'പുലർകാലമേഘം വന്ന'; വിദ്യാധരൻ മാസ്റ്ററുടെ മനോഹര ഈണം; 'സ്റ്റേറ്റ് ബസി'ലെ പാട്ടെത്തി

മലയാളി സംഗീതാസ്വാദകർക്ക് മറക്കാനാവാത്ത നിരവധി ഗാനങ്ങൾ ഒരുക്കിയ സംഗീത സംവിധായകനാണ് വിദ്യാധരൻ മാസ്റ്റർ. ഇപ്പോഴിതാ അദ്ദേഹത്തിന്റെ ഈണത്തിലെത്തിയ പുതിയ മെലഡിയും സംഗീത പ്രേമികളുടെ ശ്രദ്ധ നേടുകയാണ്. സ്റ്റേറ്റ് ബസ് എന്ന ചിത്രത്തിനുവേണ്ടി വിദ്യാധരൻ മാസ്റ്റർ ഈണം പകർന്ന ഗാനം ആലപിച്ചിരിക്കുന്നത് വിജയ് യേശുദാസ് ആണ്. പ്രശാന്ത് പ്രസന്നൻ ആണ് വരികൾ എഴുതിയിരിക്കുന്നത്.

ചന്ദ്രൻ നരീക്കോട് ആണ് ചിത്രത്തിന്റെ സംവിധാനം. ഒട്ടേറെ പുരസ്‌കാരങ്ങൾ നേടിയ പാതി എന്ന ചിത്രത്തിനു ശേഷം ചന്ദ്രൻ നരീക്കോട് സംവിധാനം ചെയ്യുന്ന രണ്ടാമത്തെ ചിത്രമാണ് സ്റ്റേറ്റ് ബസ്. സന്തോഷ് കീഴാറ്റൂർ, വിജിലേഷ് എന്നിവരാണ് പ്രധാന കഥാപാത്രങ്ങളെ അവതരിപ്പിക്കുന്നത്. സ്റ്റുഡിയോ സി സിനിമാസിന്റെ ബാനറിൽ ഐബി രവീന്ദ്രനും പത്മകുമാറുമാണ് ചിത്രം നിർമ്മിക്കുന്നത്. സംഘർഷഭരിതമായ ജീവിത യാഥാർത്ഥ്യങ്ങളിലൂടെ സാമൂഹിക രാഷ്ട്രീയം ചർച്ച ചെയ്യുന്ന ട്രാവൽമൂവിയെന്നാണ് ചിത്രത്തെ അണിയറ പ്രവർത്തകർ വിശേഷിപ്പിച്ചിരിക്കുന്നത്. അതേസമയം കുടുംബപശ്ചാത്തലത്തിലുള്ള ചിത്രവുമാണിത്.

കണ്ണൂർ സെൻട്രൽ ജയിലിൽ നിന്ന് ഒരു പ്രതിയുമായി രണ്ട് പൊലീസുകാർ സ്റ്റേറ്റ് ബസിൽ യാത്ര ചെയ്യുമ്പോൾ അരങ്ങേറുന്ന സംഭവ വികാസങ്ങളിലൂടെയാണ് ചിത്രത്തിന്റെ കഥ വികസിക്കുന്നത്. ഏറെ നാളുകൾക്ക് ശേഷം പ്രശസ്ത സംഗീതജ്ഞൻ മോഹൻ സിത്താര പശ്ചാത്തല സംഗീതം ഒരുക്കിയിരിക്കുന്ന ചിത്രമാണിത്. സിബി തോമസ്, ശിവദാസൻ, സദാനന്ദൻ, കബനി എന്നിവർക്കൊപ്പം ഒട്ടേറെ പുതുമുഖങ്ങളും ചിത്രത്തിൽ അഭിനയിച്ചിട്ടുണ്ട്.

കഥ, തിരക്കഥ പ്രമോദ് കൂവേരി, ഛായാഗ്രഹണം പ്രസൂൺ പ്രഭാകർ, സംഗീതം വിദ്യാധരൻ മാസ്റ്റർ, എഡിറ്റിങ് ഡീജോ പി വർഗ്ഗീസ്, മേക്കപ്പ് പീയൂഷ് പുരുഷു, കലാസംവിധാനം മധു വെള്ളാവ്, പ്രൊജക്റ്റ് ഡിസൈനർ ധീരജ് ബാല, വസ്ത്രാലങ്കാരം വിജേഷ് വിശ്വം, ടൈറ്റിൽ ഡിസൈൻ ശ്രീനി പുറയ്ക്കാട്ട, വി എഫ് എക്‌സ് ജയേഷ് കെ പരമേശ്വരൻ, കളറിസ്റ്റ് എം മഹാദേവൻ, പി ആർ ഒ പി ആർ സുമേരൻ, സബ്‌ടൈറ്റിൽസ് ആർ നന്ദലാൽ, പ്രൊഡക്ഷൻ എക്‌സിക്യൂട്ടീവ് വിനോദ്കുമാർ വി വി, ഗാനരചന എം ഉണ്ണികൃഷ്ണൻ, പ്രശാന്ത് പ്രസന്നൻ, സുരേഷ് രാമന്തളി, ഗായകർ വിജയ് യേശുദാസ്, വിദ്യാധരൻ മാസ്റ്റർ, ജിൻഷ ഹരിദാസ് സ്റ്റിൽസ് വിനോദ് പ്ലാത്തോട്ടം.