അഹമ്മദാബാദ്: കഴിഞ്ഞ ഐപിഎൽ താരലേലത്തിൽ അടിസ്ഥാന വിലയ്ക്ക് സ്വന്തമാക്കിയ ശേഷം ആളുമാറിയെന്ന പേരിൽ ടീം മാനേജ്മെന്റ് ഒഴിവാക്കാൻ ശ്രമിച്ച് ക്രിക്കറ്റ് ലോകത്തിന് മുന്നിൽ പരിഹസിക്കപ്പെട്ട ശശാങ്ക് സിങ് എന്ന ബാറ്റർ ഇന്ന് പഞ്ചാബ് കിങ്‌സിന്റെ അഭിമാന താരമാണ്. ലേലത്തിൽ ആള് മാറി വിളിച്ചു എന്ന് മനസിലായതോടെ ശശാങ്കിന്റെ ഓക്ഷൻ റദ്ദാക്കാൻ പഞ്ചാബ് കിങ്‌സ് ഉടമകൾ ആവശ്യപ്പെട്ടിരുന്നു. എന്നാൽ ലേലം അസാധുവാക്കാൻ നിയമം അനുവദിക്കാത്തതിനാൽ ശശാങ്ക് സിങ് ടീമിൽ എത്തി. ഒടുവിൽ കഴിഞ്ഞ ദിവസത്തെ മത്സരത്തിൽ ഗുജറാത്ത് ടൈറ്റൻസിനെതിരെ തോൽവി ഒരുഘട്ടത്തിൽ ഉറപ്പിച്ച പഞ്ചാബ് കിങ്‌സിന് ത്രില്ലർ ജയം ഒരുക്കി വെടിക്കെട്ട് ബാറ്റിംഗിലൂടെ ശശാങ്ക് സിങ് തന്നെ പരിഹസിച്ചവർക്കുള്ള മറുപടി നൽകുകയായിരുന്നു.

താരലേലത്തിൽ വിളിച്ചെടുത്ത ശേഷം ഒഴിവാക്കാൻ ശ്രമിച്ചത് വിവാദമാകുമെന്ന് ഉറപ്പായപ്പോൾ പേരിലുണ്ടായ ആശയക്കുഴപ്പമാണ് കാരണം, ഇയാളെയും പരിഗണിച്ചിരുന്നു എന്ന ന്യായീകരണവുമായി ടീമിലുൾപ്പെടുത്തുകയായിരുന്നു. ഐപിഎല്ലിന് മുമ്പ് തന്നെ അവഗണനകൾ നേരിടേണ്ടി വന്ന താരമാണ് പഞ്ചാബ് കിങ്സിന്റെ ശശാങ്ക് സിങ്. സമാനതകളില്ലാത്ത പരിഹാസമാണ് താരത്തിന് നേരിടേണ്ടിവന്നത്. ആരാധകരും കളിയാക്കിയപ്പോൾ ഇതിനെല്ലാം ശശാങ്ക് തന്റെ ബാറ്റുകൊണ്ടാണ് മറുപടി നൽകിയത്. അവസരം കിട്ടിയപ്പോഴെല്ലാം ടീമിനായി മികച്ച പ്രകടനത്തിലൂടെ ക്രിക്കറ്റ് ആരാധകരുടെ ഗുഡ് ബുക്കിൽ ഇടം നേടിക്കഴിഞ്ഞു.

ഇപ്പോൾ ശശാങ്ക് സിംഗിനെ അഭിനന്ദനം കൊണ്ട് മൂടുകയാണ് പഞ്ചാബ് കിങ്‌സ് ഉടമ പ്രീതി സിന്റ. ലേലത്തിൽ സംഭവിച്ച കാര്യങ്ങളെക്കുറിച്ച് ഒടുവിൽ സംസാരിക്കാൻ പറ്റിയ ദിവസമാണെന്ന് തോന്നുന്നു എന്ന് പറഞ്ഞു കൊണ്ടാണ് പ്രീതി സിന്റയുടെ ഫേസ്‌ബുക്ക് കുറിപ്പ് തുടങ്ങുന്നത്. ശശാങ്കിന് സംഭവിച്ച പോലെയുള്ള സമാനമായ സാഹചര്യങ്ങൾ വന്നാൽ പലർക്കും ആത്മവിശ്വാസം നഷ്ടപ്പെടുകയോ സമ്മർദ്ദത്തിന് കീഴ്‌പ്പെടുകയോ ചെയ്യും. എന്നാൽ ശശാങ്ക് അങ്ങനെയല്ല. ശരിക്കും സ്‌പെഷ്യൽ ശശാങ്ക് എന്ന് പ്രീതി സിന്റ കുറിച്ചു.

ഒരു കളിക്കാരനെന്ന നിലയിലുള്ള കഴിവ് മാത്രമല്ല, പോസിറ്റീവ് മനോഭാവവും അവിശ്വസനീയമായ സ്പിരിറ്റും എടുത്ത് പറയേണ്ടതാണ്. എല്ലാ കമന്റുകളും തമാശകളും സ്‌പോർസ്മാൻ സ്പിരിറ്റോടെ നേരിട്ട് അതിന് ഇരയാകാൻ കൂട്ടാക്കാതെ സ്വയം പിന്താങ്ങി. അവൻ എന്താണ് എന്ന് ഞങ്ങൾക്ക് കാണിച്ച് തന്നു. അതിന് ശശാങ്കിനെ അഭിനന്ദിക്കുന്നുവെന്ന് പ്രീതി സിന്റ പറഞ്ഞു.

ജീവിതത്തിൽ വിചാരിക്കാത്ത വഴിത്തിരിവുണ്ടാകുന്ന സമയത്ത് അവൻ നിങ്ങൾക്കെല്ലാവർക്കും ഒരു മാതൃകയായിരിക്കുമെന്ന് പ്രതീക്ഷിക്കുന്നു. കാരണം ആളുകൾ നിങ്ങളെക്കുറിച്ച് എന്ത് ചിന്തിക്കുന്നു എന്നതല്ല, മറിച്ച് നിങ്ങൾ നിങ്ങളെ കുറിച്ച് എന്താണ് ചിന്തിക്കുന്നത് എന്നതാണ് പ്രധാനം. അതിനാൽ ശശാങ്കിനെപ്പോലെ സ്വയം വിശ്വസിക്കുന്നത് ഒരിക്കലും അവസാനിപ്പിക്കരുത്. ജീവിതത്തിന്റെ കളിയിൽ നിങ്ങൾ മാൻ ഓഫ് ദി മാച്ച് ആകുമെന്ന് എനിക്ക് ഉറപ്പുണ്ടെന്നും പ്രീതി കൂട്ടിച്ചേർത്തു.

കോടികൾ മുടക്കിയ താരങ്ങളെല്ലാം ഉത്തരവാദിത്തമില്ലാതെ മടങ്ങിയപ്പോൾ പക്വതയോടെ ഇന്നിങ്‌സ് പടുത്തുയർത്തി പഞ്ചാബിനെ വിജയ തീരത്തടുപ്പിക്കാൻ 32-കാരനായി. ക്രിക്കറ്റിൽ അവഗണനയുടെ കഥകളാണ് ശശാങ്കിന് പറയാനുള്ളത്. ആഭ്യന്തര ക്രിക്കറ്റിൽ മുംബൈക്കായി മികച്ച പ്രകടനം കാഴ്ചവച്ചിട്ടും താരത്തിന് അവസരങ്ങൾ ലഭിച്ചിരുന്നില്ല. 2018-ൽ അവസരങ്ങൾ കിട്ടാത്തതിനെ തുടർന്ന് പുതുച്ചേരിയിലേക്ക് ശശാങ്ക് ചേക്കേറി. അവിടെ ക്രിക്കറ്റിന്റെ എല്ലാ ഫോർമാറ്റിലും താരം പാഡണിഞ്ഞു. എന്തിന് ബൗളിംഗിലും തന്റേതായ വ്യക്തിമുദ്ര പതിപ്പിച്ചു. ക്രിക്കറ്റിനോടുള്ള ഈ അഭിനിവേശമാണ് ശശാങ്ക് എന്ന താരത്തെ ആഭ്യന്തര ക്രിക്കറ്റിൽ ഛത്തീസ്‌ഗഡിൽ എത്തിച്ചത്. അവിടെയും മികച്ച പ്രകടനങ്ങൾ തുടർന്നു ആരാധകരുടെ മനസിൽ ഇടംനേടി.

2023-24 സീസണിൽ മുംബൈയ്ക്കെതിരെയുള്ള ഛത്തീസ്‌ഗഢിന്റെ ആദ്യ വിജയത്തിൽ നിർണായക പങ്കുവഹിച്ചതും ശശാങ്കെന്ന താരമാണ്. ലിസ്റ്റ് എ ക്രിക്കറ്റിൽ മണിപ്പൂരനെതിരെ 150 ലധികം റൺസ് നേടുകയും അഞ്ച് വിക്കറ്റ് വീഴ്‌ത്തുകയും ചെയ്ത ആദ്യതാരമെന്ന നേട്ടവും ശശാങ്കിന് സ്വന്തമാണ്. 2017-ലാണ് ശശാങ്ക് ഐപിഎൽ കരിയർ ആരംഭിക്കുന്നത്. ഡൽഹിക്കായി അരങ്ങേറി. പിന്നീട് രാജസ്ഥാൻ റോയൽസിലും(202921) സൺറൈസേഴ്സ് ഹൈദരാബാദിലും(2022) എത്തിയെങ്കിലും മികച്ച പ്രകടനം നടത്താനായില്ല.

ബെഞ്ചിലിരുന്ന് ഒടുങ്ങേണ്ട കരിയറാണ് വീണ്ടും യുടേൺ അടിച്ചത്. പഞ്ചാബ് തോൽവി മുന്നിൽ കണ്ടുനിൽക്കുമ്പോഴാണ് ആറാമനായി ശശാങ്ക് ക്രീസിലെത്തുന്നത്. 29 പന്തിൽ നിന്ന് പുറത്താകാതെ 61 റൺസുമായി അപ്രതീക്ഷിതമെന്ന് കരുതിയ വിജയം പഞ്ചാബിന് സമ്മാനിക്കുകയായിരുന്നു. 6 ബൗണ്ടറികളും നാല് സിക്സറുകളും ഉൾപ്പെടുന്നതായിരുന്നു താരത്തിന്റെ ഇന്നിങ്. ലക്നൗവിനെതിരെയും ബെംഗളൂരുവിനെതിരെയും മികച്ച രീതിയിൽ ബാറ്റ് ചെയ്യാൻ താരത്തിന് സാധിച്ചു.