കൊച്ചി: മലയാളത്തിലെ ഇപ്പോഴത്തെ തലമുറയിലെ സംഗീത സംവിധായകരിൽ സൂപ്പർ സ്റ്റാറാണ് ഷാൻ റഹ്മാൻ, ഈ പട്ടണത്തിൽ ഭൂതത്തിലൂടെ മലയാള സിനിമയിലേക്ക് ചേക്കേറിയ ഷാനിനെ ഇന്ത്യ മുഴുവൻ പ്രശസ്തനാക്കിയത് അടുത്തിടെ പുറത്തിറങ്ങിയ വെളിപാടിന്റെ പുസ്തകം എന്ന ചിത്രത്തിലെ ജിമിക്കി കമ്മൽ എന്ന ഗാനത്തിലൂടെയായിരുന്നു.

മുൻ നിര സംഗീത സംവിധായകന്റെ നിരയിലേക്ക് ഉയർന്ന ഷാനിന് കൂട്ടായി പുതിയ വാഹനമെത്തിയിരിക്കുകയാണ്, ബിഎംഡബ്ല്യുവിന്റെ ഉടമസ്ഥതയിലുള്ള ബ്രിട്ടിഷ് വാഹന നിർമ്മാതാക്കളായ മിനിയുടെ കൂപ്പർ ഡി എന്ന വാഹനമാണ് ഷാൻ റഹ്മാൻ സ്വന്തമാക്കിയത്. മിനിയുടെ നിരയിലെ ഏറ്റവും മികച്ച വാഹനങ്ങളിലൊന്നാണ് കൂപ്പർ ഡി. കരുത്തും ആഡംബരവും ഒരുപോലെ ഒത്തിണക്കിയാണ് വാഹനത്തിനെ പുറത്തിറക്കിയത്.

പേരുപോലെതന്നെ ചെറിയ രൂപശൈലിയുള്ള കൂപ്പർ ഡിയിൽ 1.5 ലിറ്റർ 3-സിലിണ്ടർ ട്വിൻ പവർ ടർബോ ഡീസൽ എൻജിനാണ് ഉപയോഗിക്കുന്നത്. 114 എച്ച്പി കരുത്തും 1750 ആർപിഎമ്മിൽ 270 എൻഎം ടോർക്കുമുണ്ട് ഈ എൻജിന്.എൽ.ഇ.ഡി ലൈറ്റ്‌കൊണ്ട് തീർത്തതാണ് ഹെഡ് ലൈറ്റ്. പൂജ്യത്തിൽ നിന്ന് 100 കിലോമീറ്റർ വേഗത്തിലെത്താൻ 9.2 സെക്കന്റുകൾ മാത്രം മതി ഈ കരുത്തന്. മണിക്കൂറിൽ 233 കിലോമീറ്ററാണ് പരമാവധി വേഗം. ഏകദേശം 32 ലക്ഷം രൂപയാണ് വാഹനത്തിന്റെ എക്‌സ്‌ഷോറൂം വില