പശ്ചാത്തല സംഗീതമാക്കി കൊതിപ്പിച്ച ഗാനവുമായി പൊന്നിയിൻ സെൽവൻ ടീം എത്തുന്നു; രണ്ടാം ഭാഗത്തിന്റെ വരവറിയിച്ച് ആദ്യ ഗാനം നാളെയെത്തും; 'അഗ നാഗ' ഗാനത്തിന്റെ ഗ്ലിംപ്‌സ് പുറത്ത് വിട്ടു
മണിരത്‌നത്തിന്റെ 'പൊന്നിയിൻ സെൽവന്റെ' രണ്ടാം ഭാഗം ഏപ്രിൽ 28ന് റിലീസ് ചെയ്യുമെന്ന് നേരത്തെ പ്രഖ്യാപിച്ചിരുന്നു.ഇപ്പോഴിതാ 'പൊന്നിയിൻ സെൽവന്റെ' രണ്ടാം ഭാഗത്തിന്റെ വരവറിയിച്ച് ഗാനം പുറത്തുവിടാൻ ഒരുങ്ങുകയാണ് അണിയറ പ്രവർത്തകർ.ഗാനത്തിന്റെ റിലീസ് അറിയിച്ച് ഗ്ലിംപ്‌സാണ് ഇപ്പോൾ പുറത്തുവിട്ടിരിക്കുന്നത്.
'അഗ നാഗ' എന്ന ഗാനമാണ് ചിത്രത്തിലേതായി ആദ്യമെത്തുക.ശക്തിശ്രീ ഗോപാലനാണ് ഗാനം ആലപിക്കുന്നത്.ഇളങ്കോ കൃഷ്ണനാണ് ഗാന രചന. തൃഷയും കാർത്തിയും ഒന്നിച്ചുള്ള ഒരു ഫോട്ടോ ഉൾപ്പെടുത്തിയുള്ള പോസ്റ്റർ പുറത്തുവിട്ടത് ആരാധകർ ഏറ്റെടുത്തിരുന്നു.വിക്രം, ജയം രവി, കാർത്തി, റഹ്മാൻ, പ്രഭു, ശരത് കുമാർ, ജയറാം, പ്രകാശ് രാജ്, ലാൽ, വിക്രം പ്രഭു, പാർത്ഥിപൻ, ബാബു ആന്റണി, അശ്വിൻ കാകുമാനു, റിയാസ് ഖാൻ, ഐശ്വര്യാ റായ് ബച്ചൻ, ശോഭിതാ ദുലിപാല, ജയചിത്ര തുടങ്ങി ഒട്ടേറേ അഭിനേതാക്കളും 'പൊന്നിയിൻ സെൽവനി'ലുണ്ട്.
125 കോടിക്കാണ് ചിത്രത്തിന്റെ സ്ട്രീമിങ്ങ് അവകാശം വിറ്റുപോയതെന്നായിരുന്നു റിപ്പോർട്ട്. ആമസോൺ പ്രൈം വീഡിയോയാണ് ചിത്രത്തിന്റെ സ്ട്രീമിങ് സ്വന്തമാക്കിയത്.തമിഴിനു പുറമേ മലയാളം, തെലുങ്ക്, കന്നഡ, ഹിന്ദി ഭാഷകളിലും ചിത്രം പ്രദർശനത്തിന് എത്തിയിരുന്നു.തോട്ട ധരണിയും വാസിം ഖാനും ചിത്രത്തിന്റെ കലാ സംവിധാനം നിർവഹിച്ചിരിക്കുന്നത്.ശ്രീകർ പ്രസാദ് ആണ് എഡിറ്റിങ്.
കൽക്കി കൃഷ്ണമൂർത്തിയുടെ ഇതിഹാസ നോവലിനെ ആസ്പദമാക്കിയാണ് അതേ പേരിൽ മണിരത്‌നം 'പൊന്നിയിൻ സെൽവൻ' ഒരുക്കിയത്. ശ്യാം കൗശലാണ് ആക്ഷൻ കൊറിയോഗ്രഫി. ബൃന്ദ നൃത്ത സംവിധാനം. ആനന്ദ് കൃഷ്ണമൂർത്തിയാണ് സൗണ്ട് ഡിസൈനർ. എ ആർ റഹ്മാനാണ് ചിത്രത്തിന്റെ സംഗീത സംവിധാനം.
