പുറത്തു നിന്നു നോക്കിയാൽ ഒരു സാധാരണ വാൻ എന്നതിൽ കവിഞ്ഞ് ഒന്നും ഈ വാഹനത്തിൽ ഇല്ല. എന്നാൽ ഈ മെഴിസീഡിസ് വാനിന്റെ വാതിൽ തുറന്ന് അകത്തേക്കു പ്രവേശിച്ചാൽ പ്രൈവറ്റ് വിമാനത്തെ പോലും പിന്നിലാക്കുന്ന ആഢംബരങ്ങളാണ് നിങ്ങൾക്കു കാണാനാവുക. റോഡിലൂടെ മൂന്നടി ഉയരത്തിൽ പറക്കുന്ന സെൻസാറ്റി ജെറ്റ് സ്പ്രിന്റർ മെഴ്‌സീഡിസ് എന്ന ഈ വാൻ ബ്രിട്ടനിലെ ആദ്യത്തെ ആഢംബര വാനാണെന്ന വാദവുമായാണ് നിരത്തിലിറങ്ങുന്നത്. മെഴിസീഡിസ് സ്പ്രിന്ററിനെ രൂപമാറ്റം വരുത്തി മിനുക്കിയെടുത്തതാണിത്. ഇതു സ്വന്തമാക്കുന്ന വിഐപികളുടെ ഇഷ്ടാനുസരണം ഇന്റീരിയറിൽ ആവശ്യമായ മാറ്റങ്ങൾ വരുത്തും. സീറ്റിന്റെ നിറം, ഡെസ്‌ക്, ഫ്രിഡ്ജ്, ബാത്ത് റൂം തുടങ്ങിയവയെല്ലാം ഒരുക്കിയ ഈ വാൻ ദീർഘ ദൂര യാത്രയ്ക്ക് അനുയോജ്യമായ തരത്തിലാണ് ഒരുക്കിയിട്ടുള്ളത്.

കൊവെൻട്രിയിലെ വാഹന രൂപകൽപ്പനാ കമ്പനിയായ സെൻസാറ്റിയാണ് ഒരു സ്വകാര്യ വിമാനത്തിലെ എല്ലാ സൗകര്യങ്ങളും യാത്രക്കാർക്കു നൽകുന്ന സവിശേഷമായ ഈ വാഹനം തയാറാക്കിയിരിക്കുന്നത്. ബിസിനസ് യാത്രകൾക്കും മൊബൈൽ ഓഫീസായും ചെറിയൊരു ഡിന്നർ പാർട്ടി നടത്താനും സിനിമ കാണാനുമെല്ലാം ഈ സ്പ്രിന്ററിൽ സംവിധാനമുണ്ട്. നാലു മോഡലുകളിലായി ഇറക്കിയിരിക്കുന്ന ഈ വാനിൽ എട്ട് പേർക്കു വരെ ആഢംബര യാത്ര നടത്താം. കൂടാതെ ബാത്ത് റൂമിനും വിനോദ സംവിധാനങ്ങൾക്കും ഹോം ഓഫീസായി ഉപയോഗപ്പെടുത്താനുമായി പ്രത്യേക ഇടങ്ങൾ വേറെയുമുണ്ട്. നിലവാരം കൂടിയ ലതർ കൊണ്ട് നിർമ്മിച്ച സീറ്റിൽ ഇലക്ട്രിക് ഹെഡ്‌റെസ്റ്റുകളാണ് ഉള്ളത്. വിവിധ മോഡലുകളിൽ സീറ്റിന്റെ ക്രമീകരണത്തിനനുസരിച്ചാണ് വിൻഡോ സ്്ക്രീനും ക്രമീകരിച്ചിട്ടുള്ളത്.

ഏഴടി നീളമുള്ള സൺറൂഫ് വാഹനത്തിനുള്ളിൽ അധിക വെളിച്ചം നൽകുന്നു. ഈ വാഹനം സ്വന്തമാക്കുന്നവർക്ക് ദീർഘദൂര യാത്രകളിൽ ആവശ്യമെങ്കിൽ ഹോസ്റ്റസ് സേവനവും തെരഞ്ഞെടുക്കാം. ഒരുകോടി 97ലക്ഷം രൂപയിൽ നിന്നാണ് വിലയുടെ തുടക്കം. സന്നാഹങ്ങൽ കൂടുതന്നതിനനുസരിച്ച് വില ഇതിലും കൂടും.