മുംബൈ: ഏകദിന ലോകകപ്പിൽ ആരാധകർ ഏറെ പ്രതീക്ഷയോടെ കാത്തിരിക്കുന്ന ഇന്ത്യ- പാക്കിസ്ഥാൻ മത്സര തിയതിയിൽ മാറ്റം. ഒക്ടോബർ 15ന് അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടത്താൻ പദ്ധതിയിട്ടിരുന്ന മത്സരം ഒരു ദിവസം മുന്നേ 14-ാം തിയതി നടക്കും എന്നാണ് ദേശീയ മാധ്യമമായ ഇന്ത്യ ടുഡേ റിപ്പോർട്ട് ചെയ്യുന്നത്. നവരാത്രി ആഘോഷങ്ങളുടെ തുടക്കമായതിനാലാണ് തീയതിൽ മാറ്റം വരുത്തിയത്. എന്നാൽ വേദി അഹമ്മദാബാദ് ആയി തുടരും. ലോകകപ്പിലെ മറ്റ് ചില മത്സരങ്ങളുടെ തിയതിയും മാറും. പുതുക്കിയ മത്സരക്രമം ഇന്ന് പ്രഖ്യാപിക്കും എന്നും ഇന്ത്യ ടുഡേയുടെ റിപ്പോർട്ടിൽ പറയുന്നു.

ഇന്ത്യ വേദിയാവുന്ന ഏകദിന ലോകകപ്പിലെ ഏറ്റവും ആവേശം നിറഞ്ഞ പോരാട്ടമാണ് ഇന്ത്യ- പാക് മത്സരം. ഒക്ടോബർ 15ന് ലോകത്തെ ഏറ്റവും വലിയ ക്രിക്കറ്റ് സ്റ്റേഡിയമായ അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ അയൽക്കാരുടെ പോരാട്ടം നടത്താനാണ് നേരത്തെ നിശ്ചയിച്ചിരുന്നത്. എന്നാൽ നവരാത്രി ആഘോഷങ്ങളുടെ ആദ്യ ദിവസമാണ് അന്നേദിനം എന്നതിനാൽ സുരക്ഷയൊരുക്കുക വെല്ലുവിളിയാണെന്ന് സുരക്ഷാ ഏജൻസികൾ അറിയിച്ചതോടെ മത്സര തിയതി മാറ്റാൻ ഐസിസിയും ബിസിസിഐയും നിർബന്ധിതമാവുകയായിരുന്നു.

ഇത് അനുസരിച്ചാണ് ഏറ്റവും കൂടുതൽ ആരാധകരെത്തുന്ന മത്സരം ഒരു ദിവസം മുമ്പേ നടത്താൻ തീരുമാനിച്ചിരിക്കുന്നത്. മത്സരങ്ങൾ അടുത്തടുത്ത് വരുന്നതിനാൽ തിയതി മാറ്റം ആവശ്യമാണെന്ന് ചില ബോർഡുകൾ ബിസിസിഐ അറിയിച്ചിരുന്നു. ഇത് പരിഗണിച്ച് കൂടുതൽ കളികളുടെ പുതുക്കിയ മത്സരക്രമം പ്രഖ്യാപിക്കാനിടയുണ്ട്. ഇന്ത്യ- പാക് മത്സരത്തിന്റെ തിയതി മാറ്റിയത് ഇതിനകം ഹോട്ടൽ മുറികളും വിമാന ടിക്കറ്റുകളും ബുക്ക് ചെയ്ത ആരാധകരെ പ്രതികൂലമായി ബാധിക്കും.

അടുത്തടുത്ത് മത്സരങ്ങൾ വരുന്നതിനാൽ കളികൾ തമ്മിൽ ഇടവേള കൂടുതൽ വേണമെന്ന് വിവിധ ക്രിക്കറ്റ് ബോർഡുകൾ ആവശ്യപ്പെട്ടതാണ് വിവരം. ഇന്ത്യ വേദിയാവുന്ന ഏകദിന ലോകകപ്പിന്റെ മത്സരക്രമത്തിൽ ഇതോടെ അടിമുടി മാറ്റങ്ങൾ വന്നേക്കും.

'രണ്ട് മത്സരങ്ങൾ തമ്മിലുള്ള ഇടവേള കുറവായതിനാൽ ഷെഡ്യൂൾ മാറ്റണം എന്ന് ചില അംഗ രാഷ്ട്രങ്ങൾ ആവശ്യപ്പെട്ടിട്ടുണ്ട്. മത്സരങ്ങളുടെ തിയതിയും സമയവും മാറ്റാനാണ് പരിശ്രമിക്കുന്നത്. എന്നാൽ വേദികൾ മാറ്റമുണ്ടാകില്ല. എന്തായാലും ഇക്കാര്യങ്ങളിൽ രണ്ടുമൂന്ന് ദിവസം കൊണ്ട് തീരുമാനമാകും' എന്നും ജയ് ഷാ വ്യക്തമാക്കി. മത്സരക്രമം മാറ്റണമെന്ന് ആവശ്യപ്പെട്ട ബോർഡുകളിൽ പിസിബി ഉണ്ടോയെന്ന് വ്യക്തമല്ല. ഒക്ടോബർ 5 മുതൽ നവംബർ 19 വരെയാണ് 10 ടീമുകൾ മാറ്റുരയ്ക്കുന്ന ഏകദിന ലോകകപ്പിന് ഇന്ത്യ ആതിഥേയത്വമരുളുന്നത്.

അഹമ്മദാബാദിലെ നരേന്ദ്ര മോദി സ്റ്റേഡിയം, ബെംഗളൂരുവിലെ എം ചിന്നസ്വാമി സ്റ്റേഡിയം, ചെന്നൈയിലെ എം എ ചിദംബരം സ്റ്റേഡിയം, ഡൽഹിയിലെ അരുൺ ജെയ്റ്റ്ലി സ്റ്റേഡിയം, ധരംശാലയിലെ ഹിമാചൽപ്രദേശ് ക്രിക്കറ്റ് അസോസിയേഷൻ സ്റ്റേഡിയം, ഹൈദരാബാദിലെ രാജീവ് ഗാന്ധി സ്റ്റേഡിയം, കൊൽക്കത്തയിലെ ഈഡൻ ഗാർഡൻസ്, ലഖ്നൗവിലെ ഏകനാ സ്റ്റേഡിയം, മുംബൈയിലെ വാംഖഡെ സ്റ്റേഡിയം, പുനെയിലെ മഹാരാഷ്ട്ര ക്രിക്കറ്റ് അസോസിയേഷൻ സ്റ്റേഡിയം എന്നിവിടങ്ങളിലായാണ് ലോകകപ്പ് മത്സരങ്ങൾ നടക്കുക. ലോകകപ്പിന്റെ ടിക്കറ്റ് വിൽപന ഇതുവരെ ആരംഭിച്ചിട്ടില്ല. ഓഗസ്റ്റ് പത്താം തിയതി ഓൺലൈനിൽ ടിക്കറ്റ് ലഭ്യമാകും എന്നാണ് പ്രതീക്ഷ.

സ്പോർട്സ് ഡെസ്ക്

    സ്പോർട്സ് ഡെസ്ക്