രോമാഞ്ചം സിനിമാ ട്രെൻഡ് ഏറ്റടുത്തു സഞ്ജു സാംസണും കൂട്ടരം. അടുത്ത കാലത്ത് ഇറങ്ങി വൻ ഹിറ്റായ ചിത്രമാണ് രോമാഞ്ചം സിനിമയുടെ വീഡിയോയുമായാണ് ഐപിഎല്ലിലെ രാജസ്ഥാൻ റോയൽസ് താരങ്ങൾ രംഗത്തുവന്നത്. മലയാളികളെ പൊട്ടിച്ചിരിപ്പിച്ച രോമാഞ്ചത്തിലെ ഏറ്റവും ശ്രദ്ധ നേടിയത് അർജുൻ അശോകൻ അവതരിപ്പിച്ച 'സിനു' എന്ന കഥാപാത്രത്തിന്റെ സൈക്കോ ചിരിയാണ്. സിനിമ ഒടിടിയിൽ കൂടി എത്തിയതോടെ 'നിങ്ങൾക്ക് ആദരാഞ്ജലി നേരട്ടേ' എന്ന പാട്ടിനൊപ്പം അർജുൻ അശോകന്റെ തലകുലുക്കലും റീൽസിൽ ട്രെൻഡായി.

ഇപ്പോൾ ട്രെൻഡിനൊപ്പം ചേർന്നുകൊണ്ട് ഐപിഎൽ ടീം രാജസ്ഥാൻ റോയൽസ് പങ്കുവെച്ച വിഡിയോയാണ് ആരാധകർ ഏറ്റെടുത്തിരിക്കുന്നത്.'നിങ്ങൾക്ക് ആദരാഞ്ജലി നേരട്ടെ'യെന്ന പാട്ടിനൊപ്പം റോയൽസ് താരങ്ങൾ അർജുൻ അശോകന്റെ തല കുലുക്കൽ അനുകരിച്ചാണ് വീഡിയോ ഉള്ളത്. ഇന്റർനെറ്റിൽ ഇപ്പോഴുള്ളതിൽ ഏറ്റവും ക്യൂട്ട് ട്രെൻഡ് എന്ന ക്യാപ്ഷനോടെ രാജസ്ഥാൻ റോയൽസിന്റെ ഔദ്യോഗിക ട്വിറ്റർ ഹാൻഡിലാണ് വീഡിയോ പങ്കുവെച്ചിരിക്കുന്നത്.

28 സെക്കന്റുള്ള വീഡിയോയിൽ രാജസ്ഥാൻ റോയൽസിന്റെ ഇരുപതോളം താരങ്ങൾ അണിനിരക്കുന്നു. സഞ്ജു സാംസണ് പുറമേ ജോസ് ബട്ലർ, ലസിത് മലിങ്ക, രവിചന്ദ്ര അശ്വിൻ, സന്ദീപ് ശർമ, ഷിമ്രോൺ ഹെട്മെയർ, യുസ്വേന്ദ്ര ചഹാൽ, ആഡം സാംബ, റിയാൻ പരാഗ്, ദേവദത്ത് പടിക്കൽ തുടങ്ങിയവരെല്ലാം രാജസ്ഥാൻ റോയൽസ് ഔദ്യോഗിക ഹാൻഡിലിലൂടെ പങ്കുവച്ച റീൽസിൽ പ്രത്യക്ഷപ്പെട്ടിട്ടുണ്ട്. ക്യാപ്റ്റൻ സഞ്ജു സാംസൺ വീഡിയോയിൽ അവസാനമാണ് എത്തുന്നത്.

മലയാളികൾക്ക് ഏറെ രോമാഞ്ചമുണ്ടാക്കുന്ന വീഡിയോ ഇതിനോടകം തന്നെ ആരാധകർ ഏറ്റെടുത്തിട്ടുണ്ട്. ഇതെല്ലാം സഞ്ജുവിന്റെ പണിയാണെന്ന കമന്റുകളാണ് വീഡിയോയ്ക്ക് താഴെ കൂടുതലും. 'രാമാഞ്ചിഫിക്കേഷൻ' എന്ന ക്യാപ്ഷനോടെ സഞ്ജുവും ഈ വീഡിയോ പങ്കുവെച്ചിട്ടുണ്ട്. 

മറുനാടന്‍ ഡെസ്‌ക്‌

    മറുനാടന്‍ ഡെസ്‌ക്‌