ഇസ്‌ലാമബാദ്: പാക്കിസ്ഥാൻ വെറ്ററൻ ക്രിക്കറ്റ് താരം ശുഐബ് മാലിക്കുമായുള്ള അഭ്യൂഹങ്ങൾക്ക് വിരാമമിട്ട് നടി ആയിഷ ഒമർ. വിവാഹിതരോട് താത്പര്യമില്ലെന്നും ശുഐബ് മാലിക്കുമായി തനിക്ക് ബന്ധമൊന്നുമില്ലെന്നും നടി അറിയിച്ചു. പാക്കിസ്ഥാൻ മുൻ ക്രിക്കറ്റ് താരം ശുഐബ് അക്തറുമായുള്ള ചർച്ചയ്ക്കിടെയാണ് ഇക്കാര്യത്തിൽ ആയിഷ ആദ്യമായി പ്രതികരിച്ചത്.
ഇന്ത്യൻ ടെന്നിസ് താരം സാനിയ മിർസയും ഭർത്താവ് ശുഐബ് മാലിക്കും വിവാഹ ബന്ധം അവസാനിപ്പിക്കുകയാണെന്നു നേരത്തേ റിപ്പോർട്ടുകളുണ്ടായിരുന്നു. മാലിക്കിന് ആയിഷയുമായുള്ള ബന്ധമാണ് ഇതിനു പിന്നിലെന്നും അഭ്യൂഹങ്ങൾ പരന്നിരുന്നു. ഇതിനിടെയാണ് സത്യാവസ്ഥ വെളിപ്പെടുത്തി നടി എത്തിയിരിക്കുന്നത്. മാലിക്ക് നല്ല സുഹൃത്തു മാത്രമെന്ന് അടുത്തിടെ ആയിഷ ട്വീറ്റ് ചെയ്തു. വിവാഹം കഴിഞ്ഞതോ, ഉറപ്പിച്ചതോ ആയ പുരുഷന്മാരിൽ താൽപര്യമില്ലെന്ന് ആയിഷ, അക്തറുമായുള്ള ചർച്ചയ്ക്കിടെ വെളിപ്പെടുത്തി. എല്ലാവർക്കും തന്നെ അറിയാമെന്നും ഇക്കാര്യം പറയാതെ തന്നെ മനസ്സിലാകുമെന്നും ആയിഷ പറഞ്ഞതായി ഒരു ദേശീയ മാധ്യമം റിപ്പോർട്ട് ചെയ്തു.
വിവാഹ മോചന വാർത്തകളിൽ സാനിയ മിർസയോ, മാലിക്കോ ഇതുവരെ പ്രതികരിച്ചിട്ടില്ല. അതിനിടെ ഇരുവരും ചേർന്ന് അവതരിപ്പിക്കുന്ന 'ദ് മിർസ മാലിക് ഷോ'യ്ക്കു വേണ്ടി താരദമ്പതികൾ കരാറൊപ്പിടുകയും ചെയ്തു.
