ഹൈദരാബാദ്: രാജസ്ഥാൻ റോയൽസിലെ മലയാളി താരവും നായകനുമായ സഞ്ജു സാംസൺ പകർന്നു നൽകിയ 'കേരള സ്‌റ്റൈൽ' സഹതാരങ്ങൾ അനുകരിക്കുന്നത് ആദ്യമല്ല. കഴിഞ്ഞ സീസണിൽ മുണ്ടുടുത്ത ജോസേട്ടനെ കണ്ട് അമ്പരന്ന ആരാധകർക്ക് മുന്നിൽ വ്യത്യസ്തമായ മറ്റൊരു കാഴച സമ്മാനിക്കുകയാണ് യുസ്വേന്ദ്ര ചഹലും വെടിക്കെട്ട് വീരൻ ഷിമ്രോൻ ഹെറ്റ്മെയറും

'കീലേരി ചഹലിനെ' അവതരിപ്പിച്ച് ദിവസങ്ങൾക്കുള്ളിലാണ് ചഹൽ ആരാധകരുടെ മനസ് കീഴടക്കുന്നത്. അടിമുടി സഞ്ജു സാംസൺ മയമാണ് രാജസ്ഥാൻ റോയൽസിൽ ഇപ്പോൾ. ടീമിനെ ബാറ്റ് കൊണ്ടും നേതൃപാടവം കൊണ്ടും മുന്നിൽ നിന്ന് നയിക്കുന്ന നായകനായി സഞ്ജു മാറിക്കഴിഞ്ഞു.

മലയാള നടൻ മാമുക്കോയയുടെ സംഭാഷണം റീൽസാക്കി സഞ്ജുവും യുസ്വേന്ദ്ര ചഹലും അവതരിപ്പിച്ചത് ദിവസങ്ങൾക്ക് മുമ്പ് വൈറലായിരുന്നു. സമാനമായി ഇപ്പോൾ ഒരു ചിത്രം സാമൂഹ്യമാധ്യമങ്ങളിൽ ശ്രദ്ധിക്കപ്പെടുകയാണ്. 'കീലേരി ചഹൽ' ഇപ്പോൾ മുണ്ടുടുത്ത് ഇറങ്ങിയിരിക്കുന്നത് ആരാധക ശ്രദ്ധ നേടുന്നു.

രാജസ്ഥാൻ റോയൽസിന്റെ വെടിക്കെട്ട് വീരൻ ഷിമ്രോൻ ഹെറ്റ്മെയറും കഴിഞ്ഞ വർഷത്തെ പർപ്പിൾ ക്യാപ് വിന്നറായ യുസ്വേന്ദ്ര ചഹലും മുണ്ട് ഉടുത്ത് സഞ്ജുവിനൊപ്പം നിൽക്കുന്ന ചിത്രങ്ങളാണ് ഇപ്പോൾ ആരാധകരുടെ പ്രശംസ പിടിച്ചുപറ്റുന്നത്.

ഐപിഎൽ പതിനാറാം സീസണിലെ ആദ്യ മത്സരത്തിൽ ചഹൽ നാല് ഓവറിൽ 17 റൺസിന് നാല് വിക്കറ്റുമായി തിളങ്ങിയിരുന്നു. മായങ്ക് അഗർവാൾ, ഹാരി ബ്രൂക്ക്, ആദിൽ റഷീദ്, ഭുവനേശ്വർ കുമാർ എന്നിവരുടെ വിക്കറ്റുകളാണ് ചഹൽ വീഴ്‌ത്തിയത്. ഹെറ്റ്മെയർ 16 പന്തിൽ ഓരോ ഫോറും സിക്സറും സഹിതം പുറത്താവാതെ 22 റൺസും നേടി.

ഐപിഎൽ പതിനാറാം സീസണിന് മുന്നോടിയായി കേരള സ്‌റ്റൈലിൽ തഗ് വീഡിയോയുമായി സഞ്ജു സാംസണും യുസ്വേന്ദ്ര ചഹലും നേരത്തെ ഇൻസ്റ്റഗ്രാമിൽ രംഗത്തെത്തിയിരുന്നു. 'എന്നോട് കളിക്കാൻ ധൈര്യമുണ്ടേൽ വാടാ... എടാ ഞങ്ങളോട് രണ്ടാളോട് കളിക്കാൻ ആരുണ്ടടാ' എന്ന മാമുക്കോയയുടെ വിഖ്യാതമായ സിനിമാ സംഭാഷണത്തിന്റെ പശ്ചാത്തലത്തിലാണ് വീഡിയോയിൽ സഞ്ജുവും ചാഹലും പ്രത്യക്ഷപ്പെട്ടത്.

'കീലേരി ചഹൽ ടൗണിൽ' എന്ന തലക്കെട്ടോടെയാണ് സഞ്ജു സാംസൺ റീൽസ് ഇൻസ്റ്റഗ്രാമിൽ ഷെയർ ചെയ്തത്. കീലേരി ചഹലിനെ ആരാധകർ ഏറ്റെടുക്കുകയും വീഡിയോ വൈറലാവുകയും ചെയ്തിരുന്നു.

 

യുസ്വേന്ദ്ര ചഹൽഷിമ്രോൻ ഹെറ്റ്മെയർ

മറുനാടന്‍ മലയാളി

    മറുനാടന്‍ മലയാളി ബ്യൂറോ