നടൻ ടൊവിനോ തോമസിന്റെ പിറന്നാൾ ദിനമായിരുന്നു ഇന്നലെ.താരത്തിന്റെ ചിത്രം പങ്കുവെച്ച് താരങ്ങളടക്കം പിറന്നാൾ ആശംസകളുമായി സോഷ്യൽ മീഡിയ കയ്യടക്കി. അക്കൂട്ടത്തിൽ ടൊവിനോയുടെ ഏറ്റവും രസകരമായ ചിത്രം പങ്കുവച്ച് പിറന്നാൾ ആശംസകൾ നേർന്നിരിക്കുകയാണ് സുഹൃത്തും സംവിധായകനുമായ മാത്തുക്കുട്ടി. ടൊവിനോ ഭാവിയിൽ പ്രശസ്തനാകുമ്പോൾ ഇടാനായി മാറ്റിവച്ച ചിത്രമാണിതെന്നും വിചിത്രമായ രീതിയിൽ കിടന്നുറങ്ങുന്ന സൂപ്പർഹീറോയെയാണ് ചിത്രത്തിൽ കാണുന്നതെന്നും മാത്തുക്കുട്ടി പറയുന്നു.
കസേരയിൽ കാൽ കയറ്റിവെച്ച് വെറും നിലത്ത് കിടന്നുറങ്ങുന്ന ടൊവിനോയുടെ ചിത്രമാണ് മാത്തുക്കുട്ടി സോഷ്യൽ മീഡിയയിൽ പോസ്റ്റ് ചെയ്തത്. വർക്ക് ഔട്ട് ചെയ്തോ, ക്ഷീണം കൊണ്ടോ നിലത്തുകിടന്നുറങ്ങുകയാണ് ടൊവിനോ തോമസ്. ഈ നേരം ടൊവിനോ പോലും അറിയാതെ പകർത്തിയതാണ് ഈ ചിത്രം എന്ന് ഒറ്റനോട്ടത്തിൽ കണ്ടാൽ വ്യക്തം.
''ഭാവിയിൽ നീ പ്രശസ്തനാകുമ്പോൾ ഇടാൻ വേണ്ടി എടുത്തുവച്ച ഫോട്ടോ. ഇനിയും വൈകിയാൽ ചിലപ്പോൾ പിടിച്ചാൽ കിട്ടാണ്ടാകും. കണ്ടതിൽ വച്ചേറ്റവും വിചിത്രമായ രീതിയിൽ കിടന്നുറങ്ങുന്ന സൂപ്പർഹീറോയ്ക്ക് ഹൃദയം നിറഞ്ഞ പിറന്നാൾ ആശംസകൾ.'' എന്നാണ് മാത്തുക്കുട്ടി ചിത്രത്തിനൊപ്പം കുറിച്ചത്.
ചെറുപ്പം മുതലേ അടുത്തസുഹൃത്തുക്കളാണ് ടൊവിനോയും മാത്തുക്കുട്ടിയും. സിനിമാ രംഗത്ത് എത്തുന്നതിനു മുമ്പ് തന്നെ ഇവർ കൂട്ടുകാരാണ്. സിനിമയിൽ സജീവമാകുന്നതിനു മുമ്പേ ഒരു റൂമിലായിരുന്നു ഇരുവരും താമസിച്ചിരുന്നത്.
ഈ വർഷവും വമ്പൻ സിനിമകളാണ് ടൊവിനോയെ നായകനാക്കി മലയാളത്തിൽ ഒരുങ്ങുന്നത്. കരിയറിലെ ആദ്യ ട്രിപ്പിൾ റോളിൽ അഭിനയിക്കുന്ന അജയന്റെ രണ്ടാം മോഷണമാണ് ഇതിൽ ഏറ്റവും വലുപ്പമേറിയ സിനിമ.
