ ചേർന്ന് നിൽക്കുന്നതും ഓടി ചെന്ന് ചെവിയിൽ സ്വകാര്യം പറയുന്നതും അവളെ തലോടുന്നതും ചിരിപ്പിക്കുന്നതും ആയ ആ വ്യക്തിത്വം ആരാണെന്നും എന്താണെന്നും...
നാളെ അവളിത് അഭിമാനത്തോടെ കാണും..ജീവിതയാത്രയിൽ ഒരു നിധി പോലെ സൂക്ഷിക്കും...
ഈ വീഡിയോ പകർത്തുമ്പോൾ എനിക്ക് അവളുടെ പ്രായത്തിലേക്ക് ഒന്ന് മടങ്ങി പോകാനായിരുന്നുവെങ്കിലെന്നു ആത്മാർഥമായി ആഗ്രഹിച്ചു പോയി...
