ജൊഹാനസ്‌ബെർഗ്: ദക്ഷിണാഫ്രിക്കയ്‌ക്കെതിരായ ഏകദിന ക്രിക്കറ്റ് പരമ്പരയിലെ ആദ്യ മത്സരത്തിൽ ഇന്ത്യയ്ക്ക് എട്ടു വിക്കറ്റിന്റെ അവിസ്മരണീയ വിജയം. ദക്ഷിണാഫ്രിക്ക ഉയർത്തിയ 117 റൺസ് വിജയ ലക്ഷ്യം ഇരുന്നൂറ് പന്തുകൾ ശേഷിക്കെ രണ്ടു വിക്കറ്റ് നഷ്ടത്തിൽ ഇന്ത്യൻ യുവനിര മറികടന്നു. ഇതോടെ മൂന്ന് മത്സരങ്ങളുടെ പരമ്പരയിൽ ഇന്ത്യ 1-0ത്തിന് മുന്നിലെത്തി. ചൊവ്വാഴ്ച പോർട്ട് എലിസബത്തിലാണു പരമ്പരയിലെ രണ്ടാം മത്സരം.

ഓപ്പണർ സായ് സുദർശൻ അരങ്ങേറ്റ മത്സരത്തിൽ അർധ സെഞ്ചറി നേടി. 43 പന്തുകളിൽ 55 റൺസെടുത്തു താരം പുറത്താകാതെനിന്നു. ശ്രേയസ് അയ്യരും അർധ സെഞ്ചറിയുമായി തിളങ്ങി. 45 പന്തുകളിൽ 52 റൺസെടുത്താണു ശ്രേയസ് മടങ്ങിയത്. 16.4 ഓവറിൽത്തന്നെ ഇന്ത്യ ലക്ഷ്യം മറികടന്നു. ഇരുവരുടെയും കൂട്ടുകെട്ടാണ് ഇന്ത്യക്ക് കരുത്തായത്. 

സ്‌കോർബോർഡിൽ 23 റൺസ് മാത്രമുള്ളപ്പോൾ ഇന്ത്യക്ക് റുതുരാജ് ഗെയ്കവാദിന്റെ (5) വിക്കറ്റ് നഷ്ടമായിരുന്നു. എന്നാൽ മൂന്നാം വിക്കറ്റിൽ സായ് - ശ്രേയസ് സഖ്യം നേടിയ 88 റൺസ് വിജയത്തിൽ നിർണായക പങ്കുവഹിച്ചു. വിജയത്തിനരികെ ശ്രേയസ് മടങ്ങി. 45 പന്തുകൾ നേരിട്ട താരം ഒരു സിക്സും ആറ് ഫോറും നേടി. നാലാമനായി ക്രീസിലെത്തിയ തിലക് വർമെ (1) കൂട്ടുപിടിച്ച് സായ് വിജയം പൂർത്തിയാക്കി. ഒമ്പത് ഫോറുകൾ ഉൾപ്പെടുന്നതായിരുന്നു സായിയുടെ ഇന്നിങ്സ്. മലയാളി താരം സഞ്ജു സാംസണ് ബാറ്റ് ചെയ്യാൻ അവസരം ലഭിച്ചില്ല.

ആദ്യം ദക്ഷിണാഫ്രിക്കയെ 116 റൺസിന് എറിഞ്ഞൊതുക്കി പിന്നാലെ പക്വതയ്യാർന്ന കളിയോടെ ഇന്ത്യൻ യുവനിര വിജയലക്ഷ്യം തൊട്ടു. അർശ്ദീപ് സിങ്ങിന്റെ അഞ്ചുവിക്കറ്റ് പ്രകടനമാണ് ഇന്ത്യൻ വിജയത്തിൽ പ്രധാനം. ഇന്ത്യൻ ബാറ്റർമാരിൽ സായ് സുദർശൻ അരങ്ങേറ്റ മത്സരം തന്നെ ഗംഭീരമാക്കി. ഋതുരാജ് ഗെയ്ക്വാദിനൊപ്പം ഓപ്പണിങ്ങിൽ ഇറങ്ങിയ സുദർശന്റെ അർധ സെഞ്ചുറി പ്രകടനമാണ് (43 പന്തിൽ 55 റൺസ്) ഇന്ത്യൻ ഇന്നിങ്സിൽ നിർണായകമായത്. ശ്രേയസ് അയ്യരും അർധ സെഞ്ചുറി നേടി (45 പന്തിൽ 52 റൺസ്). ടീം സ്‌കോർ 23-ൽ നിൽക്കേ വിയാൻ മുൾഡറിന്റെ പന്തിനു മുന്നിൽ കുരുങ്ങി ഗെയ്ക്വാദാണ് ആദ്യം മടങ്ങിയത്.

പിന്നാലെ ശ്രേയസ് അയ്യരും സുദർശനും ചേർന്ന് വിജയലക്ഷ്യത്തിലേക്ക് ബാറ്റേന്തി. വിജയിക്കാൻ ആറു റൺസ് ബാക്കിയിരിക്കേ, ശ്രേയസ് അയ്യർ മടങ്ങി. ഫെഹ്ലുക്വായയുടെ പന്തിൽ ഡേവിഡ് മില്ലറിന് ക്യാച്ച് നൽകുകയായിരുന്നു. പിന്നാലെയെത്തിയ തിലക് വർമയെത്തി സുദർശനൊപ്പം ചേർന്ന് കളി ജയിപ്പിച്ചു.

ടോസ് നേടി ബാറ്റിങ്ങിന് ഇറങ്ങിയ ദക്ഷിണാഫ്രിക്ക 27.3 ഓവറിൽ 116 റൺസെടുത്തു പുറത്തായിരുന്നു. 49 പന്തുകളിൽ 33 റൺസെടുത്ത ആൻഡിലെ പെഹ്‌ലുക്വായോയാണ് ദക്ഷിണാഫ്രിക്കയുടെ ടോപ് സ്‌കോറർ. അർഷ്ദീപ് സിങ് അഞ്ചു വിക്കറ്റുകൾ വീഴ്‌ത്തി. ആവേശ് ഖാൻ നാലും കുൽദീപ് യാദവ് ഒരു വിക്കറ്റും നേടി. വാലറ്റത്ത് പെഹ്‌ലുക്വായോ നടത്തിയ ചെറുത്തുനിൽപാണ് ദക്ഷിണാഫ്രിക്കയെ നൂറു കടത്തിയത്.

സ്വന്തം നാട്ടിൽ ഏകദിന ക്രിക്കറ്റിൽ ദക്ഷിണാഫ്രിക്ക നേടുന്ന ഏറ്റവും ചെറിയ സ്‌കോറാണിത്. ഏകദിന ക്രിക്കറ്റിൽ ദക്ഷിണാഫ്രിക്കയ്‌ക്കെതിരെ അവരുടെ നാട്ടിൽ അഞ്ച് വിക്കറ്റു വീഴ്‌ത്തുന്ന ആദ്യ ഇന്ത്യൻ പേസറുമായി അർഷ്ദീപ് സിങ്.

രണ്ടാം ഓവറിലെ നാലാം പന്തിൽ റീസ ഹെന്റിക്‌സിനെ പൂജ്യത്തിനു ബോൾഡാക്കി അർഷ്ദീപ് സിങ്ങാണ് ഇന്ത്യയുടെ വിക്കറ്റു വേട്ടയ്ക്കു തുടക്കമിട്ടത്. തൊട്ടടുത്ത പന്തിൽ റാസി വാൻ ഡർ ദസനെ ഗോൾഡൻ ഡക്കാക്കി അർഷ്ദീപ് പ്രഹരം തുടർന്നു. ടോണി ഡെ സോർസിയും ക്യാപ്റ്റൻ എയ്ഡൻ മാർക്രമും ചേർന്നു രക്ഷാപ്രവർത്തനത്തിനു ശ്രമിച്ചെങ്കിലും അധികനേരം ക്രീസിൽ തുടരാനായില്ല.

സ്‌കോർ 42 ൽ നിൽക്കെ ടോണി ഡെ സോർസിയെ അർഷ്ദീപ് വിക്കറ്റ് കീപ്പർ കെ.എൽ. രാഹുലിന്റെ കൈകളിലെത്തിച്ചു. ഹെന്റിച് ക്ലാസനെയും അർഷ്ദീപ് ബോൾഡാക്കി. 11ാം ഓവറിലെ ആദ്യ രണ്ടു പന്തുകളിൽ മാർക്രമിനെയും വിയാൻ മുൾഡറെയും ആവേശ് ഖാൻ മടക്കി. 13ാം ഓവറിൽ ആവേശ് ഖാന്റെ പന്തിൽ ഡേവിഡ് മില്ലറെ രാഹുൽ ക്യാച്ചെടുത്തു പുറത്താക്കി.

17ാം ഓവറിൽ കേശവ് മഹാരാജ് മടങ്ങിയെങ്കിലും പെഹ്‌ലുക്വായോ നിലയുറപ്പിച്ചതോടെ ആതിഥേയർ 100 കടന്നു. രണ്ട് സിക്‌സും മൂന്നു ഫോറുകളുമാണു താരം ബൗണ്ടറി കടത്തിയത്. എട്ടു പന്തുകൾ നേരിട്ട ടബരെയ്‌സ് ഷംസി 11 റൺസുമായി പുറത്താകാതെനിന്നു

ലോകകപ്പ് ഫൈനലിലെ തോൽവിക്കുശേഷം ഇന്ത്യയുടെ ആദ്യ ഏകദിന മത്സരമാണിത്. രോഹിത്തും കോലിയുമില്ലാതെ മുമ്പും പരമ്പരകൾ കളിച്ചിട്ടുണ്ടെങ്കിലും ഭാവി ഇന്ത്യൻ ടീമിനെ കണ്ടെത്തുന്നതിന്റെ തുടക്കം എന്നനിലയ്ക്കാണ് ഇക്കുറി തീർത്തും പുതിയൊരു ടീമിനെ ഇറക്കിയത്.

സ്പോർട്സ് ഡെസ്ക്

    സ്പോർട്സ് ഡെസ്ക്