അർജന്റീനയുടെ ഓരോ ഗോളിലും സന്തോഷിച്ച് മമ്മൂട്ടി; ഖത്തറിലെ മമ്മൂക്കയുടെ ആവേശം ഏറ്റെടുത്ത് സോഷ്യൽ മീഡിയ: വൈറൽ വീഡിയോ കാണാം
ലോകകപ്പ് ഫൈനൽ മത്സരം കാണാൻ ഖത്തറിലെത്തിയ മമ്മൂട്ടിയുടെ ചിത്രങ്ങളും ആരാധക ശ്രദ്ധനേടിയിരുന്നു. മമ്മൂക്കയുടെ ഇഷ്ട ടീം അർജന്റീനയായിരുന്നു. ചരിത്രത്തിലെ തന്നെ ഏറ്റവും വലിയ പോരാട്ടഫൈനൽ ആകാംക്ഷയോടെയും ആവേശത്തോടെയും വീക്ഷിക്കുന്ന മമ്മൂട്ടിയുടെ വിഡിയോ ആണ് ഇപ്പോൾ സമൂഹമാധ്യമങ്ങളിൽ വൈറലായിരിക്കുന്നത്.
ആർജെ സൂരജ് ആണ് ലോകകപ്പ് വേദിയിൽ നിന്നുമുള്ള മെഗാ സ്റ്റാറിന്റെ വിഡിയോ പങ്കുവച്ചിരിക്കുന്നത്. അർജന്റീന ഓരോ ഗോളടിക്കുമ്പോഴും സന്തോഷിക്കുന്ന, മുഖത്ത് വിവിധ ഭാവങ്ങൾ മിന്നിമറയുന്ന മമ്മൂട്ടിയെ വിഡിയോയിൽ കാണാം.
''അർജന്റീന നേടിയ നിമിഷം മമ്മൂക്കയുടെ ആവേശം. 36 വർഷത്തെ കാത്തിരിപ്പ്.. ഒടുവിൽ സ്വന്തം ഖത്തറിൽ പ്രിയപ്പെട്ട അർജന്റീന കപ്പെടുക്കുന്ന നിമിഷം.. കൂടെ മത്സരം കാണാൻ ആവേശത്തോടെ പ്രിയപ്പെട്ട മമ്മൂക്ക. ഇതിൽപരം ഒരു സന്തോഷ നിമിഷം ഈ വർഷം ഇനിയുണ്ടാവാൻ ഇടയില്ല. ഖത്തറും മെസ്സിയും അർജന്റീനയും ചരിത്രം കുറിച്ചു.''വിഡിയോ പങ്കുവച്ച് സൂരജ് കുറിച്ചു.
