ആവാസവ്യൂഹത്തിന് ശേഷം വീണ്ടും ക്രിഷാന്ദ്; ദർശന രാജേന്ദ്രൻ പ്രധാന വേഷത്തിലെത്തുന്ന 'പുരുഷ പ്രേതം' ഒടിടി റിലീസിന്; ചിത്രമെത്തുക സോണിലിവിൽ; ചിത്രത്തിന്റെ ടീസർ പുറത്ത്

തിരുവനന്തപുരം: സംസ്ഥാന അവാർഡ് ഉൾപ്പടെ ഒട്ടേറെ പുരസ്‌കാരങ്ങൾ സ്വന്തമാക്കിയ 'ആവാസവ്യൂഹം' എന്ന ചിത്രത്തിന് ശേഷം സംവിധായകൻ ക്രിഷാന്ദ് ഒരുക്കുന്ന ചിത്രമാണ് 'പുരുഷ പ്രേതം'.ദർശന രാജേന്ദ്രനാണ് ചിത്രത്തിൽ പ്രധാനവേഷത്തിലെത്തുന്നത്.'പുരുഷ പ്രേതം' ചിത്രം ഡയറക്ട് ഒടിടി റിലീസായിരിക്കും.ചിത്രത്തിന്റ റിലീസ് അറിയിച്ച് ആദ്യ ടീസർ പുറത്തുവിട്ടിരിക്കുകയാണ്.

സോണി ലിവിലാണ് ചിത്രം പ്രദർശിപ്പിക്കുക. ജഗദീഷ്, അലക്‌സാണ്ടർ പ്രശാന്ത് എന്നിവരും ചിത്രത്തിൽ പ്രധാന വേഷത്തിൽ എത്തുന്നു. സംവിധായകൻ ക്രിഷാന്ദ് തന്നെ ചിത്രത്തിന്റെ ഛായാഗ്രഹണവും നിർവഹിച്ചിരിക്കുന്നു. എഡിറ്റിങ് സുഹൈൽ ബക്കർ ആണ്.മാൻകൈൻഡ് സിനിമാസ്, എയ്ൻസ്റ്റീൻ മീഡിയ സിമ്മെട്രി സിനിമാസ് എന്നീ ബാനറുകളിൽ ജോമോൻ ജേക്കബ്, എയ്ൻസ്റ്റീൻ സാക്ക് പോൾ, ഡിജോ അഗസ്റ്റിൻ, സജിൻ എസ് രാജ്, വിഷ്ണു രാജൻ എന്നിവർക്കൊപ്പം അലക്‌സാണ്ടർ പ്രശാന്തും ചേർന്നാണ് ചിത്രം നിർമ്മിക്കുന്നത്.

നിതിൻ രാജു, ആരോമൽ രാജൻ, സിജോ ജോസഫ്, പോൾ പി ചെറിയാൻ എന്നിവരാണ് എക്‌സിക്യൂട്ടീവ് പ്രൊഡ്യൂസേഴ്‌സ്. പ്രൊഡക്ഷൻ കൺട്രോളർ ജയേഷ് എൽ ആർ ആണ്. സംഗീതം അജ്മൽ ഹുസ്ബുള്ള ആണ്.ഒട്ടേറെ റാപ്പ് സോങ്ങുകളിലൂടെ ശ്രദ്ധേയയനായ റാപ്പർ ഫെജോ, എം സി കൂപ്പർ, സൂരജ് സന്തോഷ്, ജ'മൈമ തുടങ്ങിയവരാണ് 'പുരുഷ പ്രേത'ത്തിലെ ഗാനങ്ങൾ ആലപിച്ചിരിക്കുന്നത്.