ജംഷേദ്പുർ: ഇന്ത്യൻ ക്രിക്കറ്റ് താരം സൗരഭ് തിവാരി പ്രൊഫഷണൽ ക്രിക്കറ്റിൽ നിന്ന് വിരമിച്ചു. രഞ്ജി ട്രോഫിയിൽ ഝാർഖണ്ഡിനായി കളിക്കുന്ന 34-കാരനായ താരം രാജസ്ഥാനെതിരായ അവസാന ഗ്രൂപ്പ് മത്സരം തന്റെ അവസാനത്തേതാകുമെന്നാണ് പ്രഖ്യാപിച്ചത്. ഇന്ത്യൻ ജേഴ്സിയിൽ മൂന്ന് മത്സരങ്ങൾ മാത്രമാണ് കളിക്കാനായത്. ഐപിഎല്ലിലും അവസരം നഷ്ടപ്പെട്ടതോടെയാണ് 34ാം വയസ്സിൽ വിരമിക്കൽ പ്രഖ്യാപിച്ചത്.

"സ്‌കൂൾ കാലത്തിനു മുൻപേ തുടങ്ങിയ ഈ യാത്ര അവസാനിപ്പിക്കുന്നതു കുറച്ചു ബുദ്ധിമുട്ടോടെയാണ്. എന്നാൽ പറ്റിയ സമയം ഇതാണെന്ന് ഞാൻ ഉറച്ചു വിശ്വസിക്കുന്നു. ദേശീയ ടീമിലും ഐപിഎല്ലിലും ഇടമില്ലെങ്കിൽ, സംസ്ഥാന ടീമിലെ സ്ഥാനം ഒരു യുവതാരത്തിനായി ഒഴിഞ്ഞു കൊടുക്കുന്നതാണു നല്ലത്. യുവതാരങ്ങൾക്ക് ഇന്ത്യൻ ടെസ്റ്റ് ടീമിൽ ഒരുപാട് അവസരങ്ങൾ ലഭിക്കുന്നുണ്ട്. അതുകൊണ്ടാണ് ഞാൻ ഈ തീരുമാനം എടുക്കുന്നത്." സൗരഭ് തിവാരി പ്രതികരിച്ചു.

"എന്റെ പ്രകടനം പരിഗണിച്ചല്ല ഇങ്ങനെയൊരു തീരുമാനം. രഞ്ജി ട്രോഫിയിലും കഴിഞ്ഞ സീസണിലും എന്റെ പ്രകടനം നിങ്ങൾക്കു മുന്നിലുണ്ട്. ക്രിക്കറ്റ് മാത്രമാണ് എനിക്ക് അറിയാവുന്ന കാര്യം. അതുകൊണ്ടു തന്നെ ക്രിക്കറ്റുമായി ബന്ധപ്പെട്ട് ഇനിയും പ്രവർത്തിക്കും. രാഷ്ട്രീയ പ്രവേശനത്തിനായി ഓഫറുകളുണ്ടായിരുന്നെങ്കിലും ഞാൻ അക്കാര്യം ആലോചിച്ചിട്ടില്ല." സൗരഭ് തിവാരി പറഞ്ഞു.

പതിനൊന്നാം വയസിൽ ക്രിക്കറ്റ് കരിയർ ആരംഭിച്ച തിവാരി 2006-07 സീസണിലാണ് രഞ്ജി ട്രോഫിയിൽ അരങ്ങേറുന്നത്. 2008-ൽ വിരാട് കോലിയുടെ നേതൃത്വത്തിൽ മലേഷ്യയിൽ നടന്ന അണ്ടർ 19 ലോകകപ്പ് ജയിച്ച ടീമിൽ അംഗമായിരുന്നു. 2010-ൽ ഐപിഎല്ലിൽ മുംബൈ ഇന്ത്യൻസിനായി പുറത്തെടുത്ത പ്രകടനം താരത്തെ ശ്രദ്ധേയനാക്കി. സീസണിൽ 419 റൺസ് നേടി തിവാരിക്ക് പിന്നാലെ ഏഷ്യ കപ്പിനുള്ള ഇന്ത്യൻ ടീമിലേക്കും വിളിയെത്തി. പക്ഷേ അരങ്ങേറ്റത്തിനായി 2010 ഒക്ടോബർ വരെ കാത്തിരിക്കേണ്ടി വന്നു. ഇന്ത്യൻ ജേഴ്സിയിൽ മൂന്ന് മത്സരങ്ങൾ മാത്രമാണ് കളിക്കാനായത്.

യുവതാരങ്ങൾക്ക് കൂടുതൽ അവസരങ്ങൾ ലഭിക്കുന്നതിനാണ് വിരമിക്കുന്നതെന്ന് തിവാരി പറഞ്ഞു. ഐപിഎല്ലിൽ റോയൽ ചലഞ്ചേഴ്സ് ബാംഗ്ലൂർ, ഡൽഹി ക്യാപ്പിറ്റൽസ്, റൈസിങ് പുണെ സൂപ്പർ ജയന്റ്സ് ടീമുകൾക്കായും സൗരഭ് കളിച്ചിട്ടുണ്ട്.

2020ലെ താരലേലത്തിൽ 50 ലക്ഷം രൂപയ്ക്ക് വീണ്ടും മുംബൈ ഇന്ത്യൻസിൽ ചേർന്നു. 2022 ലെ മെഗാലേലത്തിനു മുൻപാണ് താരത്തെ മുംബൈ റിലീസ് ചെയ്തത്. 93 ഐപിഎൽ മത്സരങ്ങളിൽനിന്ന് 1494 റൺസെടുത്തിട്ടുണ്ട്. ഫസ്റ്റ് ക്ലാസിൽ 115 മത്സരങ്ങൾ കളിച്ചിട്ടുണ്ട്. ഝാർഖണ്ഡിന്റെ ക്യാപ്റ്റനായിരുന്നു.