കൊച്ചി: പാർവതി-കസബ വിഷയം മലയാളത്തിൽ ചൂട് പിടിക്കുമ്പോൾ പുതിയ പ്രതികരണവുമായി നടൻ സിദ്ദിഖ് രംഗത്ത്. വിഷയത്തിൽ മമ്മൂട്ടി പ്രതികരിച്ചെന്നും സിദ്ദിഖ് വെളിപ്പെടുത്തുന്നു, 'കുട്ടികളല്ലെടാ അവരെന്തെങ്കിലും പറഞ്ഞോട്ടെ' എന്നാണ് ചിരിച്ചുകൊണ്ട് അദ്ദേഹം ഇതിന് മറുപടി പറഞ്ഞതെന്നാണ് സിദ്ദിഖ് പറഞ്ഞത്.

മാത്രമല്ല വിഷയം അവസാനിപ്പിക്കാൻ പാർവതി തന്നെ രംഗത്തെത്തണമെന്നും സിദ്ദിഖ് പറയുന്നു. മമ്മൂട്ടി പറഞ്ഞിട്ടാണോ ഇവരൊക്കെ പാർവതിയെ തെറി വിളിച്ചത് എന്ന് സിദ്ദിഖ് ഫേസ്‌ബുക്ക് ചോദിക്കുന്നു. അതിനുള്ള വഴി ഒരുക്കികൊടുത്തത് പാർവതി തന്നെയല്ലേഎന്നും അപ്പൊ അവരെ അടക്കി നിർത്താനുള്ള ബാദ്ധ്യത അല്ലെങ്കിൽ അവരോടു മറുപടി പറയാനുള്ള ബാദ്ധ്യത പാർവതിക്ക് തന്നെയാണ് എന്നും സിദ്ദിഖ് പറയുന്നു.

സിദ്ദിഖിന്റെ ഫേസ്‌ബുക്ക് പോസ്റ്റിന്റെ പൂർണരൂപം

കഴിഞ്ഞ കുറച്ചു ദിവസങ്ങളായി സമൂഹമാധ്യമങ്ങളിലെ പ്രധാന വിഷയം പാർവതിയും, കസബയും, മമ്മൂട്ടിയും ഒക്കെയാണല്ലോ? പലരുടെയും അഭിപ്രായങ്ങൾ കേട്ടപ്പോൾ എനിക്കും ഇതേക്കുറിച്ച് രണ്ടു വാക്ക് പറയണമെന്ന് തോന്നി.

സംഭവിച്ചതെന്താണ്? ഫിലിം ഫെസ്റ്റിവൽ നടക്കുന്ന സമയത്ത് ഒരു ചടങ്ങിൽ വെച്ച് നടി പാർവതി പറഞ്ഞു. കസബ എന്ന സിനിമയിൽ മമ്മൂട്ടി സ്ത്രീകളോട് മോശമായ തരത്തിൽ പെരുമാറുകയോ അവരെ ഇകഴ്‌ത്തി സംസാരിക്കുകയോ ചെയ്യുന്ന ഒരു സീനുണ്ട്. അത് കണ്ടപ്പോൾ എനിക്ക് വലിയ വിഷമം തോന്നി. മമ്മൂട്ടിയെ പോലുള്ള ഒരു നടൻ അത് ചെയ്യാൻ പാടില്ലായിരുന്നു. ഇതായിരുന്നു ആ കുട്ടി പറഞ്ഞത്. അത് ആ കുട്ടിയുടെ അഭിപ്രായമാണ്. ആർക്കും അവരവരുടെ അഭിപ്രായങ്ങൾ തുറന്നു പറയാൻ സ്വാതന്ത്ര്യമുള്ള ഒരു നാടാണ് നമ്മുടേത്. നമ്മൾ ഒരു അഭിപ്രായം പറയുമ്പോൾ അതിനെ അനുകൂലിക്കുന്നവരും എതിർക്കുന്നവരും ഉണ്ടാവാം. എതിർക്കുന്നവർ അവരുടെ എതിർപ്പുകൾ അവരവരുടെ ഭാഷയിൽ പ്രകടിപ്പിച്ചു എന്നിരിക്കും. അത് കേട്ട് വിറളി പിടിച്ചിട്ടു കാര്യമില്ല.

പാർവതിയുടെ അഭിപ്രായത്തോട് വിയോജിപ്പുള്ളവർ പറഞ്ഞ കാര്യങ്ങളിലും വസ്തുത ഉണ്ടെന്നു അത് കേട്ടവർക്കും തോന്നി. നമ്മൾ ഒരു കാര്യത്തെ കുറിച്ച് പ്രതികരിക്കുമ്പോൾ അതിനെ തുടർന്നുണ്ടാവുന്ന ഭവിഷ്യത്തുകൾ കൂടി മുന്നിൽ കാണേണ്ടേ? അല്ലാതെ ഞാൻ പറയുന്ന അഭിപ്രായങ്ങൾ എല്ലാവരും കേട്ട്‌കൊള്ളണം, അതിനെ എതിർത്ത് ആരും ഒന്നും പറയാൻ പാടില്ല എന്ന് ചിന്തിക്കുന്നത് ശരിയാണോ ?

ഇന്നിപ്പോ മറ്റൊരു സഹോദരി ഇറങ്ങിയിടുണ്ട് പാർവതിയെ എതിർക്കുന്നവരെയെല്ലാം മമ്മൂട്ടി അടക്കി ഇരുത്തണമെന്ന് പറഞ്ഞു കൊണ്ട്. മമ്മൂട്ടിക്ക് അതാണോ പണി? മമ്മൂട്ടി പറഞ്ഞിട്ടാണോ ഇവരൊക്കെ പാർവതിയെ തെറി വിളിച്ചത്? അതിനുള്ള വഴി ഒരുക്കികൊടുത്തത് പാർവതി തന്നെയല്ലേ ?? അപ്പൊ അവരെ അടക്കി നിർത്താനുള്ള ബാദ്ധ്യത അല്ലെങ്കിൽ അവരോടു മറുപടി പറയാനുള്ള ബാദ്ധ്യത പാർവതിക്ക് തന്നെയാണ്. പാർവതിയുടെ പ്രസംഗം കേട്ട അന്ന് തന്നെ ഞാൻ മമ്മൂക്കയോട് ഇതിനെ കുറിച്ച് ചോദിച്ചു. അദ്ദേഹം ചിരിച്ചുകൊണ്ടാണ് പറഞ്ഞത് ' കുട്ടികളല്ലെടാ അവരെന്തെങ്കിലും പറഞ്ഞോട്ടെ.'

പാർവതിയുടെ അത്രയും അറിവോ ഇംഗ്ലീഷ് പരിജ്ഞാനമോ അഭിനയശേഷിയോ ഒന്നും എനിക്കില്ല. ആകെ ഉള്ളത് ആ കുട്ടിയുടെ അച്ഛന്റെയോ പ്രായം മാത്രം. (അതും എന്റെ മിടുക്കല്ല) . ആ പ്രായം വച്ചുകൊണ്ടു ഒരു കാര്യം പറഞ്ഞോട്ടെ, കുട്ടീ നമ്മളൊക്കെ ഒരേ മേഖലയിൽ ജോലി ചെയ്യുന്നവരല്ലേ അവിടെ ഞങ്ങൾ പെണ്ണുങ്ങൾ, നിങ്ങൾ ആണുങ്ങൾ എന്നൊക്കെ വേണോ ?? നമ്മൾ നമ്മൾ എന്ന് മാത്രം പോരേ

മേല്പറഞ്ഞതു എന്റെ് അഭിപ്രായമാണ്. എതിർപ്പുള്ളവർ ഉണ്ടാകും. അവരുടെ എതിർപ്പുകൾ ക്ഷമയോടെ കേൾക്കാനുള്ള സഹിഷ്ണുതയും എനിക്കുണ്ട്. ഞാൻ ഉദ്ദേശിച്ചത് എന്റെഉ സഹപ്രവർത്തകരെ മറ്റുള്ളവർ തെറി വിളിക്കുന്നത് കേൾക്കാൻ ആഗ്രഹിക്കുന്നില്ല. അത്ര മാത്രം