മുംബൈ: ഇന്ത്യൻ പ്രീമിയർ ലീഗിൽ മുംബൈ ഇന്ത്യൻസിനെ തോൽപ്പിച്ചിരിക്കയാണ് ചെന്നൈ സൂപ്പർ കിങ്‌സ്. ചെന്നൈ ഉയർത്തിയ 207 റൺസ് വിജയലക്ഷ്യം പിന്തുടർന്ന മുംബൈയ്ക്ക് ഒരു ഘട്ടത്തിൽ വിജയപ്രതീക്ഷ ഉണ്ടായിരുന്നു. എന്നാൽ ആവേശം നിറഞ്ഞ പോരാട്ടത്തിൽ 20 റൺസിന്റെ ജയമാണ് ചെന്നൈ നേടിയത്. മത്സരശേഷം പരാജയകാരണം വിശദീകരിച്ച മുംബൈ നായകൻ ഹാർദ്ദിക് പാണ്ഡ്യ ധോണിയെ ചൂണ്ടിക്കാട്ടി.

മുംബൈയ്ക്ക് വിജയിക്കാൻ കഴിയുന്ന ലക്ഷ്യമായിരുന്നു മുന്നിലുണ്ടായിരുന്നത്. പക്ഷേ ചെന്നൈ ബൗളർമാർ നന്നായി പന്തെറിഞ്ഞു. അതിനുള്ള പദ്ധതികൾ ചെന്നൈയ്ക്ക് മുന്നിൽ ഉണ്ടായിരുന്നു. അതിന് കാരണം വിക്കറ്റിന് പിന്നിൽ മഹേന്ദ്ര സിങ് ധോണി ഉണ്ടായിരുന്നുവെന്നതാണ്. ഓരോ താരത്തിനും എത്തരത്തിലുള്ള പദ്ധതികൾ വേണമെന്ന് ധോണിക്ക് അറിയാമെന്നും ഹാർദ്ദിക്ക് തുറന്നുസമ്മതിച്ചു.

പതിരാന പന്തെറിയാൻ എത്തിയതോടെയാണ് മത്സരം മാറിയത്. പിന്നീട് ബാറ്റിങ് ബുദ്ധിമുട്ടായി മാറി. ഓരോ സമയത്തെയും മികച്ച പ്രകടനമാണ് മത്സരഫലം നിർണയിക്കുന്നത്. മുംബൈ ഇന്ത്യൻസിന് അടുത്ത നാല് മത്സരങ്ങൾ നിർണായകമാണ്. മികച്ച ക്രിക്കറ്റ് കളിച്ചാൽ ഒരു തിരിച്ചുവരവിന് സാധിക്കുമെന്നും മുംബൈ നായകൻ വ്യക്തമാക്കി.