തിരുവനന്തപുരം: മുഖ്യമന്ത്രിയുടെ വാഹനത്തിന് നേരെ കരിങ്കൊടി കാണിക്കുന്നതിനിടെ അകമ്പടി വാഹനം തട്ടി കോൺഗ്രസ് പ്രവർത്തകർക്ക് പരിക്ക്. നാല് പേർക്കാണ് പരിക്കേറ്റത്. ഒരാളുടെ നില അതീവ ഗുരുതരം.യൂത്ത് കോൺഗ്രസ് പ്രവർത്തകരായ രാജീവ്, വിപിൻ, കോൺഗ്രസ് പ്രവർത്തകരായ മുനീർ കൃഷ്ണകുമാർ എന്നിവർക്കാണ് പരിക്കേറ്റത്. രാജീവിനെയും വിപിനെയും ജനറൽ ആശുപത്രിയിൽ പ്രവേശിപ്പിച്ചു. മുനീർ, കൃഷ്ണകുമാർ എന്നിവർ മെഡിക്കൽ കോളേജ് ആശുപത്രിയിലാണ്. ഇവരിൽ രാജീവിനെ തീവ്ര പരിചരണ വിഭാഗത്തിൽ പ്രവേശിപ്പിച്ചിരിക്കുകയാണ്.

മുഖ്യമന്ത്രിയുടെ വാഹനവ്യൂഹത്തിന് മുന്നിലേക്ക് കരിങ്കൊടികളുമായി ചാടിവീഴുമ്പോഴായിരുന്നു അപകടം. അതിവേഗത്തിൽ എത്തിയ മുഖ്യമന്ത്രിയുടെ അകമ്പടി വാഹനം പ്രവർത്തകരെ ഇടിച്ചിടുകയായിരുന്നു.ശബരിമലയിലെ യുവതീ പ്രവേശനത്തിൽ പ്രതിഷേധിച്ച് ഇന്ന് യു.ഡി.എഫ് കരിദിനം ആചരിച്ചിരുന്നു. ഇതിന്റെ ഭാഗമായി തിരുവനന്തപുരം ബേക്കറി ജംഗ്ഷനിൽ വച്ച് യൂത്ത് കോൺഗ്രസ് പ്രവർത്തകർ കരിങ്കൊടി കാണിക്കാനായി മുഖ്യമന്ത്രിയുടെ വാഹനവ്യൂഹത്തിന് മുന്നിലേക്ക് ചാടിവീഴുകയായിരുന്നു.

ഇതിനിടയിലാണ് പ്രവർത്തകർക്ക് പരിക്കേറ്റത്. അപ്രതീക്ഷിതമായി പ്രവർത്തകർ ചാടിവീണത് കണ്ട് ഡ്രൈവർ വാഹനം വെട്ടിച്ചപ്പോഴാണ് പ്രവർത്തകർക്ക് പരിക്കേറ്റതെന്നാണ് പൊലീസ് വൃത്തങ്ങൾ നൽകുന്ന വിശദീകരണം.അതേസമയം പ്രവർത്തകർക്ക് പരിക്കേറ്റ സംഭവത്തിൽ മുഖ്യമന്ത്രിയ്‌ക്കെതിരെ കെ മുരളീധരൻ എംഎൽഎ രംഗത്തെത്തി. മുഖ്യമന്ത്രിയെ കരിങ്കൊടി കാണിക്കുന്നത് ആദ്യ സംഭവം അല്ല. പ്രതിഷേധക്കാരെ വാഹനം കൊണ്ട് ഇടിപ്പിക്കുകയായിരുന്നുവെന്നും മുരളീധരൻ ആരോപിച്ചു.

ശബരിമല കർമ്മസമിതി പ്രഖ്യാപിച്ച ഹർത്താലിൽ സംസ്ഥാനത്തിന്റെ വിവിധയിടങ്ങളിൽ പരക്കെ അക്രമം. ഹർത്താൽ അനുകൂലികളുടെ പ്രകടനത്തിനിടെ മാധ്യമപ്രവർത്തകർക്ക് നേരെ അക്രമം. ഏഷ്യാനെറ്റ് ന്യൂസ് കാമറമാൻ ബൈജു വി.മാത്യൂവിന് പരിക്ക്. പാലക്കാട് സിപിഐ ജില്ലാകമ്മിറ്റി ഓഫീസും പരിസരത്ത് നിർത്തിയിട്ട വാഹനങ്ങളും അനുകൂലികൾ അടിച്ചു തകർത്തു.പന്തളത്ത് സിപിഎം ഓഫീസിന് നേരെ ആക്രണം. മലപ്പുറത്തെ സംഘർഷത്തെ തുടർന്ന് പൊലീസ് കണ്ണീർവാതകം പ്രയോഗിച്ചു.

തലശേരിയിൽ സിപിഎം ബിജെപി സംഘർഷത്തെ തുടർന്ന് ബോംബേറ് ഉണ്ടായി. തലശേരിക്കടുത്തുകൊളശേരിയിലാണ് ബോംബേറ് നടന്നത്. എന്നാൽ എറിഞ്ഞ രണ്ട് ബോംബുകൾ പൊട്ടാത്തതിനെ തുടർന്ന് വലിയ ഒരു അപകടം ഒഴിവായി. കണ്ണൂർ ഇന്ത്യൻ കോഫി ഹൗസ് അടപ്പിക്കാൻ ഹർത്താൽ അനുകൂലികൾ ശ്രമം നടത്തി. എന്നാൽ പരിസരത്ത് സിപിഎം പ്രവർത്തകർ കൂട്ടം കൂടി നിന്നതിനാൽ ശ്രമം ഉപേക്ഷിക്കുകയായിരുന്നു.

കരിങ്കൊടി