നാലാം മത്സരത്തില്‍ ടോസിലെ ഭാഗ്യം ഗില്ലിന്; ഇന്ത്യ ഫീല്‍ഡിംഗ് തെരഞ്ഞെടുത്തു; തുഷാര്‍ ദേശ്പാണ്ഡെക്ക് അരങ്ങേറ്റം; സിംബാബ്വെയ്ക്ക് മികച്ച തുടക്കം
ഹരാരെ: ട്വന്റി 20 പരമ്പരയിലെ നാലാം മത്സരത്തില്‍ സിംബാബ്വെക്ക് മികച്ച തുടക്കം. ടോസ് നഷ്ടപ്പെട്ട് ബാറ്റിംഗിന് ഇറങ്ങിയ ആതിഥേയര്‍ മൂന്ന് ഓവര്‍ പിന്നിടുമ്പോള്‍ വിക്കറ്റ് നഷ്ടം കൂടാതെ 25 റണ്‍സ് എന്ന നിലയിലാണ്.
ടോസ് നേടിയ ഇന്ത്യ ബൗളിംഗ് തെരഞ്ഞെടുക്കുകയായിരുന്നു. ജയത്തോടെ പരമ്പര ഉറപ്പിക്കാനാണ് ഇന്ത്യ ഇന്നിറങ്ങുന്നതെങ്കില്‍ തിരിച്ചടിച്ച് പരമ്പരയില്‍ ഒപ്പമെത്താനാണ് സിംബാബ്വെയുടെ ശ്രമം. പരമ്പരയിലെ ആദ്യ മത്സരത്തില്‍ ഇന്ത്യന്‍ യുവനിര ഞെട്ടിക്കുന്ന തോല്‍വി വഴങ്ങിയപ്പോള്‍ ശക്തമായി തിരിച്ചടിച്ച് രണ്ടും മൂന്നും മത്സരങ്ങളിലെ ആധികാരിക ജയവുമായി പരമ്പരയില്‍ 2-1ന് മുന്നിലെത്തിയിരുന്നു.
കഴിഞ്ഞ മത്സരം കളിച്ച ടീമില്‍ ഒരു മാറ്റവുമായാണ് ഇന്ത്യയും സിംബാബ്വെയും ഇറങ്ങുന്നത്. പേസര്‍ ആവേശ് ഖാന് പകരം തുഷാര്‍ ദേശ്പാണ്ഡെ ഇന്ത്യയുടെ പ്ലേയിംഗ് ഇലവനിലെത്തി. സിംബാബ്വെ ടീമിലും ഒരു മാറ്റമുണ്ട്. വെല്ലിംഗ്ടണ്‍ മസകാഡ്‌സക്ക് പകരം ഫരാശ് അക്രം സിംബാബ്വെയുടെ പ്ലേയിംഗ് ഇലവനിലെത്തി.
ഓപ്പണറെന്ന നിലയില്‍ 200ന് മുകളില്‍ സ്‌ട്രൈക്ക് റേറ്റില്‍ അടിച്ചു തകര്‍ക്കുന്ന അഭിഷേക് ശര്‍മ ഇന്ന് യശസ്വി ജയ്‌സ്വാളിനൊപ്പം ഓപ്പണ്‍ ചെയ്യുമോ എന്നാണ് ആരാധകര്‍ ഉറ്റുനോക്കുന്നത്. കഴിഞ്ഞ മത്സരത്തില്‍ അഭിഷേകിനെ മൂന്നാം നമ്പറിലേക്ക് മാറ്റിയതില്‍ ക്യാപ്റ്റന്‍ ശുഭ്മാന്‍ ഗില്ലിനെതിരെ വിമര്‍ശനം ഉയര്‍ന്നിരുന്നു. ബാറ്റിംഗ് അനായാസമല്ലാതിരുന്ന പിച്ചില്‍ 134 സ്‌ട്രൈക്ക് റേറ്റിലായിരുന്നു ഗില്ലിന്റെ ബാറ്റിംഗ്. കഴിഞ്ഞ മത്സരത്തില്‍ നാാലം നമ്പറിലിറങ്ങിയ റുതുരാജ് ഗെയ്ക്വാദ് 200 സ്‌ട്രൈക്ക് റേറ്റിലായിരുന്നു ബാറ്റ് ചെയ്തത്.
ബാറ്റിംഗ് നിരയില്‍ മറ്റ് പരീക്ഷണങ്ങള്‍ക്കൊന്നും ഇന്ത്യ തയാറായിട്ടില്ല. ഗില്‍, ജയ്‌സ്വാള്‍, അഭിഷേക്, റുതുരാജ്, സഞ്ജു സാംസണ്‍, റിങ്കു സിംഗ്, ശിവം ദുബെ എന്നിവര്‍ തുടര്‍ന്നപ്പോള്‍ നാലു സ്‌പെഷലിസ്റ്റ് ബൗളര്‍മാര്‍ മാത്രമാണ് ഇന്ത്യയുടെ പ്ലേയിംഗ് ഇലവനിലുള്ളത്. അഞ്ചാം ബൗളറുടെ റോള്‍ അഭിഷേക് ശര്‍ക്കും ശിവം ദുബെക്കുമാണ്. കഴിഞ്ഞ മത്സരത്തില്‍ ഇരുവരുമെറിഞ്ഞ നാലോവറില്‍ സിംബാബ്വെ 50 റണ്‍സിനടുത്ത് സ്‌കോര്‍ ചെയ്തിരുന്നു.
ശ്രീലങ്കക്കെതിരായ ഏകദിന ടി20, പരമ്പരകള്‍ക്കുള്ള ടീമിനെ അടുത്ത ആഴ്ച പ്രഖ്യാപിക്കാനിരിക്കെ സിംബാബ്വെ പരമ്പരയിലെ പ്രകടനം സഞ്ജു അടക്കമുള്ള താരങ്ങള്‍ക്ക് നിര്‍ണായകമാണ്.
