സിംഗപ്പുർ പാസ്‌പോർട്ട് കാലാവധി പത്ത് വർഷം ആക്കി ഉയർത്തി; പ്രാബല്യത്തിൽ വരുക ഒക്ടോബർ മുതൽ അപേക്ഷിക്കുന്നവർക്ക്

16 വയസും അതിൽ കൂടുതലുമുള്ള പൗരന്മാർക്കുള്ള സിംഗപ്പൂർ പാസ്പോർട്ടിന്റെ കാലവധി 10 വർഷമായി വർദ്ധിപ്പിക്കും.ഒക്ടോബർ 1 മുതൽ പാസ്പോർട്ട് അപേക്ഷ സമർപ്പിക്കുന്നവർക്കാണ് ഈ മാറ്റം ബാധകമാകുകയെന്ന് ഇമിഗ്രേഷൻ ആൻഡ് ചെക്ക് പോയിന്റ് അഥോറിറ്റി (ഐസിഎ) അറിയിച്ചു.

ഇത് പാസ്പോർട്ട് പുതുക്കലിന്റെ ആവൃത്തി കുറയ്ക്കുക അടക്കം കൂടുതൽ സൗകര്യങ്ങൾ നല്കുവെന്നാണ് അധികൃതർ പറയുന്നത്. പാസ്‌പോർട്ട് അപേക്ഷ ഫീസ് ഇപ്പോളും 70 ഡോളർ തന്നെയായിരിക്കും.കൂടാതെ 16 വയസ്സിന് താഴെയുള്ളവർക്ക് പാസ്പോർട്ട് കാലവധി അഞ്ച് വർഷമായി തന്നെ തുടരും.

സിംഗപ്പൂർ പാസ്പോർട്ടുകൾക്ക് മുമ്പ് 10 വർഷത്തേക്ക് സാധുതയുണ്ടായിരുന്നു, എന്നാൽ 2005 ഏപ്രിലിൽ ബയോമെട്രിക് പാസ്പോർട്ട് ആരംഭിച്ചപ്പോൾ ഇത് അഞ്ചായി ചുരുക്കുകയായിരുന്നു.ബയോമെട്രിക് പാസ്പോർട്ടിൽ ഉൾച്ചേർത്ത മൈക്രോചിപ്പ് ഉൾപ്പെടുത്തിയിട്ടുണ്ട്, അതിൽ പാസ്പോർട്ട് ഉടമയുടെ ബയോമെട്രിക് വിവരങ്ങൾ, ഫേഷ്യൽ, ഫിംഗർപ്രിന്റ് ഐഡന്റിഫയറുകൾ എന്നിവ അടങ്ങിയിരിക്കുന്നു.