അഹമ്മദാബാദ്: ഇന്ത്യൻ പ്രീമിയർ ലീഗിൽ സൺറൈസേഴ്‌സ് ഹൈദരാബാദിനെതിരെ ഗുജറാത്ത് ടൈറ്റൻസിന് 163 റൺസ് വിജയ ലക്ഷ്യം. സൺറൈസേഴ്‌സ് എട്ടു വിക്കറ്റ് നഷ്ടത്തിൽ 162 റൺസെടുത്തു. അഹമ്മദാബാദ്, നരേന്ദ്ര മോദി സ്റ്റേഡിയത്തിൽ ടോസ് നേടി ബാറ്റിങ് തിരഞ്ഞെടുത്ത ഹൈദരാബാദിന് വേണ്ടി ഒരാൾ പോലും 30നപ്പുറമുള്ള സ്‌കോർ നേടിയില്ല. ഗുജറാത്തിന് വേണ്ടി മോഹിത് ശർമ മൂന്ന് വിക്കറ്റ് വീഴ്‌ത്തി. നാല് ഓവറിൽ 25 റൺസ് മാത്രമാണ് മോഹിത് വിട്ടുകൊടുത്തത്.

കഴിഞ്ഞ മത്സരത്തിൽ മുംബൈ ഇന്ത്യൻസിനെതിരെ വെടിക്കെട്ട് ബാറ്റിങ് പ്രകടനം നടത്തിയ ഹൈദരാബാദ്, അഹമ്മദാബാദ് നരേന്ദ്ര മോദി സ്റ്റേഡിയത്തിൽ പതറിപ്പോയി. 20 പന്തിൽ 29 റൺസെടുത്ത അഭിഷേക് ശർമയും 14 പന്തിൽ 29 റൺസെടുത്ത അബ്ദുൽ സമദുമാണ് ഹൈദരാബാദ് നിരയിലെ ടോപ് സ്‌കോറർമാർ.

ട്രാവിസ് ഹെഡ് (14 പന്തിൽ 19), മയാങ്ക് അഗർവാൾ (17 പന്തിൽ 16), എയ്ഡൻ മർക്റാം (19 പന്തിൽ 17), ഹെന്റിച് ക്ലാസൻ (13 പന്തിൽ 24), ഷഹബാസ് അഹമ്മദ് (20 പന്തിൽ 22) എന്നിവരാണ് ഹൈദരാബാദ് നിരയിലെ മറ്റു പ്രധാന സ്‌കോറർമാർ. മികച്ച തുടക്കം ലഭിച്ചിട്ടും വലിയൊരു കൂട്ടുകെട്ടുണ്ടാക്കാൻ ഹൈദരാബാദ് ബാറ്റർമാരെ ഗുജറാത്ത് ബോളർമാർ അനുവദിച്ചില്ല.

സ്‌കോർബോർഡിൽ 34 റൺസുള്ളപ്പോൾ മായങ്ക് അഗർവാളിന്റെ (16) വിക്കറ്റ് നഷ്ടമായി. അസ്മതുള്ള ഓമർസായാണ് ബ്രേക്ക് ത്രൂ നൽകിയത്. ട്രാവിസ് ഹെഡിനും (19) അധികം അയുസുണ്ടായിരുന്നില്ല. അഭിഷേകും മടങ്ങിയതോടെ ഹൈദരാബാദ് 10 ഓവറിൽ മൂന്നിന് 74 എന്ന നിലയിലായി. എയ്ഡൻ മാർക്രം (17), ഹെന്റിച്ച് ക്ലാസൻ (24) എന്നിവർ അധികനേരം നിൽക്കാത്തത് ഹൈദരാബാദിന് തിരിച്ചടിയായി. പിന്നീട് ഷഹ്ബാസ് അഹമ്മദ് (22), സമദ് (29) എന്നിവരുടെ ഇന്നിങ്സാണ് മാന്യമായ സ്‌കോറിലേക്ക് നയിച്ചത്. വാഷിങ്ടൺ സുന്ദറാണ് (0) പുറത്തായ മറ്റൊരു താരം.

ടൈറ്റൻസിനായി മോഹിത് ശർമ മൂന്നു വിക്കറ്റുകൾ നേടി. അസ്മത്തുല്ല ഒമർസായി, ഉമേഷ് യാദവ്, റാഷിദ് ഖാൻ, നൂർ അഹമ്മദ് എന്നിവർ ഓരോ വിക്കറ്റു വീതം വീഴ്‌ത്തി. രണ്ടു കളികളിൽ ഒരു വിജയവും ഒരു തോൽവിയുമായി ഹൈദരാബാദ് അഞ്ചാം സ്ഥാനത്താണ്. ഹൈദരാബാദിനും ഗുജറാത്തിനും രണ്ടു പോയിന്റ് വീതമാണുള്ളത്.

സൺറൈസേഴ്‌സ് ഹൈദരാബാദ് പ്ലേയിങ് ഇലവൻ ട്രാവിസ് ഹെഡ്, മയാങ്ക് അഗർവാൾ, അഭിഷേക് ശർമ, എയ്ഡൻ മർക്‌റാം, ഹെർറിച് ക്ലാസൻ (വിക്കറ്റ് കീപ്പർ), അബ്ദുൽ സമദ്, ഷഹബാസ് അഹമ്മദ്, പാറ്റ് കമിൻസ് (ക്യാപ്റ്റൻ), ഭുവനേശ്വർ കുമാർ, മയാങ്ക് മാർക്കണ്ഡെ, ജയ്‌ദേവ് ഉനദ്ഘട്ട്.

ഗുജറാത്ത് ടൈറ്റൻസ് പ്ലേയിങ് ഇലവൻ ശുഭ്മൻ ഗിൽ (ക്യാപ്റ്റൻ), വൃദ്ധിമാൻ സാഹ (വിക്കറ്റ് കീപ്പർ), വിജയ് ശങ്കർ, ഡേവിഡ് മില്ലർ, അസ്മത്തുല്ല ഒമർസായി, രാഹുൽ തെവാത്തിയ, റാഷിദ് ഖാൻ, ദർശൻ നൽകണ്ടെ, നൂർ അഹമ്മദ്, ഉമേഷ് യാദവ്, മോഹിത് ശർമ.