'തമിഴർ എന്തിന് ഹിന്ദി സംസാരിക്കണം?; ഹിന്ദിയാണ് ദേശീയ ഭാഷയെന്ന് ഭരണഘടനയിൽ എഴുതിവച്ചിട്ടില്ല; ആവശ്യത്തിലേറെ പ്രശ്‌നങ്ങൾ രാജ്യം അഭിമുഖീകരിക്കുന്നു'; ഭാഷാ വിവാദം വെറും അനാവശ്യമെന്ന് സോനു നിഗം
മുംബൈ: ഹിന്ദി ഭാഷയുടെ പേരിൽ കന്നട സൂപ്പർ താരം 'കിച്ച' സുദീപും ബോളിവുഡ് നടൻ അജയ് ദേവ്ഗണും തമ്മിലുണ്ടായ തർക്കം ചലച്ചിത്രമേഖലയിൽ ചൂടുപിടിക്കുന്നു.ഹിന്ദി ദേശീയഭാഷാ വിവാദത്തിൽ പ്രതികരിച്ച് ഗായകൻ സോനു നിഗം രംഗത്തെത്തി. കൂടുതൽ പേർ സംസാരിക്കുന്നുണ്ടാവാമെങ്കിലും ഹിന്ദി ദേശീയ ഭാഷയല്ലെന്നാണ് അദ്ദേഹം അഭിപ്രായപ്പെട്ടത്.
ഭരണഘടനയിൽ ഒരിടത്തുപോലും ഹിന്ദിയാണ് ദേശീയഭാഷയെന്ന് പരാമർശമില്ല. മറ്റുരാജ്യങ്ങളുമായി ബന്ധപ്പെട്ട് പരിഹരിക്കേണ്ട നിരവധി പ്രശ്‌നങ്ങൾ ഇന്ത്യയിലുണ്ട്. അതുകൊണ്ടുതന്നെ ഇങ്ങനെ ഒരു പുതിയ പ്രശ്നം രാജ്യത്തിനകത്ത് രൂപപ്പെടുത്തുന്നതിൽ അർത്ഥമില്ലെന്നും സോനു നിഗം ചൂണ്ടിക്കാട്ടി.
എന്തിനാണ് വെറുതെ ഭാഷയുടെ പേരിൽ തർക്കം. അവരവർക്ക് അറിയുന്ന ഭാഷ സംസാരിക്കുക. ഹിന്ദിയേ സംസാരിക്കാവു എന്ന് പറയുന്നതൊക്കെ ന്യായീകരിക്കാനാകില്ലെന്നും സോനു പറഞ്ഞു.
ഏറ്റവും കൂടുതൽ ആളുകൾ സംസാരിക്കുന്നത് ഹിന്ദിയാണെന്ന് അറിയാം. ലോകത്തിലെ ഏറ്റവും പഴക്കമേറിയ ഭാഷ തമിഴാണെന്ന് എത്ര പേർക്ക് അറിയാം.? ഇതിന്റെ പേരിൽ സംസ്‌കൃതവും തമിഴും തമ്മിൽ തർക്കമുണ്ടായി. ആവശ്യത്തിലേറെ പ്രശ്‌നങ്ങൾ രാജ്യം അഭിമുഖീകരിക്കുകയാണ്. അതിനിടയ്ക്ക് ഇത്തരത്തിലുള്ള വിവാദമൊക്കെ രാജ്യത്തിന് തലവേദനയാണ്.
തമിഴനായ നിങ്ങൾ ഹിന്ദി സംസാരിക്കൂ എന്നൊക്കെ പറയുന്നത് എന്തിന്? അവരെന്തിന് ഹിന്ദി സംസാരിക്കണം? കോടതിയിൽ അധികവും ഉപയോഗിക്കുന്നത് ഇംഗ്ലീഷ് ആണ്. 'അത് പറ്റില്ല, ഹിന്ദിയിൽ മതി'യെന്ന് പറയാനാകുമോ?. വിമാനത്തിൽ എയർഹോസ്റ്റസിനോട് ഞാൻ ഹിന്ദിയിൽ സംസാരിക്കുമ്പോൾ അവർ ഇംഗ്ലീഷിലാണ് മറുപടി നൽകുന്നത്.
ഇംഗ്ലീഷ് നമ്മുടെ സംസ്‌കാരത്തിന്റെ ഭാഗമല്ലാത്ത ഭാഷയാണ്. എങ്കിലും നാം അത് അംഗീകരിക്കണം. യാഥാർത്ഥ്യം മനസസ്സിലാക്കണം. നമ്മുടെ രാജ്യത്ത് ഭാഷയുടെ പേരിൽ വിഭജനം ശരിയല്ല. അവരവർക്ക് അറിയാവുന്ന ഭാഷ സംസാരിക്കട്ടെ. ഇതിന്റെ പേരിലുള്ള പ്രശ്‌നങ്ങൾ അംഗീകരിക്കാനാകില്ല.സോനു നിഗം പറഞ്ഞു,
കർണാടക തക് എന്ന വാർത്താ ചാനലിന് നൽകിയ അഭിമുഖത്തിനിടെ കെ.ജി.എഫ്, പുഷ്പ പോലുള്ള ചിത്രങ്ങൾ രാജ്യാന്തര തലത്തിൽ ശ്രദ്ധനേടുന്നതിനേക്കുറിച്ച് ചോദിച്ചപ്പോഴാണ് സുദീപ ഹിന്ദി ദേശീയ ഭാഷയല്ലെന്ന് പറഞ്ഞത്. ഹിന്ദി സിനിമകളെ എന്തുകൊണ്ടാണ് പാൻ ഇന്ത്യൻ സിനിമകളെന്ന് വിളിക്കാത്തതെന്നും ഇന്ന് ഏത് സിനിമയാണ് അവരുടെ പ്രേക്ഷകരിൽ നിന്ന് നല്ല പ്രതികരണം ലഭിച്ചതെന്നും അദ്ദേഹം ചോദിച്ചിരുന്നു.
ഇതിന് ഹിന്ദിയിൽ ട്വീറ്റ് ചെയ്താണ് അജയ് ദേവ്ഗൺ മറുപടി നൽകിയത്. ഹിന്ദി എപ്പോഴും നമ്മുടെ മാതൃഭാഷയായിരിക്കുമെന്നും രാഷ്ട്രഭാഷയായിരിക്കുമെന്നും അദ്ദേഹം പറഞ്ഞു. താൻ യഥാർത്ഥത്തിൽ ഉദ്ദേശിച്ചത് എന്താണെന്ന് ഇനി നേരിൽക്കാണുമ്പോൾ വിശദമാക്കാമെന്നും ഏതെങ്കിലും തരത്തിലുള്ള വിവാദം ഉയർത്തിവിടാനോ അല്ലായിരുന്നു താൻ ശ്രമിച്ചതെന്നും സുദീപയും പറഞ്ഞു.
ഹിന്ദിയെ രാഷ്ട്രഭാഷ എന്നു വിളിക്കാൻ സാധിക്കുമെന്ന് തനിക്ക് തോന്നുന്നില്ലെന്നാണ് സംഭവത്തിൽ പ്രതികരിച്ച് സോനു സൂദ് പറഞ്ഞത്. ഹിന്ദി തമിഴ്, കന്നഡ ഭാഷകളേക്കാൾ മുമ്പേ നിലവിലുള്ളതാണ് സംസ്‌കൃത ഭാഷ. അതിനാൽ സംസ്‌കൃതമാണ് ദേശീയ ഭാഷയാകേണ്ടതെന്ന് നടി കങ്കണയും പ്രതികരിച്ചിരുന്നു.
