'നമ്മൾ ഓൺസ്‌ക്രീനിൽ കണ്ട അതേ വ്യക്തി തന്നെ; ക്യാപ്റ്റൻ കൂളിനൊപ്പം സമയം ചിലവഴിക്കാൻ സാധിച്ചത് മികച്ചൊരു അനുഭവം; ഞാൻ ഭാഗ്യവാനാണ്'; ധോണിക്കൊപ്പമുള്ള ചിത്രം പങ്കുവച്ച് ടൊവിനോ തോമസ്
കാസർകോട്: മുൻ ഇന്ത്യൻ ക്രിക്കറ്റ് ടീം നായകൻ എം എസ് ധോണിയെ കണ്ടുമുട്ടിയതിന്റെ ആഹ്ലാദം അറിയിച്ച് ഒപ്പമുള്ള ഫോട്ടോ പങ്കുവച്ച് നടൻ ടൊവിനോ തോമസ്. ധോണിക്കൊപ്പം സമയം ചെലവഴിക്കാൻ സാധിച്ചതിൽ സന്തോഷമുണ്ടെന്നും ഓൺസ്‌ക്രീനിൽ കണ്ടപോലെ തന്നെയാണ് നേരിട്ടെന്നും ടൊവിനോ സോഷ്യൽ മീഡിയയിൽ കുറിക്കുന്നു.
ക്യാപ്റ്റൻ കൂളിനൊപ്പം സമയം ചിലവഴിച്ചത് മികച്ച ഒരു അനുഭവമായെന്നും ഈ അവസരം ലഭിച്ചതിൽ താൻ ശരിക്കും ഭാഗ്യവാനാണെന്നും ടൊവിനോ ധോണിക്കൊപ്പമുള്ള ചിത്രം പങ്കുവച്ചുകൊണ്ട് കുറിച്ചു.
'ക്യാപ്റ്റൻ കൂളിനൊപ്പം സമയം ചിലവഴിക്കാൻ സാധിച്ചത് മികച്ചൊരു അനുഭവമാണ്. നമ്മൾ ഓൺസ്‌ക്രീനിൽ കണ്ട അതേ വ്യക്തി തന്നെയാണ്. കൂൾ, ശാന്തം, സ്വതസിദ്ധമായ കഴിവും എല്ലാം ചേർന്നൊരു വ്യക്തി. ഞങ്ങൾ ഒരുപാട് സംസാരിച്ചു. അനായസമായി ഉന്നതമായ ചിന്തകൾ പലപ്പോഴായി അദ്ദേഹം പങ്കുവെച്ചു. ഇങ്ങനെയൊരു അവസരം ലഭിച്ചതിൽ ഞാൻ ഭാഗ്യവാനാണ്. എല്ലാവർക്കും ഒരു നല്ല മാതൃകയാണ് ധോണി. അദ്ദേഹത്തിന്റെ യാത്ര കൂടുതൽ ശോഭനം ആകട്ടെ' എന്നാണ് ധോണിയുടെ ഫോട്ടോ പങ്കുവച്ച് ടൊവിനോ കുറിച്ചത്.
പ്രൊഫസർ അബ്ദുൾ ഗഫാറിന്റെ ആത്മകഥയുടെ പ്രകാശന ചടങ്ങിലാണ് ടൊവിനോ തോമസും ധോണിയും കണ്ടുമുട്ടിയത്. ടൊവിനോ അടക്കമുള്ള മറ്റ് പ്രമുഖർക്ക് ധോണി 'ഞാൻ സാക്ഷിയുടെ' കോപ്പികൾ സമ്മാനിച്ചിരുന്നു. ആത്മസുഹൃത്ത് ഡോ. ഷാജിർ ഗഫാറിന്റെ പിതാവിന്റെ ആത്മകഥയുടെ പ്രകാശനത്തിന് സ്വദേശമായ റാഞ്ചിയിൽ നിന്നാണ് ധോണി എത്തിയത്. അദ്ധ്യാപനം ഒരു കലയാണെന്നും അദ്ധ്യാപകരെ ഏറെ ബഹുമാനിക്കുന്നുവെന്നും ധോണി ചടങ്ങിൽ പറഞ്ഞിരുന്നു.
2021ൽ ടൊവിനോ ക്രിക്കറ്റ് താരം യുവരാജ് സിങ്ങുമായി കൂടിക്കാഴ്ച നടത്തിയിരുന്നു. യുവിയെ കണ്ടുമുട്ടിയ സമയത്ത്, 'താങ്കളെ കണ്ടുമുട്ടിയതിലും കുറച്ചു സമയം ചിലവഴിച്ചതിലും അതിയായ സന്തോഷമുണ്ട്. ഡർബനിലെ നിങ്ങളുടെ ആറ് സിക്സറുകൾ പോലെ ഇത് എനിക്ക് അവിസ്മരണീയവും അവിസ്മരണീയവുമാണ്.'- എന്നാണ് ടൊവിനോ സോഷ്യൽമീഡിയയിൽ കുറിച്ചത്.
