കാരണങ്ങൾ എല്ലാവരോടും വിളിച്ചു പറയണമെന്നൊക്കെ പല തവണ തോന്നിയിട്ടുണ്ട്, പക്ഷെ പറയുന്നില്ല; നിങ്ങൾക്ക് നൽകേണ്ടത് വാർത്തകളും വിവാദങ്ങളുമൊന്നുമല്ല, നല്ല സിനിമകളാണ് എന്ന് വിവേകപൂർവം തിരിച്ചറിയുന്നു; സുരാജ് വെഞ്ഞാറമൂട് ചിത്രം റോയ് വൈകിയതിൽ പ്രതികരണവുമായി സംവിധായകൻ

തിരുവനന്തപുരം: സുരാജ് വെഞ്ഞാറമൂടിനെ നായകനാക്കി സുനിൽ ഇബ്രാഹിം രചനയും സംവിധാനവും നിർവ്വഹിച്ച് 2020ൽ പ്രഖ്യാപിക്കപ്പെട്ട ചിത്രമാണ് റോയ്. ചിത്രത്തിന്റെ ഫസ്റ്റ് ലുക്കും ഗാനങ്ങളുമൊക്കെ പുറത്തെത്തിയിരുന്നു. പക്ഷേ സിനിമ ഇനിയും തിയറ്ററുകളിൽ എത്തിയിട്ടില്ല. സിനിമ എന്തുകൊണ്ട് വരുന്നില്ല എന്ന ചോദ്യം പലരിൽ നിന്നായി നേരിട്ടുകൊണ്ടിരിക്കുകയാണെന്ന് പറയുന്നു സംവിധായകൻ സുനിൽ ഇബ്രാഹിം. അതിന്റെ കാരണത്തെക്കുറിച്ചും അദ്ദേഹം പറയുന്നു. സോഷ്യൽ മീഡിയയിലൂടെയാണ് സുനിൽ ഇബ്രാഹിമിന്റെ പ്രതികരണം.

സുനിൽ ഇബ്രാഹിമിന്റെ കുറിപ്പ്

റോയ് സിനിമ എപ്പോൾ വരും? സിനിമ വിചാരിച്ചത് പോലെ നന്നായില്ലേ? ടെക്നിക്കലി എന്തെങ്കിലും പ്രശ്‌നമായോ? കോവിഡ് കഥയാണോ? കഥയുടെ പ്രസക്തി നഷ്ടമായോ? ബിസിനസ് ആവുന്നില്ലേ? നിയമപരമായ എന്തെങ്കിലും കുരുക്കിൽപ്പെട്ടോ? വൈകുന്തോറും കാരണമന്വേഷിക്കുന്ന മെസ്സേജുകളിൽ പലതും ഇങ്ങിനെയൊക്കെയായി മാറുന്നതുകൊണ്ടാണ് ഇതെഴുതുന്നത്. ഈ ചോദ്യങ്ങളിൽ ഒന്ന് പോലും റോയ് വൈകാനുള്ള യഥാർത്ഥ കാരണമല്ല എന്ന് മാത്രം തൽക്കാലം എല്ലാവരും മനസിലാക്കണം.

സിനിമയുടെയോ അതിന്റെ പിന്നിൽ പ്രവർത്തിച്ച ടീമിന്റെയോ തെറ്റല്ല ഈ കാലതാമസം എന്നറിയുക. കാരണങ്ങൾ എല്ലാവരോടും വിളിച്ചു പറയണമെന്നൊക്കെ പല തവണ തോന്നിയിട്ടുണ്ട്, പക്ഷെ പറയുന്നില്ല. ഞങ്ങൾ നിങ്ങൾക്ക് നൽകേണ്ടത് വാർത്തകളും വിവാദങ്ങളുമൊന്നുമല്ല, നല്ല സിനിമകളാണ് എന്ന് വിവേകപൂർവം തിരിച്ചറിയുന്നു. ഈ സാഹചര്യത്തിൽ ഏറ്റവുമധികം നിരാശരാവേണ്ട ഞങ്ങൾ ഫുൾ പവറിൽ ഇപ്പോഴും കാത്തിരിക്കുന്നത് സിനിമയിൽ അത്രക്ക് പ്രതീക്ഷയുള്ളതുകൊണ്ടാണ്.

ഇനിയും ഒരുപാട് വൈകിപ്പിക്കാൻ അനുവദിക്കില്ല എന്ന് മാത്രം ഉറപ്പ് തരുന്നു.
സ്‌നേഹത്തോടെ എല്ലാവരും ഒപ്പമുണ്ടാവണം ...!

സുരാജിനൊപ്പം ഷൈൻ ടോം ചാക്കോ, സിജാ റോസുമാണ് ചിത്രത്തിൽ രണ്ട് പ്രധാന കഥാപാത്രങ്ങളെ അവതരിപ്പിക്കുന്നത്. നെട്ടൂരാൻ ഫിലിംസ്, വിശ്വദീപ്തി ഫിലിംസ് എന്നീ ബാനറുകളിൽ സജീഷ് മഞ്ചേരി, സനൂബ് കെ യൂസഫ് എന്നിവരാണ് ചിത്രത്തിന്റെ നിർമ്മാണം. റോണി ഡേവിഡ് രാജ്, ജിൻസ് ഭാസ്‌കർ, വി കെ ശ്രീരാമൻ, വിജീഷ് വിജയൻ, റിയ സൈറ, ഗ്രേസി ജോൺ, ബോബൻ സാമുവൽ, അഞ്ജു ജോസഫ്, ആനന്ദ് മന്മഥൻ, ജെനി പള്ളത്ത്, രാജഗോപാലൻ, യാഹിയ ഖാദർ, ദിൽജിത്ത്, അനൂപ് കുമാർ, അനുപ്രഭ, രേഷ്മ ഷേണായി തുടങ്ങിയവരും അഭിനയിച്ചിരിക്കുന്നു.

ഛായാഗ്രഹണം ജയേഷ് മോഹൻ. പശ്ചാത്തല സംഗീതംഗോപി സുന്ദർ, പ്രൊഡക്ഷൻ കൺട്രോളർ ജാവേദ് ചെമ്പ്, പ്രൊഡക്ഷൻ ഡിസൈൻ എം ബാവ, മേക്കപ്പ് അമൽ ചന്ദ്രൻ, വസ്ത്രാലങ്കാരം രമ്യ സുരേഷ്, എഡിറ്റിങ് വി സാജൻ, സ്റ്റിൽസ് സിനറ്റ് സേവ്യർ, പരസ്യകല ഫണൽ മീഡിയ, അസോസിയേറ്റ് ഡയറക്ടർ എം ആർ വിബിൻ, സുഹൈൽ ഇബ്രാഹിം, ഷമീർ എസ്, പ്രൊഡക്ഷൻ മാനേജർ സുഹൈൽ വിപിഎൽ, ജാഫർ, വാർത്താ പ്രചരണം എ എസ് ദിനേശ്.