തൃശൂർ: തൃശൂരിൽ ഷിഗെല്ല രോഗം സ്ഥിരീകരിച്ച ഗവണ്മെന്റ് എൻജിനിയറിങ് കോളജ് പരിസരത്തെ സ്ഥാപനങ്ങളിൽ ആരോഗ്യവകുപ്പ് പരിശോധന നടത്തി. ശുചിത്വമില്ലായ്മ കണ്ടെത്തിയ ബേക്കറി അധികൃതർ അടപ്പിച്ചു. മൂന്ന് കടകൾക്ക് മുന്നറിയിപ്പു നൽകി.

എൻജിനീയറിങ് കോളജ് ഹോസ്റ്റലിലെ വിദ്യാർത്ഥിക്ക് ആണ് കഴിഞ്ഞ ദിവസം ഷിഗെല്ല സ്ഥിരീകരിച്ചത്. പുറത്ത് നിന്ന് ഭക്ഷണം കഴിച്ചതാണ് രോഗ ബാധക്ക് കാരണമെന്ന് കണ്ടെത്തിയ സാഹചര്യത്തിലാണ് ആരോഗ്യ വകുപ്പ് പരിശോധന നടത്തിയത്. കടകൾ, ഹോട്ടലുകൾ, ശീതള പാനീയ വിൽപ്പന കേന്ദ്രങ്ങൾ, ലഘു ഭക്ഷണ ശാലകൾ എന്നിവിടങ്ങളിലെല്ലാം പരിശോധന നടത്തി.

വയറിളക്കം, ഛർദി തുടങ്ങിയ രോഗലക്ഷണങ്ങളുള്ള മുപ്പതോളം വിദ്യാർത്ഥികളുണ്ട്. ചൊവ്വാഴ്ചയാണ് വിദ്യാർത്ഥികളിൽ രോഗ ലക്ഷണങ്ങൾ കണ്ട് തുടങ്ങിയത്. രണ്ട് ഹോസ്റ്റലുകളിലായി 500 ആൺകുട്ടികളും 450 പെൺകുട്ടികളുമാണ് താമസിക്കുന്നത്. രോഗ വ്യാപനം കണക്കിലെടുത്ത് കോളജ് യൂണിയൻ കലോത്സവം മാറ്റിവച്ചിട്ടുണ്ട്.

 

ആരോഗ്യവകുപ്പ്‌ബേക്കറിഷിഗെല്ല