കൊച്ചി: അറബിക്കടലിന്റെ റാണിക്ക് ഗാനത്തിന്റെ ഭാഷയിൽ ഒരു പ്രേമലേഖനവുമായി ഗായകൻ ജി. വേണുഗോപാലും സംഘവും. കൊച്ചി നഗരത്തെ പ്രമേയമാക്കി രചിച്ച കൊച്ചി പെണ്ണെ ചുന്ദരി പെണ്ണെ എന്ന ഗാനം പുറത്തിറക്കി. വേണുഗോപാൽ സംഗീത സംവിധാനം നിർവഹിച്ച ഗാനം ഹൃദയവേണു ക്രിയേഷനാണ് അവതരിപ്പിച്ചിരിക്കുന്നത്. ബാംഗ്ലൂരിലെ ഒരു എന്റർടെയിന്മെന്റ് കമ്പനിയുടെ സാരഥികൂടിയായ ബിന്ദു പി. മേനോനാണ് കൊച്ചിപ്പെണ്ണിന്റെ വരികൾ രചിച്ചിരിക്കുന്നത്.ഹൃദ്യ ഗിരീഷ് എന്ന എട്ടാംക്ലാസ് വിദ്യാർത്ഥിനിയാണ് ഗാനം ആലപിച്ചിരിക്കുന്നത്. തിരുവനന്തപുരത്തു ഐ.ടി മേഖലയിൽ ജോലിചെയ്യുന്ന ഗിരീഷ് ഗോപിനാഥിന്റെയും രാജി സരോജിനിയുടെയും മകളാണ് ഹൃദ്യ. ഗാനത്തിന്റെ ക്രീയേറ്റീവ് ആൻഡ് ലോജിസ്റ്റിക് സപ്പോർട്ട് ബ്ലിസ്സ്‌റൂട്സ് മീഡിയയാണ്. കൊച്ചിയുടെ വീറും വാശിയും നിറഞ്ഞ ഐതീഹ്യങ്ങളെ ഉൾപ്പെടുത്തിയാണ് ഗാനം രചിച്ചിരിക്കുന്നത്.ചീനവലയിൽ നെയ്തെടുക്കുന്ന ജീവിതങ്ങളോടുള്ള സഹാനുഭൂതി നിറഞ്ഞ പ്രണയം ഈ ഗനത്തിലൂടെ പ്രേക്ഷകർക്ക് ആസ്വദിക്കാൻ കഴിയും. വാക്കുകളിലൊതുങ്ങാത്ത വിസ്മയങ്ങൾ അനുനിമിഷം സൃഷ്ടിക്കുന്ന കൊച്ചിയെന്ന മായാജാലക്കാരിയോടുള്ള അഭിനിവേശം നിറഞ്ഞ പ്രണയമാണ് കൊച്ചിപ്പെണ്ണെ ചിങ്കാരി പെണ്ണെ എന്ന ഗാനത്തിലൂടെ അണിയറപ്രവർത്തകർ പങ്കുവെക്കുന്നത്.

 

ഗാനം