സെറീന വില്യംസ് ഓസ്ട്രേലിയൻ ഓപ്പണിൽ നിന്ന് പിന്മാറി; ഇരുപത്തിനാലാം ഗ്രാൻഡ് സ്ലാം കിരീടം ഇനിയും അകലെ

മെൽബൺ: ടെന്നീസ് ഇതിഹാസം സെറീന വില്യംസ് ഓസ്ട്രേലിയൻ ഓപ്പൺ ടൂർണമെന്റിൽ നിന്ന് പിന്മാറി. ആരോഗ്യ പ്രശ്നങ്ങൾ മുൻനിർത്തിയാണ് സെറീനയുടെ പിന്മാറ്റം. മുൻ ലോക ഒന്നാം നമ്പർ താരമായ സെറീന 23 തവണ ഗ്രാൻഡ്സ്ലാം കിരീടം നേടിയിട്ടുണ്ട്. ഈ വർഷം വിംബിൾഡണിൽ പങ്കെടുത്ത ശേഷം മറ്റ് ടൂർണമെന്റുകളിൽ പങ്കെടുക്കാൻ സെറീനയ്ക്ക് കഴിഞ്ഞിരുന്നില്ല.

പരിക്കുമൂലമാണ് താരത്തിന് ഈ സീസൺ മുഴുവൻ നഷ്ടമായത്. കണങ്കാലിനേറ്റ പരിക്കാണ് താരത്തിന് വെല്ലുവിളിയായത്. പരിക്കിൽ നിന്ന് മുക്തി നേടിയ സെറീന പരിശീലനം ആരംഭിച്ചിട്ടുണ്ട്.

' എന്റെ ഏറ്റവും പ്രിയപ്പെട്ട നഗരങ്ങളിലൊന്നാണ് മെൽബൺ. അവിടെ കളിക്കാനായി ഞാൻ ആഗ്രഹിക്കുന്നു. പക്ഷേ ശാരീരിക പ്രശ്നങ്ങൾ മുൻനിർത്തി ഞാൻ ഓസ്ട്രേലിയൻ ഓപ്പണിൽ നിന്ന് പിന്മാറുകയാണ്. ആരാധകരെയും മെൽബൺ നഗരത്തെയും കാണാൻ സാധിക്കാത്തതിൽ സങ്കടമുണ്ട്.'- സെറീന പറഞ്ഞു.

2021-ൽ ഓസ്ട്രേലിയൻ ഓപ്പണിന്റെ സെമിയിലെത്തിയ സെറീന ആ വർഷം ചാമ്പ്യനായ നവോമി ഒസാക്കയോട് പരാജയപ്പെട്ട് പുറത്താകുകയായിരുന്നു. നിലവിൽ ലോക റാങ്കിങ്ങിൽ 41-ാം സ്ഥാനത്താണ് സെറീന.

ഏറ്റവുമധികം ഗ്രാൻഡ് സ്ലാം കിരീടം നേടിയ വനിതാതാരം എന്ന ലോകറെക്കോഡിനൊപ്പമെത്താൻ സെറീന ഇനിയും കാത്തിരിക്കണം. 24 കിരീടങ്ങളുള്ള മാർഗരറ്റ് കോർട്ടിന്റെ പേരിലാണ് ഈ റെക്കോഡ്. ഒരു കിരീടം കൂടി നേടിയാൽ സെറീനയ്ക്ക് ഈ റെക്കോഡിനൊപ്പമെത്താം.