ജീവിതപങ്കാളിയെ തേടി അലഞ്ഞു മടുത്തു; കല്ല്യാണം നടക്കാൻ ക്ഷേത്രത്തിലേക്ക് 200 യുവാക്കളുടെ പദയാത്ര; അധികം പേരും മുപ്പത് പിന്നിട്ട കർഷകർ; മൂന്ന് ദിവസത്തിനിടെ 105 കിലോമീറ്റർ
ബെംഗളൂരു: ജീവിതപങ്കാളിയെ തേടി അലഞ്ഞുമടുത്ത 200 യുവാക്കൾ ക്ഷേത്രത്തിലേക്ക് പദയാത്ര നടത്താൻ ഒരുങ്ങുന്നു. കർണാടകയിലെ മാണ്ഡ്യയിൽ നിന്നാണ് റിപ്പോർട്ട്. 200 യുവാക്കൾ പദയാത്രയിൽ പങ്കെടുക്കുക. ചാമരാജനഗർ ജില്ലയിലെ എംഎം ഹിൽസ് ക്ഷേത്രത്തിലേക്കാണ് പദയാത്ര നടത്തുന്നത്.
കല്യാണം നടക്കാൻ ദൈവനുഗ്രഹം തേടിയാണ് വേറിട്ട നീക്കം. ഇതിൽ അധികപേരും 30 വയസ്സ് കഴിഞ്ഞ കർഷകരാണ്. ഈ മാസം 23-ന് മധൂർ താലൂക്കിലെ ദൊഡ്ഢിയിൽ നിന്നാണ് പദയാത്ര തുടങ്ങുക. മൂന്ന് ദിവസം നീളുന്ന യാത്രയിൽ 105 കിലോമീറ്റർ ദൂരമാണ് ഇവർ പിന്നിടുന്നത്.
'ബ്രഹ്‌മചാരിഗാല പദയാത്ര' എന്നാണ് ഇതിന് പേര് നൽകിയിരിക്കുന്നത്. ഇതിനോടകം 200 പേർ രജിസ്റ്റർ ചെയ്തിട്ടുണ്ട്. 30 വയസ്സ് കഴിഞ്ഞിട്ടും കല്യാണം ശരിയാകാത്ത യുവാക്കളാണ് ദൈവത്തിന്റെയും നാട്ടുകാരുടെയും ശ്രദ്ധ കിട്ടാൻ ബാച്ചിലർ പദയാത്ര നടത്താൻ തീരുമാനിച്ചത്.
ആശയം അറിഞ്ഞ് സംസ്ഥാനത്തിന്റെ വിവിധ ഭാഗങ്ങളിൽ നിന്നുള്ള അവിവാഹിതരായ യുവാക്കൾ പദയാത്രയിൽ അണിചേരാനും തീരുമാനിച്ചിട്ടുണ്ട്. ഇവർ കൂടി ചേരുന്നതോടെ യാത്രാസംഘം വലുതാകും.
