കൊച്ചി: മലയാളത്തിലെ വലിയ ഹിറ്റുകളിൽ ഒന്നാണ് മോഹൻലാൽ-ഭദ്രൻ ടീമിന്റെ സ്ഫടികം. 23 വർഷങ്ങൾക്കിപ്പുറം ചിത്രത്തിന്റെ രണ്ടാം ഭാഗം പ്രഖ്യാപിച്ചിരിക്കുകയാണ് യുവസംവിധായകനായ ബിജു ജെ കട്ടയ്ക്കൽ. 'സ്ഫടികം 2 ഇരുമ്പൻ' എന്ന പേരിൽ രണ്ടാം ഭാഗം ഒരുക്കുന്നതെന്നും പ്രഖ്യാപിച്ചു. എന്നാൽ ഈ കളിവേണ്ടെന്നാണ് സംവിധായകൻ ഭദ്രന്റെ പ്രതികരണം. താൻ സിനിമ എടുക്കാൻ അനുവദിക്കില്ലെന്ന മട്ടിൽ ഭദ്രൻ ഇന്ന് ഫെയ്‌സ് ബുക്ക് പോസ്റ്റുമിട്ടു. സ്ഫടികം ഒന്നേയുള്ള...അതു സംഭവിച്ചു കഴിഞ്ഞു; മോനേ...ഇത് എന്റെ റെയ്ബാൻ ഗ്ലാസ്! അതിലെങ്ങാനും നീ തൊട്ടാൽ......ഇങ്ങനെയാണ് കുറിപ്പ്.

ഇതോടെയാണ് സ്ഫടികത്തിന്റെ രണ്ടാം ഭാഗത്തിന് ഭദ്രൻ എതിരാണെന്ന് വ്യക്തമാകുന്നത്. 'യുവേഴ്സ് ലവിങ്ലി' എന്ന ചിത്രത്തിന്റെ സംവിധായകനായ ബിജുവിന്റെ രണ്ടാം ചിത്രമായാണ് 'സ്ഫടികം 2 ഇരുമ്പൻ' പ്രഖ്യാപിച്ചത്. എന്നാൽ വൻ എതിർപ്പാണ് ആരാധകർ ഉയർത്തുന്നത്. 'തോമാച്ചായൻ എന്നാൽ ലാലേട്ടനല്ല. അഭിനയിച്ച നടനോളമോ അതിലേറെയോ വളർന്ന ഒറ്റ കഥാപാത്രമേ ഉള്ളു മലയാളക്കരയിൽ. അത് തോമാച്ചായനാ. അതെങ്ങാനും നീ തൊട്ടു നശിപ്പിച്ചാൽ അന്ന് തീരുമാനം ആവും നിന്റെ കരിയർ'. 'ചേട്ടാ ...വെറുതെ ഒരു സീൻ ഉണ്ടാക്കണ്ട ..സ്ഫടികത്തിനു ജനങ്ങളുടെ മനസ്സിൽ ഒരു സ്ഥാനം ഉണ്ട് ...അത് ഒരിക്കലും മായുകയും ഇല്ല ...അത് നശിപ്പിക്കരുത് ...അപേക്ഷയാണ്'.

'ഇതിൽ ആടുതോമ ഉണ്ടായിരുന്നെങ്കിൽ ഞങ്ങളുടെ ഏട്ടനെ ഒന്നു കൂടി കാണാനുള്ള കൊതി കൊണ്ട് ഞങ്ങൾ സമ്മതിച്ചേനെ... ഞങ്ങൾടെ ഏട്ടനില്ലാത്ത ഒരു സ്ഫടികം ഞങ്ങൾക്ക് വേണ്ട... ഇനിയും ഇറക്കാൻ ധൈര്യമുണ്ടെങ്കിൽ ഇറക്കിക്കോ .. പക്ഷെ അതിന് വേണ്ടി മുടക്കിയ ഒരു 5പൈസ പോലും അതിന് കിട്ടില്ല.. ഓർത്തു വെച്ചോ'... എന്നിങ്ങനെ പോകുന്നു മോഹൻലാൽ ആരാധകരുടെ കമന്റുകൾ. ആടുതോമയുടെ മകൻ ഇരുമ്പൻ സണ്ണിയുടെ കഥയാണ് സ്ഫടികം 2 എന്നാണ് സംവിധായകൻ വ്യക്തമാക്കുന്നത്. മലയാളത്തിന്റെ യുവ സൂപ്പർതാരമാണ് ചിത്രത്തിൽ നായകനായി എത്തുന്നതെന്നും അദ്ദേഹം പറയുന്നു.

ബോളിവുഡിന്റെ ഹോട്ട്താരം സണ്ണി ലിയോണും ചിത്രത്തിലുണ്ടാകുമെന്ന് അണിയറ പ്രവർത്തകർ അവകാശപ്പെടുന്നുണ്ട്. സ്ഫടികത്തിൽ സിൽക്ക് സ്മിത അവതരിപ്പിച്ച ലൈലയുടെ മകളായാണ് സണ്ണി എത്തുന്നതെന്നാണ് പറയുന്നത്. ഹോളിവുഡ് നിർമ്മാണക്കമ്പനിയായ മൊമന്റം പിക്ചേഴ്സ് നിർമ്മാണത്തിൽ സഹകരിക്കുന്നുണ്ടെന്നും ഫേസ്‌ബുക്ക് പോസ്റ്റിൽ പറയുന്നു. മോഹൻലാലിന്റെ സിനിമാ ജീവിതത്തിലെ ഏറ്റവും മികച്ച കഥാപാത്രങ്ങളിൽ ഒന്നാണ് സ്ഫടികത്തിലെ ആടുതോമ. ഇന്നും തോമയും സ്ഫടികവും ആരാധകർക്ക് ആവേശമാണ്. ഭദ്രൻ സംവിധാനം ചെയ്ത സൂപ്പർ ഹിറ്റ് ചിത്രത്തിനു രണ്ടാം ഭാഗം ഒരുങ്ങുന്നുവെന്ന വാർത്ത സമൂഹമാധ്യമലോകത്തു ഹിറ്റായിക്കഴിഞ്ഞു.

സ്ഫടികത്തിന്റെ രണ്ടാം ഭാഗം ഒരുക്കാൻ നീക്കമുണ്ടായിരുന്നെങ്കിലും അത്തരമൊരു തുടർച്ച സ്ഫടികം ആവശ്യപ്പെടുന്നില്ല എന്നായിരുന്നു ഭദ്രന്റെ നിലപാട്. സ്ഫടികത്തിനു രണ്ടാം ഭാഗം സൃഷ്ടിക്കാൻ തനിക്കെന്നല്ല ആർക്കും കഴിയില്ലെന്നും അദ്ദേഹം മുമ്പുള്ള അഭിമുഖങ്ങളിൽ വ്യക്തമാക്കിയിരുന്നു. ഈ നിലപാടിൽ ഉറച്ച് നിൽക്കുകയാണ് ഭദ്രൻ ഇപ്പോഴും.