ബംഗളൂരു: ഏകദിന ലോകകപ്പിൽ നിലവിലെ ചാമ്പ്യന്മാരെന്ന വമ്പുമായെത്തിയ ഇംഗ്ലണ്ടിനെ തകർത്ത് തരിപ്പണമാക്കി ശ്രീലങ്കയും. ലോകകപ്പിൽ തുടർച്ചയായ മൂന്നാം തോൽവിയാണ് ജോസ് ബട്‌ലറും സംഘവും നേരിട്ടത്. അഞ്ച് മത്സരങ്ങളിൽ നാല് മത്സരങ്ങളിലും പരാജയപ്പെട്ടതോടെ ഇംഗ്ലണ്ടിന്റെ സെമി പ്രതീക്ഷ തുലാസിലായി. ശേഷിക്കുന്ന നാല് മത്സരങ്ങളിലും ജയിച്ചാൽ പോലും സെമി ബർത്ത് ഉറപ്പില്ല.

ബംഗളൂരു, ചിന്നസ്വാമി സ്റ്റേഡിയത്തിൽ ശ്രീലങ്കയ്ക്കെതിരെ എട്ട് വിക്കറ്റിന്റെ കനത്ത പരാജയമാണ് ഇംഗ്ലണ്ട് നേരിട്ടത്. ടോസ് നേടി ബാറ്റിങ് തിരഞ്ഞെടുത്ത ഇംഗ്ലണ്ട് കേവലം 33.2 ഓവറിൽ 156ന് എല്ലാവരും പുറത്തായി. മറുപടി ബാറ്റിംഗിൽ ശ്രീലങ്ക 25.4 ഓവറിൽ രണ്ട് വിക്കറ്റ് മാത്രം നഷ്ടത്തിൽ ലക്ഷ്യം മറികടന്നു. അഞ്ച് മത്സരങ്ങൾ പൂർത്തിയാക്കിയ ഇംഗ്ലണ്ടിന് ഇതുവരെ ഒരു മത്സരത്തിൽ മാത്രമാണ് ജയിക്കാനായത്. എട്ടാം സ്ഥാനത്താണ് ഇംഗ്ലണ്ട്. ഇത്രയും മത്സരങ്ങളിൽ രണ്ട് ജയമുള്ള ശ്രീലങ്ക ഏഴാമതും.

ചെറിയ വിജയലക്ഷ്യത്തിലേക്ക് മോശം തുടക്കമാണ് ശ്രീലങ്കയ്ക്ക് ലഭിച്ചത്. 23 റൺസിനിടെ അവർക്ക് കുശാൽ പെരേര (4), കുശാൽ മെൻഡിസ് (4) എന്നിവരുടെ വിക്കറ്റുകൾ നഷ്ടമായി. എന്നാൽ പതും നിസ്സങ്ക (77), സദീര സമരവിക്രമ (65) സഖ്യം ലങ്കയെ അനായാസം വിജയത്തിലേക്ക് നയിച്ചു. ഇരുവരും 137 റൺസ് കൂട്ടിചേർത്തു. 83 പന്തുകൾ നേരിട്ട നിസ്സങ്ക രണ്ട് സിക്സും ഫോറും ഫോറും നേടി. സമരവിക്രമയുടെ അക്കൗണ്ടിൽ ഒരു സിക്സും ഏഴ് ഫോറുമുണ്ടായിരുന്നു.

മോശമല്ലാത്ത തുടക്കമാണ് ഇംഗ്ലണ്ടിന് ലഭിച്ചത്. ജോണി ബെയർസ്റ്റോ (30) ഡേവിഡ് മലാൻ (28) സഖ്യം ഒന്നാം വിക്കറ്റിൽ 45 റൺസ് കൂട്ടിചേർത്തു. എന്നാൽ മലാനെ പുറത്താക്കി മാത്യൂസ് ലങ്കയ്ക്ക് ബ്രേക്ക് ത്രൂ നൽകി. മാത്രമല്ല, മൂന്നാമായി എത്തിയ ജോ റൂട്ട് (3) റണ്ണൗട്ടായി മടങ്ങിയത് ഇംഗ്ലണ്ടിന് തിരിച്ചടിയായി. പിന്നീട് കൃത്യമായി ഇടവേളകളിൽ ഇംഗ്ലണ്ടിന് വിക്കറ്റ് നഷ്ടമായി. ബെയർസ്റ്റോയെ കശുൻ രചിത മടക്കി.

ജോസ് ബട്ലർ (8), ലിയാം ലിവിങ്സ്റ്റൺ (1), മൊയീൻ അലി (15), ക്രിസ് വോക്സ് (0) എന്നിവരരെല്ലാം നിരാശപ്പെടുത്തി. ഇതിനിടെ ആശ്വാസമായത് സ്റ്റോക്സിന്റെ ഇന്നിങ്സായിരുന്നു. പുറത്താവാതെ 14 റൺസ് നേടിയ ഡേവിഡ് വില്ലി സ്‌കോർ 150 കടക്കാൻ സഹായിച്ചു. ആദിൽ റഷീദ് (2), മാർക് വുഡ് (5) എന്നിവരാണ് പുറത്തായ മറ്റുതാരങ്ങൾ. ലാഹിരു കുമാര മൂന്ന് വിക്കറ്റ് വീഴ്‌ത്തി. മൂന്ന് വർഷങ്ങൾക്ക് ശേഷം ഏകദിന ടീമിലേക്ക് തിരിച്ചെത്തിയ എയഞ്ചലോ മാത്യൂസ്, കശുൻ രജിത എന്നിവർ രണ്ട് വിക്കറ്റ് വീഴ്‌ത്തി. മഹീഷ് തീക്ഷണയ്്ക്ക് ഒരു വിക്കറ്റുണ്ട്.

സ്പോർട്സ് ഡെസ്ക്

    സ്പോർട്സ് ഡെസ്ക്