ലക്‌നൗ: കളിയിൽ താളം കണ്ടെത്തിയില്ലെന്നും, ആത്മവിശ്വാസം ഇല്ലാത്ത കൂട്ടരുമെന്ന വിമർശനങ്ങൾക്ക് മറുപടിയായി ഡൽഹി ക്യാപ്പിറ്റൽസ് ലക്‌നൗ സൂപ്പർ ജയന്റ്‌സിന് ആറ് വിക്കറ്റിന് കീഴടക്കി.

ഓസ്‌ട്രേലിയൻ യുവതാരം ജേക് ഫ്രേസർ മക്കർഗിന്റെ തകർപ്പനടികളും, നായകൻ റിഷഭ് പന്തുമായുള്ള അർദ്ധ സെഞ്ചുറി കൂട്ടുകെട്ടുമാണ് ഡൽഹിയെ വിജയികളാക്കിയത്. ഫ്രേസൽ മക്കർഗ് 35 പന്തിൽ 55 റൺസെടുത്തു. 24 പന്തിൽ 41 റൺസ് എടുത്ത റിഷഭ് പന്തുമായി 77 റൺസിന്റെ കൂട്ടുകെട്ടുണ്ടാക്കുകയും ചെയ്തു. 18.1 ഓവറിൽ ( 11 പന്തുകൾ ബാക്കി നിൽക്കെ) ഡൽഹി വിജയലക്ഷ്യത്തിലെത്തി. ഇത് സീസണിലെ രണ്ടാം ജയമാണ്. തുടർതോൽവികളുമായി പോയിന്റ് പട്ടികയിൽ ഏറ്റവും താഴെയായിരുന്ന ഡൽഹിക്ക് ഈ ജയം ഊർജ്ജം പകരും.

നേരത്തെ ആയുഷ് ബദോണിയുടെയും അർഷദ് ഖാന്റെയും കൂട്ടുകെട്ടാണ് ലക്‌നൗവിനെ ഏഴുവിക്കറ്റ് നഷ്ടത്തിൽ 167 റൺസിൽ എത്തിച്ചത്. ബദോണി പുറത്താകാതെ 55 റൺസെടുത്തു. കുൽദീപ് യാദവ് ആയിരുന്നു ഡൽഹിയുടെ കുന്തമുന. കുൽദീപ്: 3/20.ഖലീൽ അഹമ്മദ്:2 /41

ജയത്തോടെ ഡൽഹി ഒമ്പതാം സ്ഥാനത്തേക്ക് കയറി. ആറു മത്സരങ്ങളിൽനിന്ന് നാലു പോയന്റ്. ഒരു ജയം മാത്രമുള്ള റോയൽ ചലഞ്ചേഴ്‌സ് ബംഗളൂരു അവസാന സ്ഥാനത്തേക്ക് വീണു.