തൊടുപുഴ: ആറാം ക്ലാസ് വിദ്യാർത്ഥിനിക്കു നേരെ ലൈംഗിക അതിക്രമം നടത്തിയ കായിക അദ്ധ്യാപകൻ അറസ്റ്റിൽ. കോതമംഗലം വാരപ്പെട്ടി ചൂണ്ടേക്കാട്ടിൽ ജീസ് തോമസ്(48) ആണ് തൊടുപുഴ പൊലീസിന്റെ പിടിയിലായത്. 9, 10 തിയതികളിലായി ക്ലാസ് മുറിയിലും പരിശീലന സ്ഥലങ്ങളിലും വെച്ച് പല തവണ ഇയാൾ 11 കാരിയെ ലൈഗികമായി ചൂഷണം ചെയ്യാൻ ശ്രമിച്ചിരുന്നു. വിദ്യാർത്ഥിനി വിവരം മാതാപിതാക്കളെ അറിയിച്ചു.

ഇവർ ആദ്യം ചൈൽഡ് ലൈനിൽ വിവരം അറിയിച്ചു. ചൈൽഡ് ലൈൻ അധികൃതർ സ്‌കൂൾ പ്രിൻസിപ്പലിന് വിവരം കൈമാറി.പിന്നാലെ സ്‌കൂൾ അധികൃതർ ജീസിനെതിരെ പൊലീസിൽ പരാതി നൽകുകയായിരുന്നു.. പരാതിയുടെ അടിസ്ഥാനത്തിൽ ഇന്ന് രാവിലെ തൊടുപുഴ പൊലീസ് ഇയാളെ അറസ്റ്റ് ചെയ്തു. ജീസ് വിദ്യാർത്ഥിനിയെ ശരിയല്ലാത്ത രീതിയിൽ തൊടുന്നതും, പിടിക്കുന്നതും കണ്ടിട്ടുണ്ടെന്ന് സഹപാഠികളുടെ മൊഴി ഉണ്ടെന്ന് പൊലീസ് പറയുന്നു.

പ്രതിക്കെതിരെ പോക്സോ നിയമ പ്രകാരവും ഐപിസി 354 വകുപ്പ് പ്രകാരവുമാണ് കേസെടുത്തിരിക്കുന്നത്. ഇയാൾ ഇത്തരത്തിൽ മറ്റു കുട്ടികളോട് പെരുമാറിയിട്ടുണ്ടോ എന്നുള്ളതും അന്വേഷിക്കുന്നുണ്ട്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

പ്രകാശ് ചന്ദ്രശേഖര്‍

    മറുനാടന്‍ മലയാളി ലേഖകന്‍.