മുംബൈ: ടി20 ലോകകപ്പിന് മുന്നോടിയായി ടീം ഇന്ത്യയുടെ പുതിയ ജേഴ്‌സി ബിസിസിഐ പുറത്തിറക്കി. സ്‌കൈ ബ്ലൂ ഷെയ്ഡിലുള്ളതാണ് ടീം കുപ്പായം. 2007-08 കാലത്തായിരുന്നു ഇതിന് മുമ്പ് ടീം ഇന്ത്യ ആകാശനീല നിറത്തിലുള്ള ജേഴ്‌സിയണിഞ്ഞത്.2007ലെ ഏകദിന ലോകകപ്പിനായാണ് കുപ്പായം അന്ന് പ്രധാനമായും പുറത്തിറക്കിയതെങ്കിലും പിന്നാലെ എം എസ് ധോണിയുടെ നേതൃത്വത്തിൽ പ്രഥമ ടി20 ലോകകപ്പ് ടീം ഇന്ത്യ ഉയർത്തിയത് സമാന ടീം ജേഴ്‌സിയിലായിരുന്നു.

ബിസിസിഐയും സ്‌പോൺസർമാരായ എംപിഎല്ലും ചേർന്ന് സാമൂഹ്യമാധ്യമങ്ങളിലൂടെയാണ് ഔദ്യോഗിക ടി20 ജേഴ്‌സി പുറത്തിറക്കിയത്. ജേഴ്‌സിയിൽ മാറ്റം വരുമെന്ന സൂചന ഒരാഴ്ച മുമ്പ് ബിസിസിഐ ട്വിറ്ററിലൂടെ നൽകിയിരുന്നു. ഒരു വർഷത്തിനിടെ രണ്ടാം മാറ്റമാണ് ജേഴ്‌സിൽ വരുന്നത്. കഴിഞ്ഞ വർഷം യുഎഇയിലെ ടി20 ലോകകപ്പിന് മുമ്പ് ബിസിസിഐ ടീമിന്റെ കുപ്പായത്തിൽ മാറ്റങ്ങൾ വരുത്തിയിരുന്നു.

 

മൊഹാലിയിൽ ഓസ്‌ട്രേലിയക്കെതിരെ ചൊവ്വാഴ്ച നടക്കുന്ന ആദ്യ ടി20യിൽ ഇന്ത്യ ഇറങ്ങുക പുതിയ ജേഴ്‌സിലായിരിക്കും. ലോകകപ്പിന് യാത്രതിരിക്കും മുമ്പ് ദക്ഷിണാഫ്രിക്കയ്ക്ക് എതിരെയും ഇന്ത്യക്ക് ടി20 പരമ്പരയുണ്ട്. ഓസ്‌ട്രേലിയയിൽ ഒക്ടോബർ-നവംബർ മാസങ്ങളിലായാണ് ടി20 ലോകകപ്പ് നടക്കുക.

ടി20 ലോകകപ്പിനുള്ള ഇന്ത്യൻ സ്‌ക്വാഡ്: രോഹിത് ശർമ്മ(ക്യാപ്റ്റൻ), കെ എൽ രാഹുൽ(വൈസ് ക്യാപ്റ്റൻ), വിരാട് കോലി, സൂര്യകുമാർ യാദവ്, ദീപക് ഹൂഡ, റിഷഭ് പന്ത്(വിക്കറ്റ് കീപ്പർ), ദിനേശ് കാർത്തിക്(വിക്കറ്റ് കീപ്പർ), ഹാർദിക് പാണ്ഡ്യ, ആർ അശ്വിൻ, യുസ്വേന്ദ്ര ചാഹൽ, അക്സർ പട്ടേൽ, ജസ്പ്രീത് ബുമ്ര, ഭുവനേശ്വർ കുമാർ, ഹർഷൽ പട്ടേൽ, അർഷ്ദീപ് സിങ്.

സ്റ്റാൻഡ് ബൈ താരങ്ങൾ- മുഹമ്മദ് ഷമി, ശ്രേയസ് അയ്യർ, രവി ബിഷ്ണോയി, ദീപക് ചാഹർ.

സ്പോർട്സ് ഡെസ്ക്

    സ്പോർട്സ് ഡെസ്ക്