മലയാളത്തിൽ ഇന്ന് റെക്കോർഡ് റിലീസ്; ഇന്ന് പ്രദർശനത്തിനെത്തുന്നത് 9 ചിത്രങ്ങൾ; ഒറ്റദിവസം ഇത്രയും ചിത്രങ്ങൾ റിലീസിനെത്തുന്നത് ഇതാദ്യം; അന്യഭാഷ ചിത്രങ്ങളും തിയേറ്ററിലേക്ക്

ഒടിടി കൂടി സജീവമായതോടെ തിയേറ്റർ റിലിസിനെത്തുന്ന ചിത്രങ്ങളുടെ എണ്ണത്തിൽ കുറവ് സംഭവിച്ചിരുന്നു.പ്രത്യേകിച്ചും ഒരേ ദിവസം റിലീസിനെത്തുന്ന ചിത്രങ്ങളുടെ എണ്ണത്തിൽ.എന്നാൽ ഇന്ന് റീലിസ് ചരിത്രത്തിൽ തന്നെ റെക്കോർഡ് ഇടുകയാണ് മലയാള സിനിമ.ഒരൊറ്റ ദിവസം ഏറ്റവും കൂടുതൽ ചിത്രം പ്രദർശനത്തിന് എത്തുന്നുവെന്നതാണ് ഇന്നത്തെ സവിശേഷത.9 ചിത്രങ്ങളാണ് ഇന്ന് മലയാളത്തിൽ മാത്രം റിലീസിനെത്തുന്നത്.

ആറ് വർഷത്തെ ഇടവേളയ്ക്കു ശേഷം ഭാവന മലയാളത്തിലേക്ക് തിരിച്ചെത്തുന്ന ന്റിക്കാക്കാക്കൊരു പ്രേമണ്ടാർന്ന്, അനിഖ സുരേന്ദ്രനെ നായികയാക്കി ആൽഫ്രഡ് ഡി സാമുവൽ സംവിധാനം ചെയ്യുന്ന ഓ മൈ ഡാർലിങ്, അർജുൻ അശോകൻ, മമിത ബൈജു, അനശ്വര രാജൻ എന്നിവരെ കേന്ദ്ര കഥാപാത്രങ്ങളാക്കി നിഖിൽ മുരളി സംവിധാനം ചെയ്യുന്ന പ്രണയ വിലാസം, ബൈജു സന്തോഷ്, സംയുക്ത മേനോൻ, ചെമ്പൻ വിനോദ്, ഷൈൻ ടോം ചാക്കോ, ഡെയിൻ ഡേവിസ് എന്നിവരെ പ്രധാന കഥാപാത്രങ്ങളാക്കി മനു സുധാകരൻ സംവിധാനം ചെയ്ത ബൂമറാംഗ്, നിത്യ ദാസ്, ശ്വേത മേനോൻ, കൈലാഷ് എന്നിവരെ പ്രധാന കഥാപാത്രങ്ങളാക്കി അനിൽ കുമ്പഴ സംവിധാനം ചെയ്ത പള്ളിമണി എന്നിവയാണ് ഇന്നത്തെ റിലീസുകളിൽ പ്രീ റിലീസ് പബ്ലിസിറ്റിയിൽ മുന്നിൽ നിൽക്കുന്ന ചിത്രങ്ങൾ.

അനു സിത്താര, കലാഭവൻ ഷാജോൺ, അമിത് ചക്കാലയ്ക്കൽ തുടങ്ങിയവരെ പ്രധാന കഥാപാത്രങ്ങളാക്കി അജിത്ത് വി തോമസ് സംവിധാനം ചെയ്ത സന്തോഷം, ചന്ദുനാഥ്, സന്തോഷ് കീഴാറ്റൂർ, മണിക്കുട്ടൻ തുടങ്ങിയവരെ പ്രധാന കഥാപാത്രങ്ങളാക്കി മിനി ഐ ജി സംവിധാനം ചെയ്ത ഡിവോഴ്‌സ്, മണികണ്ഠനെ നായകനാക്കി നെറ്റോ ക്രിസ്റ്റഫർ സംവിധാനം ചെയ്ത ഏകൻ, രതീഷ് വെഞ്ഞാറമൂട് പ്രധാന കഥാപാത്രത്തെ അവതരിപ്പിച്ച് ബി ശ്രീവല്ലഭവൻ സംവിധാനം ചെയ്ത ധരണി എന്നിവയാണ് ഇന്ന് തിയറ്ററുകളിലെത്തുന്ന മറ്റ് മലയാള ചിത്രങ്ങൾ.