ലക്‌നൗ: ഉത്തർപ്രദേശ് സർക്കാർ നൽകിയ പാരിതോഷികത്തിൽനിന്നു പിതാവിനു കാർ വാങ്ങി നൽകാൻ പണം മാറ്റിവച്ച് ഇന്ത്യൻ ക്രിക്കറ്റ് താരം റിങ്കു സിങ്. ഏഷ്യൻ ഗെയിംസിൽ വിജയം നേടിയ ഇന്ത്യൻ ടീമിന്റെ ഭാഗമായതിനാണ് ഉത്തർപ്രദേശ് സർക്കാർ റിങ്കു സിങ്ങിന് പാരിതോഷികം പ്രഖ്യാപിച്ചത്. മൂന്നു കോടി രൂപയാണു ഇന്ത്യൻ താരത്തിനു ലഭിക്കുക. ഇത് ഉപയോഗിച്ച് പിതാവ് ഖൻചന്ദ്ര സിങ്ങിനു കാർ വാങ്ങി നൽകാനാണ് ഇന്ത്യൻ താരത്തിന്റെ തീരുമാനം.

ഉത്തർപ്രദേശിലെ അലിഗഢ് ജില്ലയിലെ ഒരു സാധാരണ കുടുംബത്തിൽ നിന്നാണ് റിങ്കു സിങ് വരുന്നത്. മകൻ പ്രശസ്തിയുടെ ഉന്നതിയിൽ എത്തിനിൽക്കുമ്പോഴും ഇപ്പോഴും ഒരു സാധാരണക്കാരന്റെ ജീവിതം നയിക്കുന്നയാളാണ് റിങ്കുവിന്റെ അച്ഛൻ. പാചക വാതക സിലിണ്ടർ വിതരണ ജോലി ചെയ്യുന്ന റിങ്കുവിന്റെ പിതാവ് കഴിഞ്ഞ ദിവസം വാർത്തകളിൽ നിറഞ്ഞിരുന്നു. വാഹനത്തിൽനിന്ന് സിലിണ്ടർ എടുത്തു വയ്ക്കുന്ന റിങ്കുവിന്റെ പിതാവിന്റെ ദൃശ്യങ്ങൾ സമൂഹമാധ്യമങ്ങളിൽ വൈറലായിരുന്നു. പിതാവിനോടു വിശ്രമിക്കാൻ ആവശ്യപ്പെട്ടിരുന്നെങ്കിലും അദ്ദേഹം അതിനു തയാറല്ലെന്നാണു റിങ്കു സിങ് ഇതേക്കുറിച്ചു പ്രതികരിച്ചത്.

വിശ്രമിക്കാൻ പിതാവിനോട് ആവശ്യപ്പെട്ടിരുന്നെന്നും എന്നാൽ അദ്ദേഹം സ്വന്തം ജോലിയെ വളരെയേറെ ഇഷ്ടപ്പെടുന്നതായും റിങ്കു സിങ് വ്യക്തമാക്കി. ഇന്ത്യയ്ക്കായി 15 ട്വന്റി20 മത്സരങ്ങൾ കളിച്ച റിങ്കു സിങ് 89 ആവറേജിൽ 356 റൺസാണ് ഇതുവരെ നേടിയത്. ഇന്ത്യൻ പ്രീമിയർ ലീഗിൽ കൊൽക്കത്ത നൈറ്റ് റൈഡേഴ്‌സിന്റെ താരമാണ് റിങ്കു സിങ്. ഈ വർഷം നടക്കുന്ന ട്വന്റി20 ലോകകപ്പിലും താരം കളിക്കുമെന്ന പ്രതീക്ഷയിലാണ് ആരാധകർ.

ഇന്ത്യൻ ക്രിക്കറ്റ് പ്രേമികളുടെ മനസ്സിൽ റിങ്കു സിങ് സ്റ്റാറാണ്. ഇന്ത്യൻ ക്രിക്കറ്റിന് ലഭിച്ച പുതുതലമുറയിലെ മികച്ച വാഗ്ദാനമാണ് റിങ്കു എന്നാണ് ആരാധകർ പറയുന്നത്. രഞ്ജി ട്രോഫിയിൽ യു.പി.ക്കുവേണ്ടിയും ഐ.പി.എലിൽ കൊൽക്കത്ത നൈറ്റ് റൈഡേഴ്സിനു വേണ്ടിയും മികച്ച പ്രകടനം പുറത്തെടുത്തതിനു പിന്നാലെ കഴിഞ്ഞ വർഷമാണ് താരം ഇന്ത്യയുടെ സീനിയർ ടീമിലെത്തുന്നത്.

കഴിഞ്ഞ വർഷം ഇടംകൈയൻ സീമർ യാഷ് ദയാലിനെ ഒരോവറിൽ അഞ്ച് സിക്സറുകൾ പറത്തി ഗുജറാത്ത് ടൈറ്റൻസിനെതിരെ കൊൽക്കത്ത നൈറ്റ് റൈഡേഴ്സിന് തകർപ്പൻ ജയം നേടിക്കൊടുത്തതോടെയാണ് റിങ്കു ശരിക്കും സ്റ്റാറായത്.