കരണിന്റെ പുതിയ ചിത്രത്തിൽ സിദ്ധാർത്ഥിന്റെ നായികയായി ഷാരൂഖ് ഖാന്റെ മകൾ സുഹാന അഭിനയരംഗത്ത് ചുവടുറപ്പിക്കാനൊരുങ്ങുകയാണെന്നാണ് ബോളിവുഡിലെ ഏറ്റവും പുതിയ വിശേഷമായി പരക്കുന്നത്. എന്നാൽ ഇക്കാര്യത്തിൽ ഔദ്യോഗിക വിശദീകരണം വന്നിട്ടില്ലെങ്കിലും സുഹാനയെ ചുറ്റിപ്പറ്റിയാണ് ഇപ്പോൾ ക്യാമറക്കണ്ണുകൾ.

പരിപാടികളിലും ക്രിക്കറ്റിനുമൊക്കെ അച്ഛന്റെ കൈപിടിച്ചെത്തിയിരുന്ന ആ പതിവ് സുഹാന മതിയാക്കെന്നും അടുത്തിടെയായി ബോളിവുഡിലെ താര പരിപാടികൾക്കെല്ലാം ഒറ്റയ്ക്കാണ് സുഹാനയുടെ വരവെന്നുമാണ് പാപ്പരാസികൾ കണ്ടെത്തിയിരിക്കുന്നത്. അത് ബോളിവുഡിലേക്കുള്ള ചുവടുവയ്‌പ്പിനുള്ള മുന്നോടിയാണെന്നാണ് ആരാധകർ വിലയിരുത്തുന്നത്. മാത്രമല്ല അടുത്തിടെ കരൺ ജോഹറിന്റെ പാർട്ടി കഴിഞ്ഞ് സുഹാനയും സിദ്ധാർത്ഥ് മൽഹോത്രയും പുറത്തുവന്നത് പാപ്പരാസികളുടെ കണ്ണിന് വിരുന്നായിരുന്നു.

ഇതോടെ കരണിന്റെ പുതിയ ചിത്രത്തിലൂടെ സുഹാന സിദ്ധാർത്ഥിന്റെ ജോടിയായി അഭിനയരംഗത്ത് ചുവടുറപ്പിക്കുന്നു എന്നാണ് ബോളിവുഡിൽ നിന്നുള്ള വാർത്ത. തന്റെ മകൾക്ക് അഭിനയിക്കാൻ വളരെ താത്പര്യമാണ്. പക്ഷേ എല്ലാത്തിലും വലുത് വിദ്യാഭ്യാസമാണ്. അതുകൊണ്ട് പഠിത്തം പൂർത്തിയാക്കിയാൽ സുഹാനയെ ബോളിവുഡിൽ കാണാനാകുമെന്നുമാണ് ഷാരൂഖ് പറയുന്നത്.

സ്‌കൂൾ കാലഘട്ടത്തിൽ തന്നെ തിയേറ്റർ ഡ്രാമയിൽ തത്പരയായിരുന്നു സുഹാന. എന്തായാലും ഷാരൂഖിന്റെ മൂത്ത പുത്രൻ ആര്യനു മുൻപു തന്നെ സുഹാനയുടെ അരങ്ങേറ്റം ഉണ്ടാകുമെന്നാണ് ബോളിവുഡിലെ വാർത്തകൾ സൂചിപ്പിക്കുന്നത്.