'ഭയങ്കര ചലഞ്ചിങ് സിനിമ; അത് പൂർണ്ണമായും ഒരു ലിജോ സിനിമയാകും'; ലിജോ- മോഹൻലാൽ പ്രോജക്റ്റിനെക്കുറിച്ച് പൃഥ്വിരാജ് ; ഒരു താരം അഭിനേതാവ് എന്നീ നിലകളിലൊക്കെ ഒരു പുതുമ കൊണ്ടുവരാൻ ലാലേട്ടനും ശ്രമിക്കുമെന്നാണ് പ്രതീക്ഷയെന്നും പൃഥ്വിരാജ്

തിരുവനന്തപുരം: മലയാള സിനിമയിൽ നിന്നുള്ള പുതിയ പ്രഖ്യാപനങ്ങളിൽ പ്രേക്ഷകർ ഏറെ ആവേശത്തോടെ ഏറ്റെടുത്ത ഒന്നായിരുന്നു ലിജോ ജോസ് പെല്ലിശ്ശേരി മോഹൻലാലിനെ നായകനാക്കി സംവിധാനം ചെയ്യുന്ന ചിത്രം.ഒക്ടോബർ 25 ന് ഔദ്യോഗികമായി പ്രഖ്യാപിക്കപ്പെട്ട ഈ പ്രോജക്റ്റിനെക്കുറിച്ച് മറ്റു വിശദാംശങ്ങളൊന്നും അണിയറക്കാർ പുറത്തുവിട്ടിട്ടില്ല.

ഇപ്പോഴിതാ ഈ ചിത്രത്തെക്കുറിച്ച് തനിക്കുള്ള ആവേശം പങ്കുവെക്കുകയാണ് പൃഥ്വിരാജ്. താൻ നായകനാവുന്ന പുതിയ ചിത്രം കാപ്പയുടെ പ്രൊമോഷണൽ പരിപാടിയിൽ മാധ്യമ പ്രവർത്തകരുടെ ചോദ്യത്തിന് മറുപടി പറയുകയായിരുന്നു അദ്ദേഹം.ലാലേട്ടനെ വച്ച് ലിജോ ചെയ്യുന്ന സിനിമ ഒരു ലിജോ ജോസ് പെല്ലിശ്ശേരി സിനിമ തന്നെയാണ്. അതിന്റെ വിഷയം എന്താണെന്ന് അറിയാം. അതുകൊണ്ട് പറയുകയാണ്. ആ സിനിമ കാണാൻ ഞാൻ അങ്ങേയറ്റം എക്‌സൈറ്റഡ് ആണ്.

ഒരു ലാലേട്ടൻ ഫാൻ ആണെങ്കിൽപ്പോലും ആ സിനിമയെ സംബന്ധിച്ച് എന്റെ ഏറ്റവും വലിയ ആവേശം അത് ലിജോയുടെ സിനിമ എന്നതു തന്നെയാണ്.ലിജോയുടെ സംവിധാനത്തിൽ ഒരു സിനിമ ചെയ്യുമ്പോൾ ഒരു താരം, അഭിനേതാവ് എന്നീ നിലകളിലൊക്കെ ഒരു പുതുമ കൊണ്ടുവരാൻ ലാലേട്ടനും ശ്രമിക്കുമെന്ന് ഞാൻ കരുതുന്നു. ഭയങ്കര ചലഞ്ചിങ് സിനിമയാണ് അത്. പുറത്ത് എത്രത്തോളം അതിനെക്കുറിച്ച് അറിയാമെന്ന് എനിക്കറിയില്ല. ഒരു വലിയ സിനിമയാണ് അത്. രാജസ്ഥാനിലാണ് ഫുൾ ഷൂട്ട് ചെയ്യുന്നത്, പൃഥ്വിരാജ് പറഞ്ഞു.

ജോൺ ആൻഡ് മേരി ക്രിയേറ്റീവിന്റെ ബാനറിൽ ഷിബു ബേബിജോൺ ആണ് ഈ ചിത്രത്തിന്റെ നിർമ്മാണം.അതേസമയം സോഷ്യൽ മീഡിയയിൽ പല വിവരങ്ങളും ആരാധകരാൽ പ്രചരിക്കുന്നുണ്ട് താനും.ജനുവരിയിൽ ഈ സിനിമയുടെ ചിത്രീകരണം ആരംഭിക്കുമെന്ന് അനൗദ്യോഗിക റിപ്പോർട്ടുകൾ ഉണ്ടായിരുന്നു.ജീത്തു ജോസഫിന്റെ റാം പൂർത്തിയാക്കിയതിനു ശേഷം മോഹൻലാൽ അഭിനയിക്കുന്ന ചിത്രം ഇതായിരിക്കുമെന്നും വിവരങ്ങൾ ഉണ്ട്.