കറാച്ചി: പാക്കിസ്ഥാൻ സൂപ്പർ ലീഗിൽ കറാച്ചി കിങ്‌സ് ഓൾറൗണ്ടറായ ഷൊയ്ബ് മാലിക്കിന്റെ പ്രകടനം കാണാനെത്തിയ ഭാര്യയും നടിയുമായ സന ജാവേദിനെ അധിക്ഷേപിച്ച് പാക് ആരാധകർ. മാലിക്കിന്റെ മുൻ ഭാര്യയും ഇന്ത്യൻ ടെന്നീസ് റാണിയുമായ സാനിയ മിർസയുടെ പേര് വിളിച്ചാണ് ഗ്യാലറിയിലുണ്ടായിരുന്ന ആരാധകർ സനയെ കളിയാക്കിയത്. കറാച്ചി കിങ്‌സും മുൾട്ടാൻ സുൽത്താനും തമ്മിലുള്ള മത്സരത്തിന് ശേഷം സന ജാവേദ് മൈതാനത്തിന് പുറത്തേക്ക് നടക്കുമ്പോഴായിരുന്നു സംഭവം.

സാനിയ മിർസയുടെ പേര് വിളിച്ച് അധിക്ഷേപിച്ച ആരാധകരെ സന രൂക്ഷമായി നോക്കുന്നത് വീഡിയോയിൽ കാണാം. വീഡിയോ സാമൂഹ്യമാധ്യമങ്ങളിൽ വൈറലാണ്. പിഎസ്എല്ലിൽ കറാച്ചി കിങ്‌സ് ടീമിന്റെ താരമാണ് 42 വയസ്സുകാരനായ മാലിക്. ആദ്യ മത്സരത്തിൽ തന്നെ താരം അർധ സെഞ്ചറി നേടിയെങ്കിലും, കറാച്ചി ടീം മുൾട്ടാൻ സുൽത്താൻസിനോടു തോൽവി വഴങ്ങി. മത്സരത്തിൽ 35 പന്തുകൾ നേരിട്ട മാലിക് 53 റൺസാണു നേടിയത്. ബൗണ്ടറി ലൈനിന് അപ്പുറത്ത് മാലിക്കിനെ പ്രോത്സാഹിപ്പിക്കുന്ന സനയുടെ ദൃശ്യങ്ങൾ സമൂഹമാധ്യമങ്ങളിൽ വൈറലായിരുന്നു.

മത്സരത്തിൽ ആദ്യം ബാറ്റു ചെയ്ത മുൾട്ടാൻ സുൽത്താൻസ് രണ്ടു വിക്കറ്റ് നഷ്ടത്തിൽ 185 റൺസെടുത്തു. മറുപടി ബാറ്റിങ്ങിൽ 130 റൺസെടുക്കാനേ കറാച്ചി കിങ്‌സിനു സാധിച്ചുള്ളൂ. ഈ വർഷം ജനുവരി 19ന് കറാച്ചിയിൽവച്ചായിരുന്നു മാലിക്കും സനയും വിവാഹിതരായത്. ഇന്ത്യൻ ടെന്നിസ് താരം സാനിയ മിർസയുമായുള്ള 14 വർഷം നീണ്ട വിവാഹ ജീവിതം അവസാനിപ്പിച്ച ശേഷമായിരുന്നു മാലിക്കിന്റെ മൂന്നാം വിവാഹം.

സാനിയ മിർസയുമായി പിരിഞ്ഞ ശേഷം പാക് നടി സന ജാവേദിനെ ഷൊയ്ബ് മാലിക് കല്യാണം കഴിക്കുകയായിരുന്നു. സമൂഹമാധ്യമങ്ങളിൽ വിവാഹ ചിത്രങ്ങൾ പോസ്റ്റ് ചെയ്താണ് വിവാഹ വിവരം മാലിക് ആരാധകരെ അറിയിച്ചത്. വിവാഹ വാർത്തക്ക് പിന്നാലെ ഇൻസ്റ്റഗ്രാമിൽ സന ജാവേദ് പ്രൊഫൈൽ പേര് സന ഷൊയ്ബ് മാലിക്ക് എന്നാക്കി. മാലിക്കിന്റെ മൂന്നാമത്തെയും സന ജാവേദിന്റെ രണ്ടാം വിവാഹവുമാണിത്. 2010ൽ ഇന്ത്യൻ ടെന്നീസ് താരം സാനിയ മിർസയുമായി ഷൊയ്ബ് വിവാഹിതനായിരുന്നു. ഈ വിവാഹത്തിൽ ഇവർക്ക് ഒരു കുട്ടിയുണ്ട്. അതേസമയം പാക് നടി സന ജാവേദിന്റെ രണ്ടാം വിവാഹമാണിത്. 2020ൽ പാക് ഗായകൻ ഉമൈർ ജസ്വാളിനെ സന വിവാഹം കഴിച്ചിരുന്നു.

സാനിയ മിർസ മുൻകൈ എടുത്ത് ഷൊയ്ബ് മാലിക്കിൽ നിന്ന് വിവാഹമോചനം നേടുകയായിരുന്നു. കുറച്ചു കാലമായി ഇരുവരും പിരിഞ്ഞാണ് താമസിച്ചിരുന്നതെങ്കിലും കഴിഞ്ഞ വർഷം ദുബായിൽ സാനിയയും മാലിക്കും മകൻ ഇഹ്‌സാന്റെ ജന്മദിനം ആഘോഷിക്കാനായി ഒരുമിച്ചപ്പോൾ ഇരുവരും തമ്മിലുള്ള പ്രശ്‌നങ്ങൾ അവസാനിച്ചുവെന്നായിരുന്നു ആരാധകർ കരുതിയത്. എന്നാൽ ഇതിനിടെ പുതിയ വിവാഹവാർത്ത മാലിക് ആരാധകരെ അറിയിക്കുകയായിരുന്നു.