മിന്നുന്ന തുടക്കമിട്ട് രോഹിതും ശുഭ്മാനും; സെഞ്ചുറി കൂട്ടുകെട്ടുയർത്തി ഇരുവരും മടങ്ങി; തിരിച്ചടിച്ച് രാഹുലും കോലിയും; ഏഷ്യാ കപ്പ് സൂപ്പർ ഫോറിൽ പാക്കിസ്ഥാനെതിരെ ഇന്ത്യ മികച്ച സ്‌കോറിലേക്ക്; മത്സരം മുടക്കി മഴ
കൊളംബോ: ഏഷ്യാ കപ്പിന്റെ സൂപ്പർ ഫോറിലെ ഇന്ത്യ - പാക്കിസ്ഥാൻ ആവേശപ്പോരാട്ടം മുടക്കി കനത്ത മഴ. ടോസ് നഷ്ടപ്പെട്ട് ആദ്യം ബാറ്റ് ചെയ്ത ഇന്ത്യ 24.1 ഓവറിൽ രണ്ട് വിക്കറ്റ് നഷ്ടത്തിൽ 147 റൺസ് എന്ന നിലയിൽ നിൽക്കെയാണ് മഴയെത്തിയത്. 16 പന്തിൽ എട്ട് റൺസുമായി വിരാട് കോലിയും 28 പന്തിൽ 17 റൺസുമായി കെ എൽ രാഹുലുമാണ് ക്രീസിൽ.
ഓപ്പണിങ് വിക്കറ്റിൽ സെഞ്ചുറി കൂട്ടുകെട്ട് പടുത്തുയർത്തിയ രോഹിത് ശർമ്മയും ശുഭ്മാൻ ഗില്ലുമാണ് ഇന്ത്യക്ക് മികച്ച തുടക്കം സമ്മാനിച്ചത്. ഇരുവരും അർധ സെഞ്ചുറി നേടിയതിന് പിന്നാലെ പുറത്തായി. ടോസ് ലഭിച്ച പാക്കിസ്ഥാൻ ഇന്ത്യയെ ബാറ്റിംഗിന് അയക്കുകയായിരുന്നു.
ഓപ്പണർമാർ ഗംഭീര തുടക്കമാണ് ഇന്ത്യക്ക് നൽകിയത്. ഓപ്പണിങ് വിക്കറ്റിൽ ഇരുവരും 121 റൺസ് കൂട്ടിചേർത്തു. ഗില്ലായിരുന്നു കൂടുതൽ അപകടകാരി. രോഹിത്താവട്ടെ നസീം ഷാക്കെതിരെ താളം കണ്ടെത്താൻ ബുദ്ധിമുട്ടുകയും ചെയ്തു. എങ്കിലും ഷഹീനെതിരെ സിക്സടിച്ചാണ് രോഹിത് തുടങ്ങിയത്. മറുവശത്ത് ഗിൽ ഉത്തരവാദിത്തം ഏറ്റെടുത്തു. നസീമിനെതിരെ വിയർത്തെങ്കിലും വൈകാതെ രോഹിത്തും സ്വതസിദ്ധമായ ശൈലിയിലേക്ക് മാറി. രോഹിത്താണ് ആദ്യം മടങ്ങുന്നത്.
37 ബോളിൽ നിന്ന് ഗിൽ ആണ് ആദ്യം അർധ ശതകം തികച്ചത്. വൈകാതെ 42 ബോളിൽ രോഹിതും അർധ സെഞ്ചുറി നേടി. 49 പന്തിൽ ആറ് ബൗണ്ടറിയും നാല് സിക്‌സറുമടക്കം 56 റൺസ് എടുത്തു നിൽക്കെ ഷദാബ് ഖാന്റെ പന്തിൽ ഫഹീം അഷ്റഫിന് ക്യാച്ച് നൽകി രോഹിത് മടങ്ങി. തൊട്ടടുത്ത ഓവറിൽ ഷഹീൻ അഫ്രീദിയെ പന്തേൽപ്പിച്ച ബാബർ അസമിന് തെറ്റിയില്ല. മികച്ച ഫോമിൽ ബാറ്റിങ് തുടർന്ന ശുഭ്മാൻ ഗില്ലിനെ അഫ്രീദി പുറത്താക്കി. 52 പന്തിൽ പത്ത് ബൗണ്ടറിയടക്കം 58 റൺസ് എടുത്ത ഗിൽ ആഗ സൽമാന് ക്യാച്ച് നൽകി മടങ്ങി.
ഇന്ത്യൻ നിരയിൽ കെ എൽ രാഹുൽ വിക്കറ്റ് കീപ്പറായി തിരിച്ചെത്തിയപ്പോൾ ശ്രേയസ് അയ്യർ പ്ലേയിങ് ഇലവനിൽ നിന്ന് പുറത്തായി. പാക്കിസ്ഥാനെതിരായ ഗ്രൂപ്പ് മത്സരത്തിൽ 81 പന്തിൽ 82 റൺസടിച്ച് ഇന്ത്യൻ ഇന്നിങ്‌സിനെ താങ്ങി നിർത്തിയ ഇഷാൻ കിഷൻ പ്ലേയിങ് ഇലവനിൽ സ്ഥാനം നിലനിർത്തി.
നേപ്പാളിനെതിരെ കഴിഞ്ഞ മത്സരം കളിച്ച ടീമിൽ പേസർ മുഹമ്മദ് ഷമി പ്ലേയിങ് ഇലവനിൽ നിന്ന് പുറത്തായപ്പോൾ ജസ്പ്രീത് ബുമ്ര പ്ലേയിങ് ഇലവനിൽ തിരിച്ചെത്തി. ഷാർദ്ദുൽ താക്കൂറും ഹാർദ്ദിക് പാണ്ഡ്യയുമാണ് ടീമിലെ മറ്റ് പേസർമാർ. സ്പിന്നർമാരായി രവീന്ദ്ര ജഡേജയും കുൽദീപ് യാദവുമാാണ് ടീമിലുള്ളത്. ബംഗ്ലാദേശിനെതിരെ കഴിഞ്ഞ മത്സരം കളിച്ച ടീമിൽ മാറ്റങ്ങളൊന്നും ഇല്ലാതെയാണ് പാക്കിസ്ഥാൻ ഇറങ്ങിയത്.
സൂപ്പർ ഫോറിലെ ആദ്യ മത്സരത്തിൽ പാക്കിസ്ഥാൻ ബംഗ്ലാദേശിനെ ഏഴ് വിക്കറ്റിന് തകർത്തിരുന്നു. ഇന്ത്യയുടെ ആദ്യ സൂപ്പർ ഫോർ പോരാട്ടമാണിത്. ഇന്ന് ഇന്ത്യയെ തോൽപ്പിച്ചാൽ പാക്കിസ്ഥാന് ഫൈനൽ ഉറപ്പിക്കാം. ശ്രീലങ്കയാണ് അവസാന മത്സരത്തിൽ പാക്കിസ്ഥാന്റെ എതിരാളികൾ. പാക്കിസ്ഥാനെതിരായ മത്സരശേഷം ഇന്ത്യക്ക് ബംഗ്ലാദേശിനും ശ്രീലങ്കക്കുമെതിരെ മത്സരങ്ങളുണ്ട്.
ഇന്ത്യ പ്ലേയിങ് ഇലവൻ: രോഹിത് ശർമ്മ, ശുഭ്മാൻ ഗിൽ, വിരാട് കോഹ്ലി, കെഎൽ രാഹുൽ, ഇഷാൻ കിഷൻ, ഹാർദിക് പാണ്ഡ്യ, രവീന്ദ്ര ജഡേജ, ഷാർദുൽ താക്കൂർ, കുൽദീപ് യാദവ്, ജസ്പ്രീത് ബുമ്ര, മുഹമ്മദ് സിറാജ്.
പാക്കിസ്ഥാൻ പ്ലേയിങ് ഇലവൻ: ഫഖർ സമാൻ, ഇമാം ഉൾ ഹഖ്, ബാബർ അസം, മുഹമ്മദ് റിസ്വാൻ ആഗ സൽമാൻ, ഇഫ്തിഖർ അഹമ്മദ്, ഷദാബ് ഖാൻ, ഫഹീം അഷ്റഫ്, ഷഹീൻ അഫ്രീദി, നസീം ഷാ, ഹാരിസ് റൗഫ്.
