ജയ്പുർ: വിരാട് കോലിയുടെ തകർപ്പൻ സെഞ്ചുറിക്ക് ജോഷ് ബട്ലറിലൂടെ മറുപടി നൽകിയ രാജസ്ഥാൻ റോയൽസിന് ഹോം ഗ്രൗണ്ടിൽ തകർപ്പൻ ജയം. ജയ്പുരിൽ ആറ് വിക്കറ്റിനാണ് രാജസ്ഥാൻ വിജയിച്ചത്. നായകന്റെ ഇന്നിങ്‌സുമായി സഞ്ജു ബട്‌ലർക്ക് മികച്ച പിന്തുണ നൽകി. ബെംഗളൂരു ഉയർത്തിയ 184 റൺസ് വിജയലക്ഷ്യം നാല് വിക്കറ്റ് നഷ്ടത്തിൽ രാജസ്ഥാൻ മറികടന്നു. സെഞ്ചുറി നേടിയ ബട്ലറിന്റേയും അർധസെഞ്ചുറി നേടിയ സഞ്ജുവിന്റേയും പ്രകടനമാണ് രാജസ്ഥാന് തുണയായത്. സഞ്ജു 42 ബോളിൽ 69 റൺസിൽ പുറത്തായപ്പോൾ ബട്‌ലർ 58 പന്തിൽ 100* റൺസുമായി പുറത്താവാതെ നിന്നു. സിക്‌സോടെ സെഞ്ചുറി തികച്ചുകൊണ്ടായിരുന്നു ബട്‌ലറുടെ ഫിനിഷിങ്.

ബെംഗളൂരു ഉയർത്തിയ 184 റൺസ് വിജയലക്ഷ്യവുമായി മറുപടി ബാറ്റിങ്ങിനിറങ്ങിയ രാജസ്ഥാന് ആദ്യ ഓവറിലെ രണ്ടാം പന്തിൽ തന്നെ ഓപ്പണർ ജയ്സ്വാളിനെ(0) നഷ്ടമായി. റീസെ ടോപ്ലി ജയ്സ്വാളിനെ മാക്സ്വെല്ലിന്റെ കൈകളിലെത്തിച്ചു. പിന്നാലെ നായകൻ സഞ്ജു മൂന്നാമനായി ഇറങ്ങി. തുടക്കത്തിലെ ബെംഗളൂരുവിന്റെ വിജയപ്രതീക്ഷകളൊക്കെയും ബട്ലറും സഞ്ജുവും കൂടി മായിച്ചുകളയുന്നതാണ് ജയ്പുർ സവായ് മാൻസിങ് സ്റ്റേഡിയത്തിൽ കണ്ടത്.

പതിയെയാണ് തുടങ്ങിയതെങ്കിലും ക്രീസിൽ നിലയുറപ്പിച്ചതോടെ ഇരുവരും ചേർന്ന് ബെംഗളൂരു ബൗളർമാരെ പ്രഹരിച്ചു. തകർത്തടിച്ച് കളിച്ച ബട്ലർ ആറോവറിൽ സ്‌കോർ 50-കടത്തി. പിന്നാലെ സഞ്ജുവും ട്രാക്കിലായതോടെ ബെംഗളൂരു തോൽവി മണത്തു. വൈകാതെ ജോഷ് ബട്ലർ അർധസെഞ്ചുറിയും തികച്ചു. പത്തോവറിൽ 95-1 എന്ന നിലയിലായിരുന്നു രാജസ്ഥാൻ. 11-ാം ഓവറിൽ മായങ്കിനെ അതിർത്തികടത്തി സഞ്ജുവും അർധസെഞ്ചുറി നേടി.

മത്സരം രാജസ്ഥാൻ അനായാസം ജയിച്ചുകയറുമെന്നു തോന്നിച്ചെങ്കിലും വിക്കറ്റുകൾ പിഴുത് ബെംഗളൂരു ബൗളർമാർ തിരിച്ചടിച്ചു. 69-റൺസെടുത്ത സഞ്ജുവിനെ സിറാജ് പുറത്താക്കി. കഴിഞ്ഞ മത്സരങ്ങളിൽ മികച്ച പ്രകടനം പുറത്തെടുത്ത റിയാൻ പരാഗിന് ഒന്നും ചെയ്യാനായില്ല. നാല് പന്തിൽ നിന്ന് നാല് റൺസെടുത്ത പരാഗിനെ യാഷ് ദയാൽ കോലിയുടെ കൈകളിലെത്തിച്ചു. പിന്നാലെ ധ്രുവ് ജുറലിനെ ടോപ്ലിയും മടക്കിയതോടെ ബെംഗളൂരുവിന് ചെറിയ പ്രതീക്ഷ കൈവന്നു. രാജസ്ഥാൻ 164-4 എന്ന നിലയിലായി.

എന്നാൽ ബട്ലറും ഹെറ്റ്മയറും ചേർന്ന് രാജസ്ഥാനെ വിജയതീരത്തെത്തിച്ചു. സിക്സടിച്ച് ബട്ലർ സെഞ്ചുറിയും മത്സരത്തിലെ വിജയറണ്ണും കുറിച്ചും. ബട്ലർ 58-പന്തിൽ നിന്ന് 100 റൺസെടുത്തപ്പോൾ ഹെറ്റ്മയർ ആറ് പന്തിൽ നിന്ന് 11 റൺസെടുത്തും പുറത്താവാതെ നിന്നു.ബെംഗളൂരിനായി റീസെ ടോപ്ലി രണ്ട് വിക്കറ്റെടുത്തപ്പോൾ യാഷ് ദയാൽ, മുഹമ്മദ് സിറാജ് എന്നിവർ ഓരോ വിക്കറ്റ് വീതം വീഴ്‌ത്തി.

നേരത്തേ കോലിയുടെ സെഞ്ചുറി മികവിൽ മൂന്ന് വിക്കറ്റ് നഷ്ടത്തിൽ ബെംഗളൂരു 183 റൺസെടുത്തു. വിരാട് കോലിയും നായകൻ ഫാഫ് ഡുപ്ലെസിസും മികച്ച തുടക്കമാണ് ബെംഗളൂരുവിന് സമ്മാനിച്ചത്. പവർപ്ലേയിൽ കോലിയായിരുന്നു കൂടുതൽ അപകടകാരി. ആദ്യ ആറ് ഓവറിൽ തന്നെ ഇരുവരും ചേർന്ന് സ്‌കോർ അമ്പത് കടത്തി. വിക്കറ്റ് നഷ്ടമില്ലാതെ 53-റൺസെന്ന നിലയിലായിരുന്നു ടീം. ഈ സീസണിൽ പവർപ്ലേയിൽ ബെംഗളൂരുവിന് ഇതാദ്യമായാണ് വിക്കറ്റ് നഷ്ടപ്പെടാതിരിക്കുന്നത്.

പിന്നാലെ ഡുപ്ലെസിയും തകർത്തടിക്കാൻ തുടങ്ങിയതോടെ രാജസ്ഥാൻ ബൗളർമാർ പ്രതിരോധത്തിലായി. പത്തോവറിൽ ടീം സ്‌കോർ 88-ലെത്തി. പിന്നാലെ കോലി സീസണിലെ തന്റെ മൂന്നാം അർധസെഞ്ചുറിയും തികച്ചു. 12-ാം ഓവറിൽ ഇരുവരും നൂറ് റൺസിന്റെ കൂട്ടുകെട്ടും പടുത്തുയർത്തി. ടീം സ്‌കോർ 125-ൽ നിൽക്കേ ബെംഗളൂരുവിന് ആദ്യ വിക്കറ്റ് നഷ്ടമായി. ഡുപ്ലെസിയെ ബട്ലറിന്റെ കൈകളിലെത്തിച്ചാണ് ചാഹൽ കൂട്ടുകെട്ട് പൊളിച്ചത്. 33-പന്തിൽ നിന്ന് 44-റൺസാണ് ബെംഗളൂരു നായകന്റെ സമ്പാദ്യം.

പിന്നാലെ ക്രീസിലിറങ്ങിയ ഗ്ലെൻ മാക്സ്വെൽ നിരാശപ്പെടുത്തി. നാന്ദ്രെ ബർഗറിന്റെ പന്തിൽ ബൗൾഡായി താരം വേഗം കൂടാരം കയറി. മൂന്ന് പന്തിൽ നിന്ന് ഒരു റൺ മാത്രമാണ് മാക്സ്വെൽ നേടിയത്. എന്നാൽ ക്രീസിൽ നിലയുറപ്പിച്ച് ബാറ്റേന്തിയ കോലി ബെംഗളൂരു സ്‌കോർ 150-കടത്തി. നാലാമനായി ഇറങ്ങിയ സൗരവ് ചഹാന് കാര്യമായി ഒന്നും ചെയ്യാനായില്ല. ആറ് പന്തിൽ നിന്ന് ഒമ്പത് റൺസാണ് താരം നേടിയത്.

വിക്കറ്റുകൾ വീഴുമ്പോഴും ശ്രദ്ധയോടെ ബാറ്റേന്തിയ കോലിയാണ് ജയ്പുരിൽ ബെംഗളൂരുവിന് തുണയായത്. പിന്നാലെ 19-ാം ഓവറിൽ കോലി സെഞ്ചുറിയും തികച്ചു. 67-പന്തിൽ നിന്നാണ് താരത്തിന്റെ സെഞ്ചുറി. ഒടുക്കം നിശ്ചിത 20-ഓവറിൽ മൂന്ന് വിക്കറ്റ് നഷ്ടത്തിൽ ബെംഗളൂരു 183-റൺസെടുത്തു.72-പന്തിൽ നിന്ന് കോലി 113 റൺസെടുത്തു. രാജസ്ഥാനായി ചാഹൽ രണ്ട് വിക്കറ്റ് വീഴ്‌ത്തിയപ്പോൾ നാന്ദ്രെ ബർഗർ ഒരു വിക്കറ്റെടുത്തു.