ദോഹ. ഖത്തറിലെ പ്രമുഖ മലയാളി സംരംഭമായ റീജൻസി ഷോപ്പിങ് കോംപ്ലക്‌സ് ഉമ്മുസലാൽ അലി ഏരിയയിലെ വുസൈൽ സ്ട്രീറ്റിൽ പ്രവർത്തനമാരംഭിച്ചു. ഖത്തറിലെ സാമൂഹ്യ സാംസ്‌കാരിക വ്യാപാര മേഖലകളിലെ പ്രമുഖരുടെ സാന്നിധ്യം കൊണ്ട് ധന്യമായ ചടങ്ങിൽ ഷഹീൻ ബിൻ അലി അൽ കുവാരി, സരീഅ് ബിൻ റാഷിദ് അൽ കഅബി എന്നിവർ ചേർന്നാണ് ഉദ്ഘാടനം നിർവഹിച്ചത്. ഷാഹീൻ ബിൻ മതർ അൽ കുവാരി, ഈസ അൽ കുവാരി, യൂസുഫ് ബിൻ അഹ്മദ് അൽ കുവാരി, അബ്ദുറഹ്മാൻ ബിൻ മുഹമ്മദ് അൽ കഅബി, ഷാഹീൻ ബിൻ ഗാനം അൽ മുഹന്നദി, ഖാലിദ് ബിൻ ഗാനം അൽ കുവാരി, അലി ബിൻ അബ്ദുല്ലഅൽ കഅബി, അബ്ദുല്ല മുഹമ്മദ് അലി അൽ ഹമ്മാദി തുടങ്ങി നിരവധി പ്രമുഖർ ചടങ്ങിൽ സംബന്ധിച്ചു.

റീജൻസി ഷോപ്പിങ് കോംപ്ലക്സ് ചെയർമാൻ അലി ബിൻ അഹ്മദ് അലി റബീഅ അൽ കുവാരി, ഡയറക്ടറും ജനറൽ മാനേജറുമായ കെ. അമീറുദ്ധീൻ, ഡയറക്ടർമാരായ ശുക്കൂർ കിനാലൂർ, അബ്ദുൽ അസീസ്് അക്കര, അബ്ദുൽ ലത്തീഫ് ഉദുമ എന്നിവർ പരിപാടിക്ക് നേതൃത്വം നൽകി.

ഉമ്മുസലാൽ അലിയിലും പരിസര പ്രദേശങ്ങളിലും താമസിക്കുന്ന തൊഴിലാളികളേയും കുടുംബങ്ങളേയും മുഖ്യമായും ഉദ്ദേശിക്കുന്ന ഷോപ്പിങ് കോംപൽക്സ് കുടുംബങ്ങളേയും ബാച്ചിലർമാരേയും ഒരു പോലെ പരിഗണിച്ചാണ് സംവിധാനിച്ചിരിക്കുന്നത്. 1500 ചതുരശ്ര മീറ്റർ വിസ്തീർണത്തിൽ രണ്ട് നിലകളിലായി പ്രവർത്തിക്കുന്ന ഷോപ്പിങ് കോംപ്ലക്സിൽ ഭക്ഷ്യ ഭക്ഷ്യേതര ഇനങ്ങൾ യഥേഷ്ടം തെരഞ്ഞെടുക്കുവാനുള്ള സൗകര്യമുണ്ട്. താഴത്തെ നിലയിൽ പ്രവർത്തിക്കുന്ന സൂപ്പർമാർക്കറ്റിൽ പലചരക്ക് വ്യഞ്ജനങ്ങൾക്ക് പുറമേ ഫ്രഷ് മൽസ്യം, മാംസം, ഫ്രോസൺ ഭക്ഷ്യ ഇനങ്ങൾ തുടങ്ങിയവും പഴങ്ങളും പച്ചക്കറികളുമെല്ലാം മനോഹരമായി ക്രമീകരിച്ചിരിക്കുന്നു. ഷോപ്പിങ് ആയാസ രഹിതവും സന്തോഷ പ്രദവുമാക്കുന്നതിനുള്ള ശ്രദ്ധയോടെയുള്ള നടപടികളാണ് സ്വീകരിച്ചിരിക്കുന്നതെന്ന് അമീറുദ്ധീൻ പറഞ്ഞു.

ഒന്നാം നിലയിലെ വീട്ടുപകരണങ്ങളും ഇലക്ട്രോണിക് സാധനങ്ങളും റെഡിമെയിഡ് വസ്ത്രങ്ങളുമൊക്കെ ഏത് തരം ഉപഭോക്താക്കളേയും തൃപ്തിപ്പെടുത്തുവാൻ പോന്നവയാണ്. വാച്ച്, മൊബൈൽ, കണ്ണട, സുഗന്ധ ദ്രവ്യങ്ങൾ എന്നിവയുടെ കൗണ്ടറുകളും വിവിധതരം നട്സുകൾ, ചേക്ളേറ്റുകൾ എന്നിവയുടെ ശേഖരവും ലോണ്ടറി സൗകര്യവുമാണ് ഈ സ്ഥാപനത്തിന്റെ മറ്റൊരു പ്രത്യേകത. ഫുഡ് കോർട്ട്, ഉരീദു കൗണ്ടർ, എ.ടി. എം. സൗകര്യം, ജെന്റ്സ് സലൂൺ തുടങ്ങിയ താമസിയാതെ ഷോപ്പിങ് കോംപൽക്സിൽ പ്രവർത്തനമാരംഭിക്കുമെന്ന് അധികൃതർ വ്യക്തമാക്കി.

ഉമ്മുസലാൽ മേഖലയിൽ തൊഴിലാളികൾക്കും കുടുംബങ്ങൾക്കും പുതിയ ഷോപ്പിങ് അനുഭവം സമ്മാനിക്കുന്ന ഈ ഷോപ്പിങ് കോംപ്ലക്സ് രാവിലെ 6 മണി മുതൽ രാത്രി 12 മണി വരെ തുറന്ന് പ്രവർത്തിക്കുന്നു.